އާއިލާއިން ރައީސް ނަޝީދަށް އެންމެ ވޯޓެއްވެސް ނުލިބޭނެ، މާފަށް އެދެން ގޮވާލަން: އަނދުން ހުސެއިން

ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން)ގެ އާއިލާގެ އެންމެ މެމްބަރެއްގެ ވޯޓުވެސް ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް ލިބިވަޑައިނުގަންނަވާނެ ކަމަށް އޭނާ ވިދާޅުވެއްޖެއެވެ.

ރައީސް ނަޝީދުގެ ކެމްޕެއިންގެ ތެރެއިން މިއަދު އެމަނިކުފާނު ވަނީ މާލޭގެ ބައެއް ގޭގެއަށް ޒިޔާރަތްކުރައްވާފައެވެ. އެގޮތުން، ޕްރައިމަރީގައި ރައީސް އިބްރާހީމް މުޙައްމަދު ޞާލިޙަށް ތާއިދު ކުރައްވާ އަނދުން ހުސެއިންގެ އާއިލާ ދިރިއުޅޭ ހ. އަދުންގެއަށް ރައީސް ނަޝީދު ވަޑައިގަތެވެ. އަދި ކުޑަކުދިން ހިމެނޭހެން އެގޭގައި ދިރިއުޅޭ އެންމެންނާއެކު ފޮޓޯއެއް ނެންގެވިއެވެ.

ރައީސް ނަޝީދުގެ ކެމްޕެއިންގެ ހޭޝްޓެގް ބޭނުންކޮށް އެ ފޮޓޯ މީސްމީޑިއާގައި ބޭނުންކުރަން ފެށުމާއެކު، އަނދުން ހުސެއިން ވަނީ އެކަމާ ނުރުހުން ފާޅުކުރައްވާފައެވެ.

"ސަން"އާ ވާހަކަދައްކަވަމުން އޭނާ ވިދާޅުވީ، ރައީސް ނަޝީދު އެގެއަށް ވަޑައިގެންނެވުމުން އާއިލާގެ މެމްބަރުން އެމަނިކުފާނަށް މަރުޙަބާ ދެންނެވީ އެއީ މަޖިލީހުގެ ރައީސަށް ވުމުން ކަމަށެވެ. އަދި ގޭގެ ކުޑަކުދިން ހިމެނޭހެން ނަގާފައިވާ ފޮޓޯއެއް ކެމްޕެއިނަށް ބޭނުންކުރުމުން އޭނާ ވަނީ އެކަމާ ނުރުހުން ފާޅުކުރައްވާފައެވެ.

އަނދުން ހުސައިން ވިދާޅުވީ، އޭނާގެ އާއިލާގެ އެއްވެސް މީހަކު ޕްރައިމަރީގައި ރައީސް ނަޝީދަށް ތާއިދު ނުކުރާ ކަމަށެވެ.

ވަރަށް ލަދު ދެއްތޯ. އަޅުގަނޑުގެ އާއިލާގެ އެއްވެސް ކުޑަކުއްޖަކު ކެމްޕެއިންގެ އެއްވެސް ކަމަކަށް ބޭނުމެއް ނުކުރަން. އެކަމަކު ގެއަށް ވަދެވަޑައިގެން މެހެމާންދާރީ އަދާކުރެއްވީމާ އޭގެ މާނައެއްނޫން އެއީ ކުޑަކުދިންގެ ފޮޓޯ އެއުސޫލުން ބޭނުންކުރާކަށް. އަޅުގަނޑު މި ދަންނަވަނީ މިހާރުވެސް މި ހުރީ ރައީސް ޞާލިޙް އަރިހުގައި ކެމްޕޭނުގައި ގއ. ވިލިނގިލީގައި. އަޅުގަނޑުގެ އާއިލާއަކުން ރައީސް ނަޝީދަކަށް އެންމެ ވޯޓެއްވެސް ނުލިބޭނެ. ރައީސް ނަޝީދު މާފަށް އެދިވަޑައިގަންނަވަން ޖެހޭނެ. ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން)

އަނދުން ހުސައިން މީގެކުރިން ފާހަގަކުރެވުނީ ރައީސް ނަޝީދުގެ ވަރަށް އަރިސް ބޭފުޅެއްގެ ގޮތުގައެވެ. ނަމަވެސް ނިމިދިޔަ މަޖިލީހުގެ ފަހު ދައުރުގައި އޭނާ ވަނީ ރައީސް ޞާލިޙަށް ތާއީދުކުރައްވައި މަސައްކަތް ކުރަން ފަށްޓަވާފައެވެ.

އެމްޑީޕީގެ ޕްރައިމަރީ އަންނަ ހޮނިހިރު ދުވަހު ބާއްވާއިރު، ދެ ބޭފުޅުން ވެސް ގެންދަވަނީ ވަރަށް ވާދަވެރި ކަމާއެކު ކެމްޕެއިން ކުރައްވަމުންނެވެ.