މިގެ ހަތަރު އަހަރުކުރިން ގއ. މާމެންދޫގައި ހިންގި ގުރޫޕު މާރާމާރީއެއްގައި އެރަށު ލިލީ އޮފްދަ ވެލީ، އަހްމަދު އުދައްޔު މަރާލުމުގައި ބައިވެރިވިކަމުގެ ދައުވާ ދެ މީހެއްގެ މައްޗަށް ސާބިތުވެ، އެކަކު އެ ދައުވާއިން މިއަދު ސަލާމަތްވެއްޖެއެވެ.
ފެބްރުއަރީ އަށެއް، 2021ގައި ހިނގި އެ މާރާމާރީގައި މަރުވި އުދައްޔުއަށް އޭރު 17 އަހަރެވެ. އޭނާގެ ބޭބެ، ފިރުޝާން ޒާހިރުގެ ބުރަކައްޓަށް ވެސް އެ ރޭ ތޫނު އެއްޗަކުން ހަމަލާދީފައިވެއެވެ.
ފިރުޝާނަށް ގއ. އަތޮޅު ހޮސްޕިޓަލާއި ގދ. ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލުން ފަރުވާ ދިނެވެ. އުދައްޔުއަށް ފަރުވާ ދެމުން ދަނިކޮށް އޭނާ މަރުވީއެވެ.
އެ މައްސަލައިގެ އަޑުއެހުމެއް މިއަދު ވަނީ ކްރިމިނަލް ކޯޓުގައި ބާއްވާފައެވެ.
އުދައްޔުގެ މަރުގެ މައްސަލައިގައި، އޭނާ މަރާލުމުގައި ބައިވެރިވިކަމުގެ ދައުވާ ދައުލަތުން ތިން މީހެއްގެ މައްޗަށް އުފުލިއެވެ. އެއީ ގއ. މާމެންދޫ، ރިހިފަރުދާގެ، އަހުމަދު ޝަމީމާއި، އެރަށު ބިލަތްމާގެ، ޝަރަފު ރަޝިދާއި، ހަމަ އެރަށު ގުލްފާމުގެ، މުހައްމަދު މާޒިންއެވެ.
ތޫނު އެއްޗެއް ބޭނުންކޮށްގެން އުދައްޔު ގަސްދުގައި މެރުމުގެ ކުށުގެ ދައުވާ ކުރީ ހާދިސާ ހިނގިއިރު 18 އަހަރުނުވާ ކުއްޖަކަށެވެ. ޖުވެނައިލް ކޯޓުގައި 2022ގައި އޭނާގެ މައްޗަށް ދައުވާ ސާބިތުވެ، 18 އަހަރާއި ނުވަ މަހަަށް ކުޑަކުދިން ބަންދުކުރާ މަރުކަޒެއްގައި ބަންދުކުރުމަށް ހުކުމް ވެސް ކުރިއެވެ.
މާރާމާރީ ހިންގި ސަރަހައްދުން މަރުވި އުދައްޔުގެ ހަށިގަނޑު ގެންދަނީ -----
މިއަދު ކްރިމިނަލް ކޯޓުގައި، އުދައްޔުގެ މަރުގައި ބައިވެރިވުމުގެ ދައުވާ ސާބިތުވީ މާޒިންއާއި ޝަމީމުގެ މައްޗަށެވެ.
ކްރިމިނަލް ކޯޓުގެ ހުކުމުގައި ވަނީ، ޢުދައްޔު މަރުވި ޙަމަލާ ދިނީ އޭރު އުމުރުން 18 އަހަރުނުވާ ކުއްޖާ ކަމަށްވީ ނަމަވެސް، އޭނާއާއެކު އެއް ޖަމާޢަތެއްގެ ގޮތަށް އެހީތެރިކަންދޭ އުޞޫލުން މާޒިނާއި ޝަމީމް ހަރަކާތްތެރިވި ކަމަށެވެ.
އެ ތިން މީހުން ރަށުގެ ކޭވަނެބެއްޔާ މަގާއި ކަތިއްބެއްޔާ މަގާ ގުޅުނު ހަތަރު އަނގޮޅީގައި އެކުގައި މާރާމާރީ ހިންގުމުގައި އުޅުމާއި، ވަޅި ނުވަތަ ތޫނު އެއްޗެއް ހިފައިގެން އެ ތިން މީހުން އެކުގައި ހަތަރު އަނގޮޅިއަށް ދުވެފައި ދިޔަކަން ހުކުމުގައިވެއެވެ.
