މިހާރު އޮތީ މީޑިއާއަށް އިސްކަންދޭ 'މީޑިއާ ޕްރޯ' ސަރުކާރެއް ކަމަށާއި، މީޑިއާތައް ކޮންޓްރޯލް ކުރެވޭ ގޮތަށް އެކުލަވާލައިފައިވާ ބިލަށް ސަރުކާރުގެ ފަރާތުން އިސްލާހު ހުށަހަޅާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ސަރުކާރާ ގުޅުން އޮންނަ، ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހަޅުއްވައިގެން، މީޑިއާ ބިލެއްގެ މަސައްކަތް ރައްޔިތުންގެ މަޖިލީހުން މިހާރު އަންނަނީ ކުރަމުންނެވެ.
ވެރިކަން ކުރާ ޕީއެންސީގެ ސުޕަމެޖޯރިޓީ އޮންނަ މަޖިލީހުން އިއްޔެ އެ ބިލް ބަލައިގެންފައިވާއިރު، އެ ޖަލްސާ ކުރިއަށްދިޔައިރު ވެސް ނޫސްވެރިން ދިޔައީ މަޖިލިސް ދޮށުގައި މުޒާހަރާކުރަމުންނެވެ.
ނޫސްވެރިން ގޮވާލަނީ، ވަކިވަކި ނޫސްވެރިން ބޮޑެތި އަދަދުތަކުން ޖޫރިމަނާކުރެވޭ ގޮތަށާއި މީޑިއާއެއްގެ މައްސަލައެއްގެ ތަހުގީގީ މަރުހަލާގައިވެސް ފިޔަވަޅު އެޅޭ ގޮތަށް އޮތް އެ ބިލް ބޭރުކޮށްލުމަށެވެ. މަޖިލިސް ކައިރިއަށް އެއްވުމަށްފަހު ނޫސްވެރިން އިއްޔެ ރައީސް އޮފީހާއި ރައީސްގެ ގެކޮޅު ކައިރިއަށް ވެސް ޖަމާވެ، އެ މަނިކުފާނާ ބައްދަލުކުރުމުގެ ފުރުސަތު ދިނުމަށް ގޮވާލިއެވެ.
މިއަދު ހެނދުނު ވެސް ނޫސްވެރިން ރައީސް އޮފީސް ކައިރީގައި ތިބިއިރު، އިންފޮމޭޝަން މިނިސްޓަރު އިބްރާހިމް ވަހީދު (އަސްވާޑް)އާއި ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ޚަލީލް ވަނީ އެ ނޫސްވެރިންނާ ބައްދަލުކުރައްވާފައެވެ. އެ ބައްދަލުވުމުގައި ވެސް ނޫސްވެރިން ވަނީ، މީޑިއާ ބިލާ ގުޅޭ ޝަކުވާތައް ސީދާ ރައީސަށް ހުށަހެޅުމަށް ފުރުސަތު ދިނުމަށް އެދިފައެވެ.
ރައީސް، ރައީސް އޮފީހުން ވަޑައިގަތުން: އެ މަނިކުފާނު ވިދާޅުވީ މިއީ މީޑިއާ ޕްރޯ ސަރުކާރެއް ކަމަށާއި މީޑިއާ ބިލަށް އިސްލާހު ހުށަހަޅާނެ ކަމަށް -- ސަން ފޮޓޯ/ މާނިއު މުހައްމަދު
އޭގެ ފަހުން، މިއަދު 13:30ގައި ރައީސްވަނީ މުޒާހަރާގައި އިސްކޮށް އުޅުއްވި ބައެއް ނޫސްވެރިންނާ ބައްދަލުކުރައްވައިފައެވެ. އެއީ "ދައުރު" ނޫހުގެ އެޑިޓަރު އަހުމަދު ޒާހިރު (ހިރިގާ) އާއި "އަދަދު" ނޫހުގެ ޗީފް އެޑިޓަރު އަދި ސީއީއޯ ހުސައިން ފިޔާޒް މޫސާއާއި ނޫސްވެރިންގެ ޖަމިއްޔާ އެމްޖޭއޭގެ އެގްޒެކެޓިވް ޑިރެކްޓަރު މުހައްމަދު ޖުނައިދާއި "މިހާރު" ނޫހުގެ މެނޭޖިން އެޑިޓަރު މުއިއްޒު އިބްރާހީމާއި މީޑިއާ ކައުންސިލްގެ މެންބަރު ނަހުދާ ފާއިޒެވެ.
