އިދިކޮޅު އެންމެ ބޮޑު ޕާޓީ އެމްޑީޕީއަށް 20 އަހަރު ފުރުން ފާހަގަކުރުމުގެ ގޮތުން ހުކުރު ދުވަހުގެ ހަވީރު ބާއްވާ 'ރަންރީނދޫ' ދުވުމަކީ ހުރިހާ ރައްޔިތުންނަށް ހުޅުވާލައިގެން، އުމުރުން ދުވަސްވީ މީހުންނާއި ޚާއްސަ އެހީއަށް ބޭނުންވާ މީހުންނަށް ވެސް ފުރިހަމަ އިންތިޒާމްތަކާއެކު ކުރިއަށް ގެންދާނެ ދުވުމެއް ކަމަށް ވިދާޅުވެ, އެ ދުވުމުގައި އެންމެން ވެސް ބައިވެރިވުމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ މިރޭ ދައުވަތު ދެއްވައިފިއެވެ.
އެމްޑީޕީގެ 'ރަންރީނދޫ' ދުވުން އެންމެ ފުރަތަމަ ބާއްވަން ނިންމީ މިދިޔަ ހުކުރު ދުވަހެވެ.
ނަމަވެސް ހުޅުމާލެ ސެންޓްރަލް ޕާކުގައި ސިޔާސީ ހަރަކާތްތައް ކުރިއަށް ނުގެންދެވޭނެ ކަމަށް ބުނެ، ހުއްދަ ދީފައިނުވުމުގެ ސަބަބުން އެ ދުވުން މާލޭ މަޖީދީ މަގުގައި ބޭއްވުމަށް އެ ޕާޓީން ނިންމިއެވެ.
'ސަން' އަށް ދެއްވި އިންޓަވިއުއެއްގައި މާރިޔާ ވަނީ ދުވުން ބާއްވަން ސެންޓްރަލް ޕާކު ނުދިން މައްސަލައިގައި ނުރުހުން ފާޅުކުރައްވައިފައެވެ.
ތެދަށް ދަންނަވަންޏާ މިއީ ސިޔާސީ ހަރަކާތެއް ނޫން. މިއީ ދަންމަރެއް ހިފައިގެން އެމްޑީޕީން އޯގަނައިޒް ކޮށްގެން ރާއްޖޭގެ އެންމެން ބައިވެރިވެގެން ދުވެލުމެއް ދުވަން. މިއީ އިހުތިޖާޖެއް ވެސް ނޫން. އިހުތިޖާޖުކުރަންޏާ ކޮށްފަ ނުކުރާނެ ކަމެއް މިހާރަކު ނެތް. އެހާކަށް ހިސާބުގައި ކަންތައްތައް މިހުރީ، ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ
މާރިޔާ ސިފަކުރެއްވި ގޮތުގައި ރާއްޖެ މިނިވަންވިތާ 60 ވަނަ އަހަރު ފާހަގަކުރަމުންދާއިރު، އެމްޑީޕީއަށް 20 އަހަރު ފުރުމަކީ ވަރަށް ބޮޑު ކާމިޔާބީއެއް ކަމަށެވެ.
ބައްލަވާ ވެރިކަން ކުރާ ޕީއެންސީ އަދި މިއުޅެނީ 2 އަހަރު ނުވެގެން އަނެއްހެން ބުނާނަމަ ޕާޓީ [ވަކިން] ތެދުވިތާ. އެތައް ބައެއްގެ ސޮއި މިނިސްޓަރުންގެ ކޮޓަރިކޮޅުގައި ތިއްބަވައިގެން ޖައްސަވައިގެން ގިނަ މީހުން ހަމަކުރައްވައިގެން އުޅުއްވިޔަސް އެމްޑީޕީއަކީ އަބަދުވެސް އޮތް ޕާޓީއެއް. ﷲ އިރާދަކުރެއްވިއްޔާ މި 20 އަހަރުތެރޭ ވެރިކަމަށް އާދެވިއްޖެ އަދި ރަނގަޅު ޚިދުމަތްތަކެއް ރައްޔިތުންނަށް ދެވިއްޖެ، ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ
މާރިޔާ ވިދާޅުވީ ''ރައީސް ޑރ. މުހައްމަދު މުއިއްޒު، އެމްޑީޕީއަށް ސެންޓްރަލް ޕާކު ދުވަން ނުދިން ނަމަވެސް'' މާލޭގެ މަޖީދީ މަގުގައި އެ ދުވުން ބާއްވާނެ ކަމަށެވެ. އެގޮތުން މިމަހުގެ 25 ވާ ހުކުރު ދުވަހުގެ ހަވީރު 16:00ގައި އާޓިފިޝަލް ބީޗުން ސަރަހައްދުން އެ ދުވުން ފަށައި ސޯޝަލް ސެންޓަރާ ހަމައަށް މަޖީދީމަގުން ދުވުން ބާއްވާނެ ކަމަށް އޭނާ ވިދާޅުވިއެވެ.
މާރިޔާ ވިދާޅުވި ގޮތުގައި ދުވުމެކޭ ބުނިނަމަވެސް އެއީ ހުރިހާ އެންމެންނަށް ބައިވެރިވެވޭ ގޮތަށް ބާއްވާ ހަރަކާތެކެވެ. އުމުރުން ދުވަސްވީ މީހުންނާއި ޚާއްސަ އެހީތެރިކަމަށް ބޭނުންވާ މީހުންނަށް ވެސް އެ ދުވުމުގައި ބައިވެރިވެވޭ ގޮތަށް އިންތިޒާމްތައް ހަމަޖެހިފަ ހުންނާނެ ކަމަށް ވިދާޅުވެ، މާރިޔާ ވަނީ އެ ދުވުމުގައި ބައިވެރިވުމަށް އެންމެންނަށް ދައުވަތު އަރުވައިފައެވެ.
އެމްޑީޕީގެ 20 ވަނަ އަހަރީ ދުވަހުގެ ޝިއާރަކީ "އެކުގައި ގަދަކޮށް"އެވެ. މި ދުވަސް ފާހަގަކުރުމަށް ޓަކައި މުޅި އަހަރަށް ބަހާލައިގެން ހަރަކާތްތަކެއް ކުރިއަށް ގެންދަން ނިންމައި، އެމްޑީޕީން ވަނީ ދިދަ ނެގުމާއި ކޭކު ފެޅުމުގެ ހަރަކާތެއް ކުރިއަށް ގެންގޮސް ފުޓްސަލް މުބާރާތެއް ވެސް ބާއްވައިފައެވެ.