ފްލެޓް އަތުލި މައްސަލަ: "ކޯޓުން ވަކިގޮތެއް ނުނިންމާ، އާންމު އުސޫލުން ނަމަ މައްސަލަ ބަލައިގަތުން މިހާ ލަސްވެގެން ނުވާނެ"

އެފްޑީސީން އަޅާ ފުލެޓުތައް: ފްލެޓް އަތުލި މައްސަލައިގައި ވަގުތީ އަމުރަކަށް އެދި ހުށަހެޅި މައްސަލަ ބަލައިގަތުން ލަސްވާތީ ވަކީލު ވަނީ ކަންބޮޑުވުން ފާޅުކުރައްވާފައި -- ސަން ފޮޓޯ/ މާނިއު މުހައްމަދު

އެމްޑީޕީގެ ސަރުކާރުން "ގެދޮރުވެރިޔާ" ސްކީމްގެ ދަށުން ދޫކުރި 4،000 ފްލެޓުގެ ތެރެއިން އެ ސަރުކާރުން ކަނޑައެޅި ޝަރުތު ހަމަވެގެން ފްލެޓެއް ލިބިފައިވަނިކޮށް, ޝަރުތު ހަމަނުވާ ކަމަށް ބުނެ މި ސަރުކާރުން އެ ފްލެޓު ނުދޭން ނިންމައި, އެހެން މީހަކަށް އެތަން ދޭން ނިންމުމުން, އެކަން ހުއްޓުވައިދިނުމުގެ ވަގުތީ އަމުރަކަށް އެދި ސިވިލް ކޯޓަށް ހުށަހެޅި މައްސަލައަށް މިއަދަށް ހަފުތާއެއް ވީއިރު ވެސް ވަކިގޮތެއް ނުނިންމާކަން އެނގިއްޖެއެވެ.

ވަގުތީ އަމުރަކަށް އެދި ސިވިލް ކޯޓަށް އަމިއްލަ ފަރާތަކުން މި މައްސަލަ ހުށަހެޅީ މިދިޔަ ހަފުތާގެ ހޯމަ ދުވަހުގައެވެ. އެހެންކަމުން ކޯޓަށް މި މައްސަލަ ހުށަހެޅިތާ ހަފުތާއެއްވީއެވެ.

https://sun.mv/210094

އާންމު އުސޫލުން ނަމަ، މިފަދަ މައްސަލަތައް ބަލައިގަތުމާ މެދު ހަފުތާއެއް ތެރޭ ކޯޓުން ގޮތެއް ކަނޑައަޅައެވެ.

މި މައްސަލަ ހުށަހެޅި ފަރާތުން ވާހަކަދައްކަވަމުން ގާނޫނީ ވަކީލު މުހައްމަދު ނިޝާން "ސަން"އަށް ވިދާޅުވީ، މައްސަލަ ބަލައިގަތުމުގައި ހިފެހެއްޓުމެއް އެބައުޅޭ ކަމަށާއި މައްސަލަ ބަލައިގަތުމާ މެދު ކޯޓުން އަދި ވަކި ގޮތެއް ނުނިންމާ ކަމަށެވެ.

"ފުދޭވަރަކަށް ލަސްވުމެއް އެބަ އާދޭ ބަލައިގަތުމުގަ ވެސް، އެއަށް ގޮތެއް ކޯޓުން އަދި ނުނިންމާ، ހިފެހެއްޓުމެއް އެބަ އާދޭ، މި ވަގުތާ ހަމައަށް އައިއިރު ވެސް އަދި ބަލައިގެންކަން އަޅުގަނޑުމެންނަށް އަންގާފައެއް ނުވޭ، ބަލައިނުގަންނަކަން ވެސް އަންގާފައި ނުވޭ،" ނިޝާން ވިދާޅުވިއެވެ.