އެ ބައްދަލުވުމަށް ފަހު ރައީސް އޮފީހުން ނެރުނު ބަޔާނެއްގައި ބުނީ ރައީސް ދެއްކެވި ވާހަކަފުޅުގައި، މީޑިއާ ރެގިއުލޭޓްކުރުމުގައި ސަރުކާރުގެ ކޮންޓްރޯލް ބާއްވަން ބޭނުންފުޅުނުވާ ކަމަށާއި، މެންބަރުން އައްޔަނު ކުރުމުގައިވެސް ސަރުކާރުގެ އެއްވެސް ދައުރެއް ބާއްވަން ބޭނުންފުޅު ނުވާކަމަށް ވިދާޅުވި ކަމަށެވެ. އަދި މިހާރު ރައްޔިތުންގެ މަޖިލީހަށް ހުށަހެޅިފައިވާ ބިލުގެ ވަކި ވަކި މާއްދާތަކުގައި ހުރި ކަންބޮޑުވުންތަކަށް ސަރުކާރުގެ ފަރާތުން އިސްލާޙް ހުށަހަޅާނެކަމުގެ ޔަގީންކަން ރައީސް ދެއްވި ކަމަށެވެ.
"ރާއްޖޭގެ މީޑިއާގެ މިނިވަންކަން ދެމެހެއްޓުމަށް ހުރިހާ ފަރާތްތަކަށް ސަރުކާރުން އަބަދުވެސް އެއްބާރުލުން ދެއްވާނެކަމުގެ ޔަޤީންކަން މިއަދުގެ ބައްދަލުވުމުގައި މޯލްޑިވްސް ޖާނަލިސްޓް އެސޯސިއޭޝަނަށް ރައީސުލްޖުމްހޫރިއްޔާ ވަނީ ދެއްވައިފައެވެ." ރައީސް އޮފީހުން ބުންޏެވެ.
މުލީއާގޭ ކުރިމަތީ ނޫސްވެރިން އިހުތިޖާޖު ކުރުން: ނޫސްވެރިން ގޮވާލަމުން ދަނީ މީޑިއާ ބިލް ބޭރުކުރަން -- ސަން ފޮޓޯ: އަހްމަދު އިޔާދު
އެ ބައްދަލުވުމާ ގުޅޭ ގޮތުން، ނޫސްވެރިކަމުގައި 30 އަހަރަށްވުރެ ދިގު މުއްދަތެއްގެ ތަޖުރިބާ ހޯއްދަވައިފައިވާ ހިރިގާ ވިދާޅުވީ، މީޑިއާ ބިލާ ގުޅޭ ކަންބޮޑުވުންތަކުގެ އިތުރަށް ނޫސްވެރިން އުލުބައިންދަން ޖެހޭ ކަމަށް ޕީއެންސީގެ ޕީޖީ ލީޑަރު އިބްރާހީމް ފަލާހު ވިދާޅުވި މައްސަލަ ވެސް ރައީސްގެ ސަމާލުކަމަށް ގެންނެވި ކަމަށެވެ.
އޭނާ އިޝާރާތް ކުރެއްވީ، ނޫސްވެރިން ލާންވީ ޖަލަކަށް ނޫން ކަމަށާއި 'އުލުބައިދަންވީ' ކަމަށް ވިދާޅުވެ އިއްޔެ މަޖިލީހުގައި ފަލާހު ދެއްކެވި ވާހަކައަށެވެ.
ރަދީފުގައި ބުނާ ގޮތުން، އުލުބޭންދުމަކީ އިހު ޒަމާނުގައި މީހުން މެރުމަށް ހަދާ ގޮތެކެވެ. އެގޮތުން، އުލު ބައިންދާއިރު، ތޫނުކޮށްފައި ހުންނަ ދަގަނޑު އުލެއްގައި މީހާ ބައިންދާ ކަމަށް ރަދީފުގައި ބުނެފައިވެއެވެ.
