ޔޫއެސް އޯޕަން ޓެނިސް މުބާރާތުގެ ފިރިހެން ސިންގަލްސް އިވެންޓްގެ ދެވަނަ ބުރުން ފަސޭހަކަމާ އެކު މުބާރާތުގައި އެއްވަނައަށް ސީޑު ކުރެވިފައިވާ ޔަނިކް ސިނާ ޖާގަހޯދައިފިއެވެ.
އިޓަލީވިލާތުގެ ސިނާ މުބާރާތުގެ ދެވަނަ ބުރުން ޖާގަހޯދީ ރޭ ކުޅުނު ފުރަތަމަ ބުރުގައި ޗެކް ރިޕަބްލިކްގެ ވިޓް ކޮޕްރިވާއާ ބައްދަލުކުރި މެޗު ސީދާ ތިން ސެޓުން ކާމިޔާބުކޮށްގެންނެވެ. މެޗުގެ ފުރަތަމަ ދެ ސެޓު 6-1 އަދި 6-1 އިން ސިނާ ކާމިޔާބުކުރިއިރު ފަހު ސެޓު އޭނާ ކާމިޔާބުކޮށްފައިވަނީ 6-2 އިންނެވެ.
މެޗު އޭނާ ކާމިޔާބުކުރުމަށް ނަގާފައިވަނީ އެއް ގަޑިއިރާއި 38 މިނެޓެވެ.
މުބާރާތުގެ ކުރިން ބޭއްވި ސިންސިނާޓީ އޯޕަން ޓެނިސް މުބާރާތުގެ ފައިނަލްގައި ބަލިވުމުގެ ސަބަބުން ފުރަތަމަ ސެޓުގެ މެދުތެރެއިން މެޗު ދޫކޮށްލި ސިނާގެ ފަރާތުން މެޗުގައި ބަލީގެ އެއްވެސް އަސަރެއް ނުފެނުނެވެ. އެންމެ ފަހުގެ ޗެމްޕިއަންގެ ހައިސިއްޔަތުން ތަށި ދިފާއުކުރުމަށް ނުކުމެފައިވާ ސިނާވަނީ މި ސީޒަންގައި މިހާތަނަށް ކުޅުނު ތިން ގްރޭން ސްލޭމް މުބާރާތުގެ ތެރެއިން ދެ މުބާރާތް ކާމިޔާބުކޮށްފައެވެ. އަދި، ބަލިވެފައިވަނީ ފްރެންޗް އޯޕަންގެ ފައިނަލްގައި ކާލޯސް އަލްކަރާޒް އަތުން އެކަންޏެވެ.
މުބާރާތުގެ ދެވަނަ ބުރުގައި ސިނާ ބައްދަލުކުރުމަށް ހަމަޖެހިފައިވަނީ ދުނިޔޭގައި 36 ވަނައަށް ރޭންކްކުރެވިފައިވާ އޮސްޓްރޭލިއާގެ އެލެކްސީ ޕޮޕިރީންއާއެވެ. މުބާރާތުގެ ދެވަނަ ބުރުން ޕޮޕިރީން ޖާގަ ހޯދީ ފިންލަންޑްގެ އެމީލް ރޫސުވުއޯރީއާ ބައްދަލުކުރި މެޗު ސީދާ ތިން ސެޓުން ކާމިޔާބުކޮށްގެންނެވެ.
މުބާރާތުގައި ކުޅުނު އެހެން މެޗުތަކަށް ބަލާލާއިރު ތިންވަނައަށް ސީޑުކުރެވިފައިވާ ޖަރުމަނުވިލާތުގެ އެލެގްޒެންޑާ ޒުވަރޭވާއި ޗިލީގެ އަލެހަންޑްރޯ ޓަބީލޯ ބައްދަލުކުރި މެޗު ހައެއް ދެއެއް، ހަތެއް ހަތަރެއް އަދި ހައެއް ހަތަރަކުން ކާމިޔާބުކޮށްފައިވަނީ ޒުވަރޭވްއެވެ. މުބާރާތުގެ ދެވަނަ ބުރުގައި ޒުވަރޭވް ބައްދަލުކުރާނީ އިނގިރޭސިވިލާުގެ ޖޭކޮބް ފާންލީއާއެވެ. އަދި، 10 ވަނައަށް ސީޑު ކުރެވިފައިވާ އިޓަލީވިލާތުގެ ލޮރެންޒޯ މުސޭޓީއާއި ފަރަންސޭސިވިލާތުގެ ޖިއޮވާނީ އެމްޕެޓްޝީ ޕެރިކާޑާ ބައްދަލުކުރި މެޗު ތިން ސެޓް އެއް ސެޓުން ކާމިޔާބުކޮށްފައިވަނީ މުސޭޓީއެވެ. މެޗުގެ ފުރަތަމަ ސެޓު ޓައި ބްރޭކަކަށް ގޮސް ތިނެއް ހަތަކުން ޖިއޮވާނީ ކާމިޔާބުކުރިއިރު ޖެހިގެން އައި ތިން ސެޓު މުސޭޓީ ކާމިޔާބު ކޮށްފައިވަނީ ހައެއް ތިނެއް، ހައެއް ހަތަރެއް އަދި ހައެއް ހަތަރަކުންނެވެ.