ގޫގުލް ބީމް ޓެކްނޮލޮޖީއާއެކު 3ޑީ ވީޑިއޯ ޗެޓްގެ ޚިދުމަތް ގޫގުލްއިން ތައާރަފު ކޮށްފިއެވެ.
ގޫގުލްގެ އައު ޓެކްނޮލޮޖީ "ގޫގުލް ބީމް"އަކީ ވީޑިއޯ ޗެޓްތައް މުޅިން އާ ފެންވަރަކަށް ގެންދިއުމަށް ފަރުމާކުރެވިފައިވާ އިންޤިލާބީ ޓެކްނޮލޮޖީއެކެވެ. މި ޓެކްނޮލޮޖީއަކީ ކުރިން "ގޫގުލް ސްޓާލައިން"ގެ ނަމުގައި ތަޢާރަފުކުރި ޓެކްނޮލޮޖީގެ ތަރައްޤީކުރެވިފައިވާ ވާޝަނެކެވެ.
ގޫގުލްގެ އަހަރީ I/O ޑިވެލޮޕާ ކޮންފަރެންސްގައި ތައާރަފު ކުރި މި ޓެކްނޮލޮޖީއަކީ ދުރުގައި ތިބެގެން ބައްދަލުވުންތައް ބޭއްވުމުގައި ހަޤީޤީ ބައްދަލުވުމެއްގެ އިޙުސާސް ގެނެސްދިނުމަށް ފަރުމާކުރެވިފައިވާ ޓެކްނޮލޮޖީއެކެވެ.
ގޫގުލް ބީމްގެ މައިގަނޑު ޓެކްނޮލޮޖީއަކީ ހަ ކެމެރާގެ އެރޭއެއް ބޭނުންކޮށްގެން މީހާގެ ތަފާތު އެންގަލްތަކުން ފޮޓޯނަގައި، އޭއައި ވީޑިއޯ މޮޑެލްއެއް މެދުވެރިކޮށް ރިއަލްޓައިމްކޮށް 3ޑީ މަންޒަރެއް އުފެއްދުމެވެ.
މި ސިސްޓަމްގައި ހިމެނެނީ މިލިމީޓަރެއްގެ ފަރަގުގައި ސިކުނޑީގެ ހަރަކާތްތައް ޓްރެކްކުރެވޭ ޓެކްނޮލޮޖީއެކެވެ. އަދި ސިކުންތަކަށް 60 ފްރޭމްގެ މަތީ ފެންވަރުގެ ވީޑިއޯ ފޯރުކޮށްދޭއިރު، މި ޓެކްނޮލޮޖީގެ ސަބަބުން ވީޑިއޯ ކޯލްތަކުގައި ފެންނަ މަންޒަރުތައް ވަރަށް ސާފުކޮށް އަދި ޙަޤީޤީ ދުނިޔޭގައި ފެންނަ ގޮތަށް ފެންނާނެއެވެ. މީގެ ސަބަބުން ދުރުގައި ތިބެގެން ބާއްވާ ބައްދަލުވުންތަކުގައި ބައިވެރިވާ ފަރާތްތަކަށް އެއްތަނެއްގައި ތިބެގެން ވާހަކަދައްކާ ކަހަލަ އިޙްސާސެއް ކުރެވޭނެއެވެ.
މި ޓެކްނޮލޮޖީގެ އެންމެ ޚާއްޞަ ކަމަކީ ލައިޓް ފީލްޑް ޑިސްޕްލޭއެއް ބޭނުންކުރުމުން (ހެޑްސެޓް ފަދަ) އެއްވެސް ޚާއްޞަ އާލާތެއް ނުލައި ބޭނުންކުރެވޭ ގޮތަށް ހުރުމެވެ.
ސީނެޓްގެ ރިޕޯޓަރެއް މި ޓެކްނޮލޮޖީ ވަޒަންކުރުމަށްފަހު ބުނެފައިވަނީ މިއީ އޭނާ މިހާތަނަށް ދުށް އެންމެ ހޮލޮގްރާމްއާ އެއްގޮތް ޓެކްނޮލޮޖީ ކަމަށެވެ.