ހުކުމުގައި ވަނީ، އެ ތިން މީހުން ޢުދައްޔާމެދު، މާރާމާރީ ހިންގުމުގައި އުޅެފައިވާކަން ފާހަގަކުރެވޭ ކަމަށާއި ޢުދައްޔު މަރާލުމުގައި މާޒިންއާއި ޝަމީމް ޢަމަލީގޮތުން ބައިވެރިވުމުގެ ޢަމަލުތަކެއް ކޮށްފައިވާ ކަމަށެވެ.
މާރާމާރީގައި އަނިޔާވި ފިރުޝާން ----
އެހެންވެ، ޤަޞްދުގައި މީހަކު މަރާލުމުގައި ބައިވެރިވީކަން ސާބިތުވާ ކަމަށް މާޒިންއާއި ޝަމީމްގެ މައްޗަށް ވަނީ ހުކުމްކޮށްފައެވެ.
އެ ހުކުމުގައި ވަނީ ޝަރަފުގެ މައްޗަށް ގަސްދުގައި މީހަކު މަރާލުމުގައި ބައިވެރިވުމުގެ ދަޢުވާ ސާބިތުނުވާ ކަމަށް ކަނޑައަޅައިފައެވެ.
އެއީ، މާރާމާރީ ހިންގި ވަގުތު ޝަރަފަށް ހުރެވުނު ސަބަބަކީ އޭނާ އިން ސައިކަލުގައި ފިރުޝާން ފައިން ޖަހައި ވައްޓައިލުމުން ކަމަށާއި ޢުދައްޔުއާ މާރާމާރީ ހިންގަމުންދިޔަ ވަގުތު ޝަރަފް ހިނގާފައި ގޮސް އެ ސަރަހައްދުގައި ހުރި ގެއަކަށް ވަތްކަން ހެކިތަކުން އެނގެން އޮތުމުން ކަމަށް ހުކުމުގައިވެއެވެ.
ޝަރަފު އަޙްމަދު ޢުދައްޔުއާމެދު އެއްވެސް މާރާމާރީއެއް ހިންގުމުގައި ބައިވެރިވެފައިވާ ކަމަށް އެއްވެސް ހެއްކަކު ބުނެފައި ނުވާ ކަމަށާއި އެހެންކަމުން ޝަރަފު ރަޝީދަށް މާރާމާރީ ހިނގި ސަރަހައްދުގައި އެ ވަގުތު ހުރެވިފައިވަނީ އެހެން މީހަކު ކުރި ޢަމަލެއްގެ ނަތީޖާއިން ކަމަށް ވުމާއި، އަޙްމަދު ޢުދައްޔުއާމެދު މާރާމާރީ ހިންގުމުގެ ގޮތުން މީނާ ކުރި އެއްވެސް ކަމެއް ނެތުމުން ޝަރަފު ރަޝީދުގެ މައްޗަށް ދަޢުވާ ސާބިތު ނުވާ ކަމަށް [ގާޒީ] ކަނޑައެޅުއްވިކްރިމިނަލް ކޯޓުގެ ހުކުމް
މި މާރާމާރީގައި އަނިޔާވި ފިރުޝާނާމެދު މާރާމާރީ ހިންގުމުގައި ބައިވެރިވުމުގެ ދަޢުވާ ވެސް ޝަމީމުގެ އުފުލާފައިވާއިރު، ފިރުޝާނާމެދު ހިންގި މާރާމާރީގައި ޝަމީމް ބައިވެރިވީ ކަމަށް އެއްވެސް ހެއްކަކު ބުނެފައި ނުވާތީ އެ ދަޢުވާ ޝަމީމުގެ މައްޗަށް ސާބިތު ނުވާ ކަމަށް ހުކުމުގައިވެއެވެ.
އެ މައްސަލައިގައި ދައުވާތައް ސާބިތުކުރުމުން ދެން އޮންނާނީ ވާރިސުންގެ ހެކިބަސް ނެގުމާއި އަދަބާ ގުޅިގެން ވާހަކަ ދެއްކުމާއި ޙުކުމް ކުރުމެވެ. އެކަމަށް އަންނަ މަހު އަޑުއެހުމެއް ތާވަލު ކުރާނެ ކަމަށް ހުކުމުގައިވެއެވެ.