ރާއްޖެ ޓްރާންސްޕޯޓު ލިންކް (އާރްޓީއެލް)ގެ ނަމުގައި މިދިޔަ ސަރުކާރުން ފެށި އާންމު ދަތުރުފަތުރުގެ ޚިދުމަތުގެ ލޯގޯއިން ރީނދޫ ކުލަ އުނިކުރަން ނިންމީ ޓްރާންސްޕޯޓު މިނިސްޓްރީން ކަމަށް އެ ޚިދުމަތްދޭ ކުންފުނި، އެމްޓީސީސީން މިއަދު ބުނެފިއެވެ.
މިދިޔަ ސަރުކާރުގައި އާރްޓީއެލްގެ ޚިދުމަތް ފެށިއިރު ލޯގޯގައި ހުރީ ރީނދޫ ކުލައާއި ގަދަ އަދި މަޑު ނޫ ކުލައެވެ.
އެކަމަކު، އެ ލޯގޯއަށް މި ސަރުކާރު އައި ފަހުން ބަދަލު ގެނައިކަން މީހުންގެ ސަމާލުކަމަށް އައި ބ. އަތޮޅުގައި އެ ޚިދުމަތް ފެއްޓުމަށް ފަހު އާންމުކުރި ފޮޓޯތަކުންނެވެ. އެއަށް ފަހު ގިނަ ބަޔަކު ވަނީ ލޯގޯއިން ރީނދޫ ކުލަ އުނިކޮށް، އަޅިކުލަ ހިމެނުމުން ފާޑުކިޔައިފައެވެ.
އެ ކަމާ ގުޅިގެން މީގެ ކުރިން 'ސަން'އިން ތަކުރާރުކޮށް ސުވާލުކުރުމުން ވެސް އެމްޓީސީސީން ޖަވާބެއް ދީފައެއް ނުވެއެވެ.
އެކަމަކު، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ގާނޫނީ ވަކީލު އަޙްމަދު މައުރޫފް އެދުނު މައުލޫމާތެއް ފޯރުކޮށްދެމުން އެމްޓީސީސީން ބުނީ، އެ ނިންމުން ނިންމާފައިވަނީ ޓްރާންސްޕޯޓު މިނިސްޓްރީން ކަމަށެވެ. ނަމަވެސް، ނިންމުން ނިންމި ސަބަބާ ގުޅޭ ގޮތުން އެ ކުންފުނިން އެއްވެސް އެއްޗެއް ބުނެފައެއް ނުވެއެވެ.
އެ ކުންފުނިން ބުނީ، އާރްޓީއެލްއާ ގުޅޭ ހުރިހާ ނިންމުމެއް ނިންމަނީ ޓްރާންސްޕޯޓު މިނިސްޓްރީގައި ހިންގާ އާރްޓީއެލް ސްޓިއަރިން ކޮމިޓީން ކަމަށެވެ. އެ ގޮތުން، އާރްޓީއެލްގެ ލޯގޯއިން ރީނދޫ ކުލަ އުނިކުރަން ނިންމީ އެ ކޮމިޓީގެ 132 ވަނަ ބައްދަލުވުމުގައި ކަމަށް އެ ކުންފުނިން ބުންޏެވެ.
ފާހަގަކޮށްލެވޭ ގޮތުގައި އާރްޓީއެލްގެ ލޯގޯއިން ރީނދޫ ކުލަ އުނިކުރުމުން ވަރަށް ބޮޑަށް ފާޑުކިޔުން އަމާޒުވިއެވެ.
އެ ގޮތުން، އެމްޑީޕީ ސަރުކާރުގެ ޕްލޭނިން މިނިސްޓަރު މުހައްމަދު އަސްލަމް މީގެ ކުރިން ވަނީ ގައުމީ މަޝްރޫއެއްގެ ގޮތުގައި އާރްޓީއެލް ފެރީގެ ޚިދުމަތް ފެށީ ކުރީގެ ރައީސް އިބްރާހީމް މުހައްމަދު ޞާލިޙު ކަމަށާއި ލޯގޯގެ ކުލަތައް ބަދަލު ކުރިޔަސް އެކަން ބަދަލެއް ނުކުރެވޭނެ ކަމަށް ވިދާޅުވެފައެވެ.
އާރްޓީއެލް ޚިދުމަތުގެ ދަށުން ފެރީއާއި ބަހުގެ ޚިދުމަތް ވެސް ފޯރުކޮށްދެއެވެ.