ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މިހާރު ކުރިއަށް ގެންދާ ޔޫތު ޗެމްޕިއަންޝިޕްގެ ފައިނަލް މެޗު ފ. ނިލަންދޫ ޓާފު ދަނޑުގައި ކުޅޭ ގޮތަށް ނިންމައިފިއެވެ.
"ސަން"އާ ވާހަކަ ދައްކަމުން އެފްއޭއެމްގެ ޖެނަރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ ފައިނަލް މެޗު ކުޅުމުގެ ކުރިން އެފްއޭއެމްގެ ޓީމަކުން އެ ރަށަށް ދަތުރުކޮށް އިންސްޕެކްޝަނެއް ހަދާފައިވާކަމަށެވެ.
ދަނޑުގެ އިންސްޕެކްޝަނާއި އެކޮމަޑޭޝަން އަދި އެހެނިހެން ކަންކަމަށް ބެލުމަށްފަހު މިހާރު ފ. ނިލަންދޫގައި ފައިނަލް މެޗު ކުޅުމަށް ނިންމާފައިވާކަމަށް ޖަވާ ވިދާޅުވިއެވެ.
މިމަހުގެ 13 ވަނަ ދުވަހު ކުޅުމަށް ތާވަލްކޮށްފައިވާ ފައިނަލްގެ ފުރަތަަމަ ޖާގަ މިއަދު ހަވީރު އީގަލްސްއިން ހޯދިއިރު، އީގަލްސްއާ ދެން ވާދަކުރާނެ ޓީމެއް އިނގޭނީ މިރޭ ކުޅޭ ސެމީ ފައިނަލްގެ ދެ ވަނަ މެޗަށް ފަހުއެވެ. މިރޭގެ މެޗުގައި ބައްދަލުކުރާނީ ޔުނައިޓެޑް ވިކްޓަރީ އާއި ސުޕަ ޔުނައިޓެޑް ސްޕޯޓްސް ކުލަބް (ސަސް) އެވެ.
މި ސަރުކާރުން ރާއްޖޭގެ ގިނަ ރަށްތަކުގައި ޓާފު ދަނޑުތައް އަޅަމުން އަންނައިރު، ނިލަންދޫ ދަނޑަކީވެސް އޭގެ ދަނޑެކެވެ. އެ ދަނޑުގެ މަސައްކަތް ކުރިއަށް ގެންގޮސްފައިވަނީ އަމީން ކޮންސްޓްރަކްޝަނާ ހަވާލުކޮށްގެންނެވެ.
ނިލަންދޫއަކީ ރާއްޖޭގެ ފުޓުބޯޅައިގައި މަޝްހޫރު ރަށެކެެވެ. ނިލަންދޫ އިން ވަނީ ދިވެހި ޕްރިމިއާ ލީގުގެ ފުރަތަމަ ޑިވިޝަންގައި ވެސް ވާދަކޮށްފައެވެ.
ރާއްޖޭގައި ގާއިމުކުރެވޭ ޓާފު ދަނޑުތަކުގައި ގައުމީ ބޮޑެތި މެޗުތަކާއި ބައިނަލްއަގުވާމީ މެޗުތައް ކުޅުމަކީ މި ސަރުކާރުގެ އަމާޒެއްކަމަށް ޔޫތު މިނިސްޓަރު މަހުލޫފް މީގެ ކުރިން ބުނެފައިވާއިރު، ދާދި ފަހުން ވަނީ ރައީސުލްޖުމްހޫރިއްޔާގެ ތައްޓަށް ކުޅޭ ޕްރެޒިޑެންޓްސް ކަޕްގެ ފައިނަަލް ރ. އަލިފުށީގައި ކުޅެފައެވެ.
comment ޤާދިރު
3 year 4 month ago
ދޮގު ނުހަދާ. އެއީ ނިލަންދޫ ޓީމު ފުރަތަމަ ޑިވިޝަނަށް ޕްރޮމޯޓުވުމުން ޓާފު އަޅަން ހަމަ ޖެހުނު ދަނޑެކެވެ. ފުރަތަމަ ޑިވިޝަނަށް ޕްރމޯޓުވާ ޓީމު ހިމެނޭ ކޮންމެ ރަށަކަށް ވެސް ޓާފު ދަނޑެއް އަޅައިދޭގޮތަށް ސަރުކާރުން ވަނީ ހަމަޖައްސާފައެވެ. ނިލަންދޫ ޓީމު ފުރަތަމަޑިވިޝަނަށް ޕްރޮމޯޓުވީ ޔާމީނުގެ ވެރިކަމުގައި. އެ ވެރިކަމުގައި ދަނޑުގެ މަސައްކަތް ފަށައިފި. އެ ދަނޑު ހެދުމުގައި އެންމެ ބޮޑު ހިއްސާއެއް ވެފައިވާނީ ރަށު ޑޭލައިޓު ކުލަބާއި، ޖަމިއްޔަތުއްޝަބާބައި ނިލަންދޫ ކައުސިލެވެ. ޔޫތު މިނިސްޓްރީން ވެސް އެހީވިއެވެ. ރަނގަޅު ދަނޑުގެ މަސައްކަތް ނިމުނީ މި ވެރިކަމުގައި.