ސިވިލް ކޯޓުގައި މި މައްސަލަ ރަޖިސްޓްރީކުރުމާ ގުޅިގެން ކިތަންމެ ވަރަކަށް މަސައްކަތްކުރިޔަސް މައްސަލަ ކުރިއަށް ނުދާނެ ކަމަށް ސިޔާސީ އެކި ފަރާތްތަކުން ބުނަމުންދާ ކަމަށް އޭނާ ވިދާޅުވިއެވެ.

"އާންމު އުސޫލުންދާ ކަމަށްވާ ނަމަ މިހާ ލަސްވެގެނެއް ނުވާނެ،"

ސިވިލް ކޯޓު: ފުލެޓާ ގުޅޭ ވަގުތީ އަމުރާ މެދު އަދި ގޮތެއް ނުނިންމާ --

މިކަމާ ގުޅިގެން "ސަން"އިން ސުވާލުކުރުމުން ސިވިލް ކޯޓުގެ އޮފިޝަލަކު ވިދާޅުވީ، ދުވަހުން ދުވަހަށް ވަގުތީ އަމުރުގެ މައްސަލަތައް ކޯޓުން ބަލައިގަންނަ ކަމަށާއި ބައެއް މައްސަލަތައް ބަލައިގަތުމުގައި ލަސްތަކެއް އުޅެނީ މައްސަލައިގެ ބާވަތުން ސާފުކުރަން ޖެހޭ ނުވަތަ އިސްލާހުކުރަން ޖެހޭ މައުލޫމާތުތައް ހުރުމުން ކަމަށެވެ.

ނިޝާން ވިދާޅުވީ، ސިވިލް ކޯޓަށް މައްސަލަ ހުށަހެޅީ މައްސަލަ ހުށަހަޅާ ފޯމުގައި ހުރި ހުރިހާ ރުކުނެއް ފުރިހަމަކޮށް މައްސަލައާ ގުޅުންހުރި ހުރިހާ ލިޔެކިއުމަކާ އެކު ކަމަށެވެ.

މައްސަލަ ހުށަހެޅި ދުވަހު ސިވިލް ކޯޓު ހުންނަ ޖަސްޓިސް ބިލްޑިން ކުރިމަތީ ނޫސްވެރިންނާ ބައްދަލުކުރައްވައި ނިޝާން ވިދާޅުވި ގޮތުގައި ހުށަހެޅި މައްސަލައިގައި އެދިފައިވާނީ, އެކި މީހުންނަށް ކުރިން ދިން ފްލެޓުތައް އެހެން މީހުންނަށް ދޭން އުޅޭކަމުގެ މައުލޫމާތު ލިބިފައިވާތީ އެ މައްސަލައަށް ވަކި ގޮތެއް ނިމެންދެން އެކަން ހުއްޓުވައިދިނުމަށެވެ.

އެ މައްސަލަ ސިވިލް ކޯޓަށް ހުށަހެޅީ ފުލެޓު ލިބޭ މީހުންގެ ލިސްޓު އާންމުނުކޮށް، ފުލެޓުތައް ދެމުން ދަނިކޮށް ނަންތަކެއް ހޯލްޑުކުރުމުން އެކަމުގައި 'ވާނުވާގައި' ތިބެން ޖެހުމުގެ ކަންބޮޑުވުން ވެސް އޮތް ދަނޑިވަޅެއްގައެވެ.

ފުލެޓްތައް ދޫކުރަން އެއްބަސްވުމުގައި ސޮއިކުރުން: އެއްބަސްވުމުގައި ސޮއިކުރުން ކުރިއަށްދަނީ ހުޅުމާލޭ ސިންތެޓިކް ޓްރެކްގައި -- ފޮޓޯ/ އެފްޑީސީ

