ލާމަރުކަޒީ ގާނޫނަށް ގެންނަށް ހުށަހަޅައިފައިވާ އިސްލާހު ދިފާއު ކުރައްވައި، ނިޒާމު އަލިފުން ޔާއަށް އެނގޭކަމަށާއި މި އިސްލާހަކީ ރައްޔިތުންނަށްޓަކައި ގެންނަވާ އިސްލާހެއް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ރައީސް މިފަދައިން ވިދާޅުވީ، ބ. ދަރަވަންދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުގެ ފަރާތުން ވަނީ ފަސް އިސްލާހެއް ހުށަހަޅައިފައެވެ. ބިލުގައިވާ އިސްލާހުގައިވާ ގޮތުން ނަމަ ސަރުކާރުން ރައްޔިތުންނަށް ފޯރުކޮށްދޭ އަސާސީ ޚިދުމަތެއް ފޯރުކޮށްދިނުމުގެ ބޭނުމަށް އެކި ފަރާތްތަކަށް ދޫކޮށްފައިވާ ބިމުން ނުވަތަ އިމާރާތުން ކުއްޔެއް ނުނެގޭނެއެވެ. އަދި ކައުންސިލްތަކަށް އާމްދަނީ ދޫކުރަންވާނީ އެއްވެސް ގާނޫނެއްގެ ދަށުން ދައުލަތަށް ދައްކަންޖެހޭ އެއްވެސް ޓެކުހެއް ވާނަމަ އެ ޓެކުހަކަށްވާ ފައިސާއާއި، އާންމު ޚިދުމަތަކަށް ކައުންސިލްތަކުން ދައްކަންޖެހޭ ފައިސާއެއް ނުދައްކާތާ ހަ މަހަށްވުރެ ގިނަ ދުވަސްވެފައިވާނަމަ، އެ ފައިސާއެއް އުނިކުރުމަށްފަހު ބާކީވާ އަދަދެކެވެ.
އަދި ކައުންސިލްތަކުން ހުޅުވާފައިވާ ބޭންކު އެކައުންޓުތައް ބަލަހައްޓަންވާނީ ފިނޭންސް މިނިސްޓްރީން ކަނޑައަޅާ އުސޫލާ އެއްގޮތަށް ކަމަށާއި، އެ އެކައުންޓުތަކުގެ ސްޓޭޓްމަންޓެއް ހޯދުމަށް އެ މިނިސްޓްރީން އެދިއްޖެ ހާލަތުގައި އެ މައުލޫމާތު ފޯރުކޮށްދޭންޖެހޭނެ ކަމަށް އިސްލާހުގައިވެއެވެ.
މީގެ އިތުރުން އިސްލާހުގައި ވަނީ ލޯކަލް ކައުންސިލްތަކުގެ އުމުރު ގާނޫނުއަސާސީގައި ބަޔާންކޮށްފައިވާ ގޮތުގެ މަތިން ހަމަވުމާ ދެމެދު އަހަރު ދުވަހެއް ނުވަތަ އެއަށްވުރެ ކުރު މުއްދަތެއްނަމަ، ފިނޭންސް މިނިސްޓްރީ އާއި ލޯކަލް ގަވަމަންޓް އޮތޯރިޓީ (އެލްޖީއޭ)އިން ކަނޑައަޅާ އުސޫލުގެ ދަށުން މެނުވީ ބައެއް ކަންކަން ނުކުރުމަށެވެ.
ރައީސް ވިދާޅުވީ، މި ހުރިހާ އިސްލާހަކީ ވެސް ރައްޔިތުންނަށްޓަކައި ގެންނަ އިސްލާހުތަކެއް ކަމަށެވެ.
"އެއް އިސްލާހަކީ މިހާރު ބައެއް ކައުންސިލްތަކުން އުފައްދާފައި އެބަހުރި ކައުންސިލްތަކަށް އުފެއްދޭނެ ކުންފުނި، ލޯކަލް އޮތޯރިޓީ ކޮމްޕެނީ. މި ލޯކަލް އޮތޯރިޓީ ކޮމްޕެނީތަކުން އެބަ ހިންގާ ރަށްރަށުގެ އާންމު ފަރުދުން ހިންގާ ކުދި ވިޔަފާރިތައް. ކަންމަތީ ފިހާރަ ނޫނީ އެފަދަ ކަންކަމުގެ ތެރެއަށް އެބަ ވަދޭ. އެހެން ހެދީމައި ރަށުގެ އާންމު ރައްޔިތުންގެ މުއްސަނދިކަމަސް އޮތް މަގުތަކަސް އެ ހުރަސްއެޅެނީ،" ރައީސް ޑރ. މުހައްމަދު މުއިއްޒު
ރައްޔިތުންނަށް އާންމު ޚިދުމަތްތައް ދިނުމަށް ބިން ދޫކުރުމަށްފަހު ބައެއް ކައުންސިލްތަކުން އެ ބިމަށް ވަރަށް ބޮޑު ކުއްޔެއް ނަގާކަން ފާހަގަކުރައްވައި ރައީސް ވިދާޅުވީ، މިހެން މިކަން ކުރުމުން ރައްޔިތުންނަށްދޭ ޚިދުމަތުގެ އަގު ބޮޑުވާ ކަމަށެވެ.
