އިސްރާއީލުން ޣައްޒާއަށް ދެމުންގެންދާ ހަމަލާތަކާ ގުޅިގެން މައިކްރޯސޮފްޓް ކުންފުނިން އިސްރާއީލާ އެކު ބާއްވާ ގުޅުންތަކާ ދެކޮޅަށް މުޒާހަރާކުރި ހަތަރު މުވައްޒަފަކު ވަޒީފާއިން ވަކިކޮށްފިއެވެ.
ވަކިކުރި މުވައްޒަފުންގެ ތެރޭގައި މި ހަފުތާގައި ކުންފުނީގެ ރައީސްގެ އޮފީހުގައި ކުރިއަށް ގެންދިޔަ ސިޓް-އިން މުޒާހަރާގައި ބައިވެރިވި ދެ މުވައްޒަފަކު ވެސް ހިމެނެއެވެ.
މިކަމާ ގުޅިގެން "ނޯ އަޒޫރީ ފޯ އެޕާތައިޑް" ޖަމިއްޔާއިން ބުނީ، އެންމެ ފުރަތަމަ ވަޒީފާއިން ވަކިކުރީ އަންނާ ހެޓްލްއާއި ރިކީ ފާމެލީ ކަމަށާއި، އެ ދެ މީހުންނަށް އެކަން އަންގާފައިވަނީ ވޮއިސްމެއިލް މެދުވެރިކޮށް ކަމަށެވެ. އަދި، ބުރާސްފަތި ދުވަހު އިތުރު ދެ މުވައްޒަފުން ކަމަށްވާ ނިސްރީން ޖަރާދާތުއާއި ޖޫލިއަސް ޝާން ވެސް ވަޒީފާއިން ވަކިކޮށްފައިވާ ކަމަށް އެ ޖަމިއްޔާއިން ބުނެއެވެ. މި ދެ މީހުންނަކީ މައިކްރޯސޮފްޓްގެ މައި އޮފީސް ކައިރީގައި ހަދާފައިވާ ކޭމްޕްތަކުގައި ބައިވެރިވި މީހުންނެވެ.
މައިކްރޯސޮފްޓުން ބުނީ، މި މުވައްޒަފުން ވަޒީފާއިން ވަކިކުރީ ކުންފުނީގެ ސިޔާސަތުތަކާ ހިލާފުވެ، ސީރިއަސް މައްސަލަތަކެއް ދިމާކުރުމުން ކަމަށެވެ. ބުރާސްފަތި ދުވަހު ނެރުނު ބަޔާނެއްގައި އެ ކުންފުނިން ބުނީ، މުޒާހަރާތަކުގެ ސަބަބުން ކުންފުނީގެ ސަލާމަތީ ކަންކަމަށް ބޮޑެތި ނުރައްކާތަކެއް ކުރިމަތިވި ކަމަށެވެ.
ނޯ އަޒޫރީ ފޯ އެޕާތައިޑް ޖަމިއްޔާއިން ގޮވާލަމުން ދަނީ މައިކްރޯސޮފްޓުން އިސްރާއީލާ ހުރި ހުރިހާ ގުޅުމެއް ކަނޑާލައި، ފަލަސްތީނުގެ ރައްޔިތުންނަށް ލިބުނު ގެއްލުންތަކުގެ ބަދަލު ދިނުމަށެވެ. ވަޒީފާއިން ވަކިކުރި ހެޓްލް ބުނީ، އިސްރާއީލަށް ގަތުލުއާންމު ހިންގުމަށް ބޭނުންވާ ވަސީލަތްތައް މައިކްރޯސޮފްޓުން ފޯރުކޮށްދެމުންދާތީ އެކަމާ ދެކޮޅަށް މުޒާހަރާކުރަނީ ކަމަށެވެ.
މި މަހު ނެރުނު މީޑިއާ ރިޕޯޓެއްގައިވާ ގޮތުން، އިސްރާއީލުގެ އަސްކަރީ ސާވައިލަންސް އެޖެންސީއަކުން މައިކްރޯސޮފްޓްގެ އަޒޫރީ ސޮފްޓްވެއާ ބޭނުންކޮށްގެން، ހިފާފައިވާ ހުޅަނގު އައްސޭރިއާއި ޣައްޒާގައި ދިރިއުޅޭ ފަލަސްތީނުގެ ރައްޔިތުންގެ މޮބައިލް ފޯނު ކޯލްތައް ރިކޯޑްކޮށްފައިވެއެވެ. މި ކަމާ ގުޅިގެން މައިކްރޯސޮފްޓުން ވަނީ ކޮވިންގްޓަން އެންޑް ބާލިންގް އެލްއެލްޕީ ލޯ ފާމާ ގުޅިގެން މި މައްސަލަ ތަހުގީގުކުރަން ފަށާފައެވެ.
މީގެ ކުރިން މިދިޔަ އޭޕްރީލް މަހު ވެސް، މައިކްރޯސޮފްޓް އޭއައިގެ ސީއީއޯ މުސްތަފާ ސުލައިމާން ވާހަކަދައްކަވަނިކޮށް، ފަލަސްތީނަށް ތާއީދުކުރާ މުވައްޒަފަކު މުޒާހަރާކުރުމުން އޭނާއާއި އިތުރު މުވައްޒަފަކު ވަނީ ވަޒީފާއިން ވަކިކޮށްފައެވެ.
ޣައްޒާގައި އިސްރާއީލުން ހިންގަމުންދާ ހަނގުރާމައިގެ ސަބަބުން އިންސާނީ ހާލަތު ގޯސްވެ، އެތައް ބަޔަކު މަރުވެ، ބަނޑުހައިހޫނުކަން އާންމުވެފައިވާތީ، އިސްރާއީލާ ގުޅުން ހުރި ކުންފުނިތަކާ ދެކޮޅަށް ކުރާ މުޒާހަރާތައް ވަނީ ދުނިޔޭގެ އެކި ކަންކޮޅުތަކުގައި އިތުރުވެފައެވެ.