އެހެން ހުރިހާ ސަރުކާރަކަށް ވުރެ ގިނައިން ކަނދުފަތި އެޅީ މި ސަރުކާރުން ކަމަށް މަސްވެރިކަމާ ބެހޭ މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި ޝިޔާމް ވިދާޅުވީ، އަހަރެއްގެ ތެރޭ އެންމެ ގިނަ ކަނދުފަތީ އެޅީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ފަހުން މިދިޔަ އަހަރު ކަމަށެވެ. އަދި، އެއަށް ވުރެ ގިނަ ކަނދުފަތި މި އަހަރު އަޅާނެ ކަމަށް އޭނާ ވިދާޅުވިއެވެ.
ޝިޔާމް ވިދާޅުވީ، މިއީ ރައީސް މުއިއްޒު ވަރަށް ބޮޑު އިސްކަމެއްދެއްވާ ކަމެއް ކަމަށެވެ.
"މި ވެސް ވަރަށް ބޮޑަށް ރައްޔިތުން އެދޭ ކަމަކަށްވާތީއާއި އެކީގައި ރައީސްގެ ވަރަށް ބޮޑު އަހައްމިއްޔަތުކަމެއް މިކަމުގައި ވެސް އެބައޮތް. އަދި، މަސް ކަނދުފަތީގެ ވިއުގައެއް ވެސް އެބައޮތް،" އޭނާ ވިދާޅުވިއެވެ.
އެ ގޮތުން، މި ސަރުކާރުން މުޅިން އަލަށް 22 އަށްވުރެ ގިނަ ކަނދުފަތި އަޅާފައިވާ ކަމަށް މިނިސްޓަރު ވިދާޅުވިއެވެ. އަދި، ސަރުކާރުން އަންނަނީ ދެ ސަރަހައްދެއްގައި ކަނދުފަތި ސެންޓަރު އަޅަން ވެސް މަސައްކަތްކުރަމުންނެވެ.
މީގެ އިތުރުން، އޭނާ ވިދާޅުވީ ރާއްޖޭގެ ވަރަށް ގިނަ ސަރަހައްދުތަކުގައި ފަރުމަސްވެރިކަމަށް ޝައުގުވެރިކަން އެބައޮތް ކަމަށެވެ. އެގޮތުން، މިހާރު ވެސް ދެކުމުގައި އަށް ކަނދުފަތި ގާއިމުކުރުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވިއެވެ.
ޝިޔާމް ވިދާޅުވީ، ސްޕޯޓްސް ފިޝިން އޮތް ރަށްރަށް މިނިސްޓްރީން ފާހަގަކޮށްފައިވާ ކަމަށާއި އެ ސަރަހައްދުތަކުގައި ކަނޑުފަތި އަޅާނެ ކަމަށެވެ. އެކަން ކުރަނީ ފަންނީ ބޭފުޅުންގެ ޓީމަކުންނެވެ.