ރައީސް ވިދާޅުވީ، ކައުންސިލްތަކަށް ލިބޭ އާމްދަނީން ޓެކްސް ވެސް ނުދައްކާ ކަމަށެވެ. މި އިސްލާހުގެ ސަބަބުން ޓެކްސް ދައްކަން މަޖުބޫރުވާނެ ކަމަށާއި އެކަމުގެ ފައިދާ ވެސް ކުރާނީ ރައްޔިތުންނަށް ކަމަށް ރައީސް ވިދާޅުވިއެވެ.
"ހަތަރުވަނަ އިސްލާހަކީ ކައުންސިލްތަކުގެ އެކައުންޓުތަކުގައި އެ ހުންނަ ފައިސާ ހާމައެއް ނުކުރޭ. ގިނަ ކައުންސިލްތަކުން. ރައްޔިތުންނަށް ވެސް ހާމަނުކުރަނީ އެލްޖީއޭއަށް އަދި އަމުދުން ހާމަ ނުކުރަނީ،" ރައީސް ޑރ. މުހައްމަދު މުއިއްޒު
މިއީ ދެފުށްފެންނަ ގޮތެއް ނޫންކަމަށާއި މިކަން ކައުންސިލްތަކުން ނުކުރާތީ އެންމެފަހުން ގާނޫނުގައި ލިޔެގެން މިކަން ކުރުވަން ޖެހުނީ ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ، އިންތިޚާބުތަކާ ކައިރިކޮށްފައި ފައިސާތަކެއް ޚަރަދުކޮށް ބައެއް ކައުންސިލްތަކުން ރަށުގެ ތަރައްގީގައި ނެތް މަޝްރޫއުތަކެއް ފެށުމަކީ ސިޔާސީ ބޭނުމެއްގައި ކުރާކަމެއް ކަމަށެވެ. އެހެންކަމުން މިކަން ވެސް ހުއްޓުވަން ޖެހޭކަމަށް އެމަނިކުފާނު ވިދާޅުވިއެވެ.
"މިކަމުގައި ކޮބައިތޯ ރައްޔިތުން ބާރުވެރިކުރުވުން ނޫން ކަމެއް ޗެކް އެންޑް ބެލެންސް ގާއިމްކުރުން ނޫން ކަމެއް ގުޑް ގަވަނަންސް ނޫން ކަމެއް އަމިއްލަ ކުދި ވިޔަފާރިތައް ހިންގާ ފަރާތްތަކުގެ ވިޔަފާރިތއް ހިމާޔަތްކުރުން ނޫން ކަމެއް އަޅުގަނޑުމެން މި އިސްލާހުތަކުގެ ތެރެއިން ގެނެސްފައި؟ ނެތް،" ރައީސް ޑރ. މުހައްމަދު މުއިއްޒު
ލާމަރުކަޒީ ނިޒާމަށް މި ބަދަލުތައް ގެނައި ނަމަވެސް، މި ނިޒާމަކީ އެމަނިކުފާނު ގަބޫލުކުރައްވާ ނިޒާމެއްކަމަށާއި އެ ނިޒާމު ހިންގުމުގައި އަމަލީގޮތުން އުޅެފައިވާކަމަށް ރައީސް ވިދާޅުވިއެވެ.
"އަޅުގަނޑަށް އެނގޭ ލަމަރުކަޒީ ނިޒާމު އަލިފުން ޔާއަށް،" ރައީސް ޑރ. މުހައްމަދު މުއިއްޒު
ސަރުކާރުން ގެނައި މި އިސްލާހުތަކާ އިދިކޮޅު ފަރާތްތަކުން ވެސް ދެކޮޅެވެ. އަދި އެ އިސްލާހުތަކުގެ މަގުސަދަކީ ކައުންސިލްތަކަށް ލިބިދޭ ބާރުތައް ހަނިކޮށް، ސަރުކާރުން ކޮންޓްރޯލްކުރާ ބަޔަކަށް ކައުންސިލްތައް ހެދުންކަމަށް ތުހުމަތު ކޮށް އެމްޑީޕީން ވަނީ މި އިސްލާހު ތަސްދީގު ނުކުރުމަށް ގޮވައިލައިފައެވެ.
ގިނަ ކައުންސިލްތަކުން ވެސް މި ނިޒާމާ ދެކޮޅަށް ތެދުވެފައި ވަނިކޮށް މަޖިލީހުގެ ދައުރު ހަފުތާއަކަށް ދަންމާލަން މަޖިލީހުގެ ރިޔާސަތުން އިއްޔެ ހުށަހެޅުއްވިއިރު އެކަން ކުރީ ލާމަރުކަޒީ ގާނޫނަށް ބޮޑެތި ބަދަލުތަކެއް ގެނައުމަށް ކަމަށް, މަޖިލީހުގެ މެޖޯރިޓީ ޕާޓީ, ޕީއެންސީގެ ބައެއް މަޖިލިސް މެންބަރުން ވަނީ "ސަން"އަށް ވިދާޅުވެފައެވެ. އެ ދުވަހު މަޖިލީހުން ވަނީ އެގޮތަށް ދައުރު ދަންމާލަން ފާސްވެސް ކޮށްފައެވެ.