"އެވާހަކަ އަޅުގަނޑުމެން ދެންނެވިން ރައީސް ވިދާޅުވީ، މިހެން ބޯހުރުވާލާފާ، ވަރަށް ދެރަވަރު ވާހަކައެކޭ ވިދާޅުވީ،" ހިރިގާ ވިދާޅުވިއެވެ.
އޭނާ ވިދާޅުވީ، ނޫސްވެރިން ބޭނުންވާ ގޮތަކީ ބިލު ބޭރުކޮށްލުން ކަމަށް ރައީސާ ހިއްސާކުރުމުން، އެ ކަމާ ވިސްނަވާނެ ކަމަށް އެ މަނިކުފާނު ވިދާޅުވިކަމަށެވެ.
ހިރިގާގެ ވާހަކައަށް ބާރުދެއްވައި ޖުނައިދު ވިދާޅުވީ، މި ސަރުކާރަކީ ނޫސްވެރިންނާ '100 ޕަސެންޓް ޕޮޒިޓިވް' ގުޅުމެއް އޮތް ސަރުކާރެއް ކަމަށް ރައީސް ވިދާޅުވި ކަމަށެވެ. އަދި ބިލު ބޭރުކޮށްލުމާ ގުޅޭ ގޮތުން ބަންޑާރަ ނައިބުގެ ލަފާ ހޯއްދަވާނެ ކަމުގެ ޔަގީންކަން ވެސް އެ މަނިކުފާނު ދެއްވި ކަމަށް އޭނާ ވިދާޅުވިއެވެ.
"އަޅުގަނޑުމެންގެ އެދުމަކީ ހަމަ ބިލް ބޭރުކޮށްލުން، ދެން އެކަމާ ރައީސް ވިސްނަވާނެ ކަމަށް ބަންޑާރަ ނައިބުގެ ލަފާ އެކަމަށް ހޯއްދަވާނެ ކަމުގެ ޔަގީންކަން ރައީސް ދެއްވި،" ޖުނައިދު ވިދާޅުވިއެވެ.
މީޑިއާ ބިލްގައި ހިމެނެނީ ކޮން ކަންކަމެއް؟
- މޯލްޑިވްސް މިޑިއާ އެންޑް ބްރޯޑްކާސްޓިން ކޮމިޝަނެއް އުފެއްދުން
- ކޮމިޝަންގައި ރައީސް އައްޔަންކުރައްވާ ތިން މެންބަރުން ތިއްބަވާނެ
ބާކީ ހަތަރު މެންބަރުން އިންތިޚާބުކުރާނީ މީޑިއާތަކުން - ކޮމިޝަންގެ ރައީސް އައްޔަންކުރައްވާނީ ރައީސް
- ކޮމިޝަނުން އަންގާ ކަމެއް އިސްލާހުނުކޮށްފި ނަމަ 5،000 އާއި 25،000 ރުފިޔާއާ ދެމެދުގެ ޖޫރިމަނާއެއް
- ގާނޫނާ ހިލާފު ކަމެއް ކޮށްފިނަމަ 100،000 ރުފިޔާއިން ޖޫރިމަނާކުރެވޭނެ
- މައްސަލައެއް ބަލަން ފަށައި ވަގުތީ ގޮތުން ރަޖިސްޓްރީ ބާތިލުކުރުމުގެ ބާރު ކޮމިޝަނަށް ލިބޭ
- ކޯޓު މަރުހަލާ ނުނިމެނީސް، ނޫހުގެ ރަޖިސްޓްރީ ބާތިލުކުރެވޭނެ
- ނޫސްތަކުގެ ވެބްސައިޓް ބްލޮކްކޮށް، ޓިވީ ބްރޯޑްކާސްޓް ހުއްޓުވުމުގެ ބާރު ކޮމިޝަނަށް
- ކޮމިޝަން އުފެދުމުގެ އަހަރެއް ކުރިން ހިނގި ކަންކަން ވެސް ކޮމިޝަނަށް ބެލޭނެ