ނުލިބޭ ޑޮލަރު މާރުކުރަން ޖެހޭތީ ޗަންޕާ ސެންޓްރަލް ހޮޓެލް ބަންދުކޮށްފި

ބޭރުފައިސާއާ ބެހޭ ގަވާއިދުގެ ސަބަބުން ނުލިބޭ ޑޮލަރު މާރު ކުރަން ޖެހޭތީ، ކުރައުން އެންޑް ޗަމްޕާ ރިސޯޓްސްއިން މާލޭގައި ހިންގާ ޗަންޕާ ސެންޓްރަލް ހޮޓެލް މިއަދު ބަންދުކޮށްފިއެވެ.

"ސަން" އަށް އެނގިފައިވާ ގޮތުގައި މިއަދު އެ ހޮޓާ ބަންދު ކުރީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މި ފަހުން އާއްމު ކުރި ގަވާއިދުގެ ސަބަބުން އެ ހޮޓަލަށް ނުލިބޭ އާމްދަނީއެއް ޑޮލަރުގެ ގޮތުގައި މާރު ކުރަން ޖެހޭތީއެވެ.

ގަވާއިދުގައި ވާގޮތުން، ކެޓަގަރީ "އޭ"ގައި ހިމެނޭ ފަތުރުވެރިކަމުގެ ޚިދުމަތްދޭ ތަންތަނަށް އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު އެ މަހަށްފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ވާނެއެވެ. "އޭ" ކެޓަގަރީގައި ހިމެނެނީ ގްރީން ޓެކްސް ދައްކަންޖެހޭ ޓޫރިސްޓުން އަންނަ ތަންތަނުގެ ތެރޭގައި ހިމެނޭ ރާއްޖޭގައި ހިންގާ ޓޫރިސްޓު ރިސޯޓުތަކާއި އިންޓަގްރޭޓެޑް ޓޫރިސްޓު ރިޒޯޓުތަކާއި ރިޒޯޓު ހޮޓާތަކެވެ.

އެހެންކަމުން ޗަމްޕާ ސެންޓްރަލް ހޮޓާ ފެތެނީ 500 ޑޮލަރު މާރުކުރަން ޖެހޭ ކެޓަގަރީއަށެވެ.

ސެންޓްރަލް ހޮޓަލަކީ އާއްމުކޮށް އެއް ރެއަށް މަޑުކުރާ ފަތުރުވެރިންނަށް ޚާއްސަކޮށްގެން ހިންގާ ޓްރާންސިޓް ހޮޓަލެކެވެ. އެ ތަނުގެ ރޫމެއް ރެއަކަށް ވިއްކަނީ 50 ޑޮލަރާއި 60 ޑޮލަރާ ދޭތެރޭ އަގެއްގައެވެ.

"ސަން" އަށް އެނގިފައިވާ ގޮތުގައި މިހާރު އެ ހޮޓަލުން ފަތުރުވެރިންނަށް ހިދުމަތްދޭ މިންވަރަށް ބަލާއިރު އާ ގަވާއިދުގެ ދަށުން މަހެއްގެ މައްޗަށް ދެ ލައްކައެއްހާ ޑޮލަރު މާރު ކުރަން ޖެހެއެވެ. އެއީ ނުލިބޭ އާމްދަނީއިން ކުރަން ޖެހޭ އަދަދެކެވެ.

މެދުނުކެނޑި ހިންގާތާ 10 ވަރަކަށް އަހަރު ވެފައިވާ ޗަމްޕާ ސެންޓްރަލް ހޮޓަލުގައި ޖުމުލަ 80 ވަރަކަށް މުވައްޒަފުން މަސައްކަތް ކުރާއިރު އޭގެ ތެރެއިން 50 މީހުންނަކީ ދިވެހީންނެވެ.

ބޭރު ފައިސާއާ ބެހޭ ގަވާއިދުގެ ދަށުން ރަޖިސްޓްރީވާން ހުޅުވާލުމުން ރާއްޖޭގައި ހިންގާ 174 ރިސޯޓްގެ ތެރެއިން 173 ރިސޯޓުން ވަނީ ރަޖިސްޓާ ވެފައެވެ.

ނަމަވެސް ބޮޑެތި ބްރޭންޑްތައް ހިމެނޭގޮތަށް އެތައް ރިސޯޓަކުން އަންނަނީ އެ ގަވާއިދުގެ ދަށުން ޑޮލަރު މާރު ކުރަން ދަތިކަން އެމްއެމްއޭއަށް އަންގަމުންނެވެ.