އުރީދޫ މޯލްޑިވްސްއިން ކ. ހުރާގައި ބޭއްވި މަސްރޭސް، ޓީމު 'ބާކީ' ކާމިޔާބުކޮށްފިއެވެ.
ގްރޭޓާ މާލެ ސަރަހައްދުން 19 ޓީމެއް ވާދަކުރި އެ މަސްރޭހުގެ ޗެމްޕިއަންކަން 'ބާކީ' ޓީމް ހޯދީ ޖުމްލަ 544.5 ޕޮއިންޓް ހޯދައިގެންނެވެ.
އުރީދޫން ބުނީ އެ މަސްރޭހަކީ ދިވެހީންގެ މެދުގައި މަގުބޫލުކަން ހޯދާފައިވާ، އެއްބައިވަންތަކަމާއި ސަގާފަތް ދައްކުވައިދޭ ހަރަކާތެއްކަމަށެވެ.
އެންމެ ބަރު މަސް ބޭނި މަސްވެރިއާ މަލާޒް --ފޮޓޯ/ އުރީދޫ
އެ މަސްރޭހުގެ ޗެމްޕިއަންކަން ހޯދި ޓީމް ބާކީއަށް 25،000 ރުފިޔާގެ އިނާމެއް ވަނީ ލިބިފައެވެ. ދެވަނަ މަގާމު ހޯދީ 489.8 ޕޮއިންޓާއެކު ޓީމް ނޮރާއެވެ. އެ ޓީމަށް 10،000 ރުފިޔާ ލިބުނެވެ.
ތިންވަނައިގައި އޮތީ 370 ޕޮއިންޓާއެކު ޓީމް އަނަންތަރާ އެވެ. އެ ޓީމަށް 5،000 ރުފިޔާގެ ފައިސާގެ އިނާމެއް ވަނީ ލިބިފައެވެ.
މި މަސްރޭހުގައި ޚާއްސަ އިނާމުތަކެއް ވެސް ދީފައިވެއެވެ.
އެންމެ މޮޅު ފިރިހެން މަސްވެރިޔާ ޒިޔާދު --ފޮޓޯ/ އުރީދޫ
އެންމެ ބަރު މަސް ބޭނި މަސްވެރިއަކީ ޓީމް އަނަންތަރާގެ މަލާޒްއެވެ. އޭނާ ބޭނި ފާނައެއްގެ ބަރުދަނަކީ 20.6 ކިލޯއެވެ.
އެންމެ މޮޅު ފިރިހެން މަސްވެރިޔަކަށް ހޮވުނީ ކްލަބް އެމްޓީސީސީގެ ޒިޔާދެވެ. އޭނާ 36 މަސް ބާނާފައިވާއިރު، ހައި ފިޝިން އިން ސްޕޮންސާކޮށްފައިވާ ޕީއައިއޯ އަލްޓިމޭޓް ސީ ސްޕިރިޓް/ގޭންގްސްޓާ (އެޗް/ޑީ) ދޮށްޓެއް ވަނީ ލިބިފައެވެ.
އެންމެ މޮޅު އަންހެން މަސްވެރިޔަކަށް ހޮވުނީ ސްޓެލްކޯ ކަނބަލުންގެ އަމީނާއެވެ. އޭނާ ހަތް މަސް ބާނާފައިވާއިރު، ހައި ފިޝިންއިން ސްޕޮންސާކޮށްފައިވާ ޕީއައިއޯ އަލްޓިމޭޓް ސީ ސްޕިރިޓް/ގޭންގްސްޓާރ (އެޗް/ޑީ) ދޮށްޓެއް ވަނީ ލިބިފައެވެ.
އެންމެ މޮޅު އަންހެން މަސްވެރިޔާ އަމީނާ --ފޮޓޯ/ އުރީދޫ
އުރީދޫން ބުނީ، މި އަހަރުގެ މަސްރޭސް ކުރިއަށްގެންދަނީ އުރީދޫއަށް 20 އަހަރު ފުރުން ފާހަގަކުރުމުގެ ގޮތުން ކަމަށެވެ.
އުރީދޫ މަސްރޭސް ހުރާގެ އިތުރުން ށ. ފުނަދޫގައި ވެސް ކުރިއަށްގެންދާނެއެވެ. މިއީ އުރީދޫ މަސްރޭސްގެ 16 ވަނަ އެޑިޝަނެވެ.