ކުރީގެ ރައީސް އިބްރާހީމް މުހައްމަދު ޞާލިޙްގެ ވެރިކަން ނިމެން ގާތްވެފައި ވަނިކޮށް 4،000 ފުލެޓު ހައްގުވާ މީހުންގެ ލިސްޓު ނެރުނުއިރު ވެސް އެންޓި ކޮރަޕްޝަން ކޮމިޝަން (އޭސީސީ)ން ވަނީ އެ ލިސްޓުގައި މައްސަލަ އުޅޭ ކަމަށް ބުނެ ފުލެޓު ދިނުން ހުއްޓުވައިފައެވެ. އަދި، މި ސަރުކާރުން ވެރިކަމާ ހަވާލުވެ، ލިސްޓު މުރާޖާކުރުމަށް ފަހު، އައު ލިސްޓު ނެރުނީ އަހަރަކަށް ވުރެ ގިނަ ދުވަސްވީ ފަހުން މިދިޔަ އަހަރުގެ ފެބްރުވަރީ މަހެވެ.

މި ފަހުން ފަހި ދިރިއުޅުން ކޯޕަރޭޝަން (އެފްޑީސީ)އާ ހަވާލުކޮށްގެން ފުލެޓު ލިބޭ މީހުންގެ އެއްބަސްވުމުގައި ވަނީ ސޮއިކުރަން ފަށައިފައެވެ. އެއީ މުޅި ލިސްޓު ނުނެރެއެވެ.

ފުލެޓު ލިބޭ މީހުންގެ ލިސްޓު އާންމުނުކޮށް، ފުލެޓުތައް ދެމުން ދަނިކޮށް ނަންތަކެއް ހޯލްޑުކުރުމުން އެކަމުގައި 'ވާނުވާގައި' ތިބެން ޖެހުމުގެ ކަންބޮޑުވުން ވަނީ މިފަހުން ބޮޑުވެފައެވެ. އެ މައްސަލައިގައި 100 މީހުން ވެސް ހަމަނުވާ އެ ލިސްޓުގައި ހިމެނޭ މީހުންގެ ފުލެޓު އެއްބަސްވުންތަކުގައި ސޮއިކުރުން ވެސް ވަނީ މެދުކަނޑައިލާފައެވެ.

އެއީ 76 ޕޮއިންޓަށް ވުރެ މަތިން މާކްސް ލިބިފައިވާ 301 މީހަކަށް ފްލެޓް ކަނޑައެޅުމަށްޓަކައި ގުރުއަތު ނުނަގައި، 75 މާކްސް ލިބުނު 315 މީހަކަށް ފްލެޓް ކަނޑައެޅުމަށްޓަކައި ގުރުއަތު ނަގައި އެ މީހުންނަށް ފުލެޓު ދީފައިވާކަން ފާހަގަކުރެވިފައިވާ މައްސަލައެއް ފެންމަތިވުމުން ކަމަށް ހައުސިން މިނިސްޓްރީން ބުނެއެވެ.

އެހެންވެ، ހައުސިން މިނިސްޓްރީން ނިންމީ 76 ޕޮއިންޓް ލިބި ގުރުއަތުން ބާކީވި މީހުންގެ ގުރު އަލުން ނަގައި، ފުލެޓު ދިނުމަށެވެ.

އެ މައްސަލަ ތަހުގީގު ކޮށްދިނުމަށް އެދި މިނިސްޓްރީން އޭސީސީއަށް ހުށަހަޅާފައިވަނީ މި މަހުގެ ހައެއްގައެވެ. އެ މައްސަލައިގައި ހިތްހަމެނުޖެހުން ފާޅުކޮށް، ހައުސިން މިނިސްޓްރީ ކުރިމަތީ ޕޮއިންޓު ލިބި ގުރުއަތުން ބާކީވި މީހުން ވަނީ ޖެހިގެން އައި ދުވަހު މުޒާހަރާ ވެސް ކޮށްފައެވެ.

މި މައްސަލައިގައި އަދިއަދަށް ދާންދެން ވެސް އޭސީސީގެ ބަހެއް ނުލިބެއެވެ.

comment ކޮމެންޓް