އަނިޔާވި މީހުންނަށް ކާރުކޮޅު ދެއްވާފައި ފައިސަލް ހުންނެވީ އެހީވާން

މާލެއިން ހުޅުމާލެއަށް ދަތުރުކުރަނިކޮށް ބުރިޖު ހައިވޭ މަތީގައި ރޭ ހިނގި އެކްސިޑެންޓުގައި އަނިޔާވި ފަސް މީހުންނަށް ކުރީގެ ނައިބު ރައީސް ފައިސަލް ނަސީމް އެހީވާ މަންޒަރު ފެންނަ ވީޑިއޯއެއް މީސްމީޑިއާގައި މިއަދު ދައުރުވާން ފަށައިފިއެވެ.

ތިން ސައިކަލު ޖެހި ބުރިޖު މަތީގައި އެކްސިޑެންޓެއް ހިނގީ ރޭ 12:11 އެހާކަންހާއިރެވެ. އެކްސިޑެންޓުގައި ފަސް މީހަކަށް އަނިޔާވިއެވެ.

އެކްސިޑެންޓު ހިނގިއިރު އެ ސަރަހައްދުގައި ހުރި މީހަކު 'ސަން'އަށް މައުލޫމާތު ދިން ގޮތުގައި އެކްސިޑެންޓު ހިނގީ ކުރީގެ ނައިބު ރައީސް ފައިސަލް މާލެއިން ހުޅުމާލެއަށް ވަޑައިގަންނަވަނިކޮށެވެ. އެކްސިޑެންޓުވި މަންޒަރު ފެނުމުން ފައިސަލް ކާރުން ނުކުމެ، އެ މީހުންނަށް އެހީވާ މަންޒަރު ފެންނަ ފޮޓޯއާއި ވީޑިއޯތައް މީސްމީޑިއާގައި އަންނަނީ ދައުރުވަމުންނެވެ.

މައުލޫމާތު ދިން މީހާ ބުނި ގޮތުގައި އެކްސިޑެންޓުގައި އަނިޔާވީ ދެ އަންހެނުންނާއި ތިން ފިރިހެނުންނަށެވެ. އަނިޔާވި ތަނުން އެއް އަންހެނަކީ މާބަނޑު މީހެކެވެ.

އެ ވަގުތު އެ ސަރަހައްދުގައި، އެކްސިޑެންޓުވި މީހުންނަށް އެހީވާން ހުންނެވި ފައިސަލް ވަނީ އޭނާގެ ކާރުކޮޅުގައި ދެ އަންހެނުން ވެސް ހުޅުމާލޭ ހޮސްޕިޓަލަށް ފޮނުވައިފައެވެ. ދެން އަނިޔާވި ތިން މީހުން ހޮސްޕިޓަލަށް ފޮނުވާލީ ޓެކްސީގައެވެ.

އެކްސިޑެންޓްވި މީހުންނަށް ކުރީގެ ނައިބު ރައީސް ފައިސަލް އެހީތެރިވަނީ --- ފޮޓޯ/ ސޯޝަލް މީޑިއާ

މަންޒަރު ދުށް މީހާ ބުނި ގޮތުގައި ފައިސަލް ވަނީ އެ މީހުން ހުޅުމާލޭ ހޮސްޕިޓަލަށް ފޮނުވާލުމަށް ފަހު، އެ މީހުންގެ ހާލު ބައްލަވާލައްވަން ޓެކްސީއެއްގައި ހުޅުމާލޭ ހޮސްޕިޓަލަށް ވަޑައިގެންފައެވެ.

މާބަނޑު އަންހެނަކަށް އަނިޔާވިކަން ފުލުހުން ކަށަވަރުކޮށްދީފައެއް ނުވެއެވެ.

ފުލުހުން ބުނީ، އެކްސިޑެންޓުގައި އަނިޔާވި ފަސް މީހުންގެ ތެރެއިން ހަތަރު މީހަކަށް ހުޅުމާލޭ ހޮސްޕިޓަލުން ފަރުވާދިނުމަށް ފަހު މިހާރު ދޫކޮށްލާފައިވާ ކަމަށެވެ. އެކަކަށް އަދިވެސް ޓްރީޓޮޕް ހޮސްޕިޓަލުގައި ފަރުވާދެމުން އަންނައިރު އޭނާގެ ހާލު ސީރިއަސް ނޫން ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.

ފުލުހުން ބުނި ގޮތުގައި މި އެކްސިޑެންޓު ހިނގަން މެދުވެރިވީ ސައިކަލު އޯވާޓޭކް ކުރަން އުޅުމުގެ ތެރޭގައި ދެ ސައިކަލު ޖެހި، ފަހަތުން އައި އެހެން ސައިކަލެއް ވެސް ޖެހިގެންނެވެ. ގަވާއިދާ ހިލާފަށް ދުއްވި ސައިކަލު މިހާރު ޓޯކޮށްފައިވާ ކަމަށް ފުލުހުން ބުންޏެވެ.

https://sun.mv/182854

ފުލުހުން އަންނަނީ އެކްސިޑެންޓުގެ މައްސަލަ ތަހުގީގުކުރަމުންނެވެ.

ފާހަގަކޮށްލެވޭ ގޮތުގައި މީގެ ކުރީގައި ވެސް މަގުމަތީގެ އެކްސިޑެންޓުތަކުގައި މި ގޮތަށް އަނިޔާވާ މީހުންނަށް ފައިސަލް އެހީވެވަޑައިގަންނަވާ މަންޒަރުތައް މީސްމީޑިއާގައި އާންމުވެފައިވެއެވެ.

އިޖުތިމާއީ ދާއިރާއިން ގިނަ ޚިދުމަތްތަކެއް ކޮށްދެއްވާފައިވާ ފައިސަލަކީ އެކްސިޑެންޓުތައް މަދު ކުރުމާއި ރޯޑް ސޭފްޓީއަށް ވަރަށް ގިނަ މަސައްކަތްތަކެއް ކޮށްދެއްވާފައިވާ ބޭފުޅެކެވެ. އޭނާ ވަނީ މީގެ ކުރިން އުފަން ރަށް ޏ. ފުވައްމުލަކުގައި އަމިއްލަ ޚަރަދުގައި ބަންޕަރުތަކެއް ވެސް ގާއިމުކޮށްފައެވެ. އަދި، އަމިއްލަ ޚަރަދުގައި ރޯޑް ސޭފްޓީގެ އެތައް ޕްރޮގްރާމެއް ވެސް ހިންގާފައިވެއެވެ.

މީގެ ކުރިން ހިނގި ބައެއް އެކްސިޑެންޓުތައް ހިނގި ވަގުތު ވެސް ފައިސަލް ވަނީ އެހީތެރިކަން ފޯރުކޮށްދީފައެވެ. އެގޮތުން، 2019 ވަނަ އަހަރު މީހަކު މިސްކިތަށް ވެއްޓުނު މީހަކު ވެސް ފައިސަލްގެ ކާރުކޮޅުގައި ހޮސްޕިޓަލަށް ގެންގޮސްދެއްވާފައިވެއެވެ.