މިދިޔަ އަހަރު، ރެމިޓެންސްގެ ގޮތުގައި ބިދޭސީ މަސައްކަތްތެރިން ރާއްޖެއިން 144 މިލިއަން ޑޮލަރު ބޭރުކޮށްފައިވާ ކަމަށާއި، މިއީ 2023 އަަަށްވުރެ 59 ޕަސެންޓުގެ އިތުރުވުމެއް ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފިއެވެ.
އެމްއެމްއޭއިން ނެރުނު މިދިޔަ އަހަރުގެ ޕޭމަންޓު ބުލެޓިންގައިވާ ގޮތުން މިދިޔަ އަހަރު އައުޓްވާޑް ރެމިޓެންސްގެ ގޮތުގައި ޖުމްލަ 155.4 މިލިއަން ޑޮލަރު ބޭރަށް ފޮނުވައިފައިވެއެވެ. އައުޓްވާޑް ރެމިޓެންސަކީ އަމިއްލަ ގައުމުން، ބޭރުގައި ހުންނަ މީހަކަށް ނުވަތަ ކުންފުންޏަކަށް ނުވަތަ އެހެން ވެސް ބަޔަކަށް ފައިސާ ފޮނުވުމެވެ.
ރެމިޓެންސްގެ ގޮތުގައި އެންމެ ބޮޑު އަދަދެއްގެ ފައިސާ ރާއްޖޭން ބޭރުކުރަނީ ރާއްޖޭގައި މަސައްކަތްކުރާ ބިދޭސީންނެވެ. އެގޮތުން 92 ޕަސެންޓަކީ ބިދޭސީންނެވެ. އެގޮތުން މިދިޔަ އަހަރު ބިދޭސީ މަސައްކަތްތެރިން 143.5 މިލިއަން ޑޮލަރު ވަނީ ރާއްޖޭން ބޭރަށް ވަނީ ފޮނުވައިފައެވެ. މިއީ 2023 އަށްވުރެ 59 ޕަސެންޓު އިތުރު މިންވަރެކެވެ.
ބާކީ އަށް ޕަސެންޓަކީ ދިވެހީންނެވެ. އެގޮތުން 2023އަށްވުރެ ޖުމްލަ އަށް ޕަސެންޓު އިތުރަށް ދިވެހިން ވަނީ 11.9 މިލިއަން ޑޮލަރު މިދިޔަ އަހަރު ރާއްޖޭން ބޭރަށް ރެމިޓެންސްގެ ގޮތުގައި ފޮނުވައިފައެވެ.
ޖެހިޖެހިގެން ތިންވަނަ އަހަރަށް، މިދިޔަ އަހަރު ވެސް ރެމިޓެންސްގެ ގޮތުގައި ބޭރުކުރި ފައިސާގެ އެންމެ ބޮޑު އަދަދެއް ލިބިފައިވަނީ ބަންގްލަދޭޝް އަށެވެ. ބަންގްލަދޭޝަށް ޖުމްލަ 112 މިލިއަން ޑޮލަރު ލިބުނެވެ. ނުވަތަ އެއީ ބޭރުވި ރެމިޓެންސްގެ ޖުމްލަ 72 ޕަސެންޓެވެ.
ދެވަނައަށް ފަސް ޕަސެންޓު ހިއްސާއާއެކު އެންމެ ބޮޑު އަދަދެއް ލިބިފައިވަނީ ނޭޕާލަށެވެ. ފިލިޕީންސްއާއި މިސްރުން، ކޮންމެ ގައުމަކުން ހަތަރު ޕަސެންޓު ހިއްސާކުރެއެވެ.
އިންޑިއާއާއި ރާއްޖެއާ ދެމެދު އިގްތިޞާދީ ގުޅުން ރަނގަޅުވެ، މަސައްކަތްތައް ކުރެވެމުން ދިޔަ ނަމަވެސް އެ ގައުމަށް ލިބުނީ ރާއްޖޭން ބޭރުކުރި ޖުމްލަ ރެމިޓެންސްގެ އެންމެ ދެ ޕަސެންޓެވެ.