މި ޓެކްނޮލޮޖީގެ އަނެއް ޚާއްޞަ ކަމަކީ ގޫގުލް މީޓްގައި ތަޢާރަފުކޮށްފައިވާ ސްޕީޗް ޓްރާންސްލޭޝަން، ފީޗާ ބީމްގައިވެސް ހިމެނިދާނެ ކަމަށް ގޫގުލްއިން ބުނެފައިވުމެވެ. މިއީ ތަފާތު ބަސްތަކުން ވާހަކަދައްކާ މީހުންނަށް ވީޑިއޯ ކޯލްތަކުގައި ފަސޭހައިން މުވާސަލާތުކުރުމަށް އިތުރު ފުރުޞަތުތަކެއް ހުޅުވޭނެ ކަމެކެވެ.
ގޫގުލް ބީމްގެ މަޤްޞަދަކީ ވީޑިއޯ ކޯލްތަކުގައި ދިމާވާ ގޮންޖެހުންތައް ޙައްލުކުރުމެވެ. މީގެ ތެރޭގައި މޫނުމަތީގެ ކުލަވަރާއި އިޝާރާތްތައް ކިޔަން އުނދަގޫވުމާއި، ލޮލާ ލޯ ބައްދަލުނުވުމާއި، "ޒޫމް ފެޓީގް" ފަދަ މައްސަލަތައް ހިމެނެއެވެ. ބީމްގެ ޓެކްނޮލޮޖީއަކީ މި ހުރިހާ މައްސަލައެއް ޙައްލުކޮށްދޭނެ، އިންސާނުން ސީދާ ބައްދަލުވާ ކަހަލަ އިޙްސާސެއް ގެނެސްދޭނެ ޓެކްނޮލޮޖީއެކެވެ.
ގޫގުލްއިން މި ޓެކްނޮލޮޖީ ވިޔަފާރީގެ ގޮތުގައި ތަޢާރަފުކުރުމަށް ވަނީ HPއާ ގުޅިފައެވެ. އަދި ޒޫމްގެ އިތުރުން އެހެނިހެން އޯޑިއޯ ވިޝުއަލް ކުންފުނިތަކާއެކު ވެސް މަސައްކަތްކުރަމުންދެއެވެ.
ފުރަތަމަ ބީމް ޑިވައިސްތައް 2025ގެ ފަހުކޮޅުގައި އާލީ އެޑޮޕްޓަރުންނަށް ލިބެން ފަށާނެކަމަށް ގޫގުލްއިން ބުނެއެވެ. މި ޓެކްނޮލޮޖީ ފުރަތަމަ ބޭނުންކުރާނީ ބޮޑެތި ޖަމާޢަތްތަކުން ވީޑިއޯ ކޮންފަރެންސިން އައު ގޮތަކަށް ގެންދިއުމަށެވެ.
ގޫގުލްއިން މި ޓެކްނޮލޮޖީއާ ބެހޭ އިތުރު މަޢުލޫމާތު ޖޫން މަހުގައި ބޭއްވޭ އިންފޯކޮމް އޯޑިއޯ ވިޝުއަލް ޓެކްނޮލޮޖީ އެގްޒިބިޝަންގައި ވެސް ހިއްސާކުރާނެކަމަށް ބުނެފައިވެ އެވެ.
ސައިންސް ފިކްޝަން ފިލްމުތަކުގައި ފެންނަ ހޮލޮގްރާމް ކޮމިއުނިކޭޝަން ސިސްޓަމްތަކާ އެއްގޮތް މި ޓެކްނޮލޮޖީއަކީ ސްޓާ ވޯޒްގެ "ޕްރިންސެސް ލީއާ ހޮލޮގްރާމް"އަށްވުރެ މާ ތަރައްޤީވެފައިވާ، ޓެކްނޮލޮޖީއެކެވެ.
ގޫގުލްއިން މި ޓެކްނޮލޮޖީއަށް "މެޖިކް ވިންޑޯ"ގެ ނަމުން ނަންދީފައިވާއިރު، މި ޓެކްނޮލޮޖީއަކީ ވާޗުއަލުކޮށް މުވާސަލާތުކުރުމުގެ ދާއިރާގައި ބޮޑު އިންޤިލާބެއް ގެނެސްދޭނެ ޓެކްނޮލޮޖީއެއް ކަމަށް ބެލެވެ އެވެ.