އެމެރިކާގެ ނިއު ޔޯކު ސިޓީގެ ކުއީންސްގައި ހުންނަ ހޮސްޕިޓަލެއްގެ ޑޮކްޓަރަކު ބަލި މީހުންނަށް މަސްތުވާތަކެތި ދީގެން ޖިންސީ ގޯނާކޮށް، ވީޑިއޯ ހެދި މައްސަލައެއް ސާބިތުވެ 24 އަހަރަށް ޖަލަށް ލާން އިއްޔެ ހުކުމްކޮށްފިއެވެ.
ޒީ އަލަން ޗެންގް ކިޔާ އުމުރުން 34 އަހަރުގެ އެ ޑޮކްޓަރު ވަނީ ޖޫން މަހު ރޭޕްގެ ހަތަރު ދައުވާއަކާއި ޖިންސީ އަނިޔާގެ ތިން ދައުވާއަކަށް އިއުތިރާފުވެފައެވެ.
ޗެންގްގެ މައްޗަށް ވަނީ ރޭޕް ކުރުމާއި ޖިންސީ ގޯނާ ކުރުމާއި އަނިޔާ ކުރުމާއި މަސްތުވާތަކެތި ގެންގުޅުމާއި ގާނޫނާ ހިލާފަށް ފާރަލުން ފަދަ 50 އަށް ވުރެ ގިނަ ޖިނާއީ ދައުވާ އުފުލާފައެވެ.
"ޗެންގް އަންހެނުންނާ ދެކޮޅަށް ގިނަ އަދަދެއްގެ ނުބައި އަމަލުތައް ހިންގި،" ކުއީންސްގެ ޑިސްޓްރިކްޓް އެޓާނީ މިސް މެލިންޑާ ކަޓްޒް ހުކުމް އިއުލާންކުރައްވައި ނެރުނު ނޫސްބަޔާނެއްގައި ވިދާޅުވިއެވެ.
ޗެންގްގެ އެކަން ކުރާކަން ފަޅާއެރީ އޭނާއާ އެކު އުޅުނު މީހަކަށް ވީޑިއޯތައް ފެނިގެން ފުލުހުންނަށް ރިޕޯޓުކުރުމުންނެވެ.
އެ މައްސަލައިގައި ޗެންގް ހައްޔަރުކުރީ 2022 ވަނަ އަހަރުގެ ޑިސެންބަރު މަހެވެ.
ފުލުހުން އޭނާގެ ގެ ބަލައިފާސްކުރިއިރު ޑިޖިޓަލް ސްޓޯރޭޖް ޑިވައިސްތަކެއް ފެނިފައިވާއިރު، އެ ޑިވައިސްތަކުގައި ހޭނައްތާފައި ތިބި އޭނާގެ އެކުވެރި ދަންނަ އަންހެނުންނާއި ހޮސްޕިޓަލުގައި ތިބި ބަލިމީހުންނަށް ޖިންސީ ގޯނާކުރާ އިތުރު 10 ވަރަކަށް ރިކޯޑިން ހިމެނެއެވެ.
ޑޭޓިން އެޕަކުން ދިމާވި އަންހެނަކު ވެސް ޗެންގް ރޭޕްކޮށްފައިވާ ކަމަށް ޕްރޮސެކިއުޓަރު ބުނެފައިވެއެވެ.
ފުލުހުންނަށް އެ ގޭގެ ތެރެއިން މަސްތުވާތަކެތި ފެނިފައިވާއިރު، އޭގެ ތެރޭގައި އެލްއެސްޑީ، ކެޓަމިން، ފެންޓަނައިލް އަދި އާންމުކޮށް ސާޖަރީތަކުގައި ބޭނުންކުރާ ވަރުގަދަ އެނެސްތެޓިކްސް ހިމެނެއެވެ.