އާދަޔާޚިލާފަށް ކާށިދޫއަށް ގިނަ އަދަދެއްގެ ފުޅަނގި އަރައިފި

އާދަޔާޚިލާފަށް ގިނަ އަދަދެއްގެ ފުޅަނގި މިއަދު ހެނދުނު ކ. ކާށިދޫ ގޮނޑުދޮށަށް އަރައިފިއެވެ.

"ސަން"އަށް މައުލޫމާތު ދެމުން އެ ރަށު މީހަކު ކިޔައިދިން ގޮތުގައި ފުޅަނގި އަރަން ފެށީ މިއަދު ހެނދުނުގެ ވަގުތުގައި އެ ރަށުގެ ފުށްޓަރު ފަރާތުންނެވެ.

އެކަން އެންމެ ފުރަތަމަ އެނގުނީ މަސްބާނަން ތިބި ދެ މީހަކު އެކަން ރަށު މީހުންގެ ސަމާލުކަމަށް ގެނައި ހިސާބުން ކަމަށް އޭނާ ބުންޏެވެ. އެއާއެކު އެކި އުމުރުގެ މީހުން ވަނީ އެ ތަނަށް ފުޅަނގި ހޮވުމަށް އެއްވެފައެވެ.

ކާށިދޫ ފުށްޓަރު ފަރާތަށް އަރާފައިވާ ފުޅަނގިތައް --

ބައެއް މީހުން ގޯންޏާއި، ތެޔޮ ހުސްކުރި ހަމުގެ އިތުރުން ބޮޑެތި ކޮތަޅު ފުރެންދެން ފުޅަނގި ހޮވައިފައިވެއެވެ.

މީގެ ކުރިން ވެސް ހުޅަނގު މޫސުމާ ދިމާކޮށް އެ ރަށަށް ފުޅަނގި އަރާކަމަށް އެ މީހާ ކިޔައިދިނެވެ. ނަމަވެސް, މިއަދު އެ ރަށަށް ފުޅަނގި އަރާފައިވަނީ މީގެ ކުރިން ނާރާ ވަރަކަށް ކަމަށް އޭނާ ބުންޏެވެ.

ކާށިދޫ ފުށްޓަރު ފަރާތުގައި ފުޅަނގި ހޮވަނީ --

އެ މީހާ ކިޔައިދިން ގޮތުގައި އެ ރަށަށް ފުޅަނގި މަދުމަދުން އަރާތާ މިހާރު ދެ ހަފުތާ ވަރު ވެދާނެއެވެ. ނަމަވެސް, މިއަދު ހެނދުނު އަރާފައިވަނީ އާދަޔާ ޚިލާފަށް ގިނަ އަދަދަކަށް ކަމަށް ބުންޏެވެ.

މިއަދަކީ ހުކުރު ދުވަހަށްވެފައި ގިނަ އަދަދެއްގެ މީހުން އެ ތަނުން ފުޅަނގި ހޮވުމަށް ގޮސްފައިވެއެވެ.

އާންމުގޮތެއްގައި ގަރުދިޔަ ކައްކައިގެންނާއި، ތެލުލައިގެން ފުޅަނގި ކައި އުޅެއެވެ.