ރަނގަޅު އާއިލާއެއް ބިނާކުރެވޭނީ އިސްލާމީ އަގީދާގެ މަތީގައި މުޅި ދިރިއުޅުން ބިނާކުރެވިގެން ކަމަށާއި ދެމަފިރިންގެ ކިބައިން ދަރިންނަށް ރިވެތި މިސާލުތައް ދައްކައިގެން ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާގައި އަލިއަޅުވާލީ ރަނގަޅު އާއިލާއެއް ބިނާކުރުމުގެ މައްޗަށެވެ.
ޚުތުބާގައި ބުނީ، ﷲ އަހަރެމެނަށް ދެއްވާފައިވާ ނިއުމަތްތައް ގިނަ ކަމަށެވެ. އެގޮތުން، އެ ނިއުމަތްތަކުގެ އަގު ވަޒަން ނުކުރެވުނަސް އެ ނިއުމަތްތައް އިތުރުވަމުން އަންނަކަން ޚުތުބާގައި ފާހަގަކުރިއެވެ.

ބެލެނިވެރިއަކު ދަރިން ގޮވައިގެން ސުކޫލަށް ދަނީ: ރަނގަޅު އާއިލާއެއް ބިނާކުރެވޭނީ ދެމަފިރިންގެ ކިބައިން ދަރިންނަށް ރީތި މިސާލުތައް ދައްކައިގެން ކަމަށް ޚުތުބާގައި ބުނި -- ސަން ފޮޓޯ/ ފަޔާޒު މޫސާ
އެ ނިއުމަތްތަކުގެ ތެރެއިން އެންމެ މުހިންމު ނިއުމަތެއް ކަމަށް ޚުތުބާގައި ފާހަގަކުރީ، ކައިވެނީގެ ވާހަކައެވެ. އެއީ، ﷲގެ ޙިކުމަތްވަންތަކަން ދަލީލުކޮށްދޭ ހެކިތަކުން ހެއްކެއް ކަމަށާއި ކައިވެނީގެ ފޮނި މޭވާއަކީ އެ ހަޔާތުން އުފެދޭ އާއިލާ ކަމަށް ޚުތުބާގައި ބުންޏެވެ.
"ތިޔަބައިމީހުންނަށްޓަކައި ހަމަ ތިޔަބައިމީހުންގެ نفسތަކުން އަނބީން ހެއްދެވިކަމީ، އެކަލާނގެ ކުޅަދުންވަންތަކަމުގެ ހެކިތަކުގެ ތެރެއިންވާ ކަމެކެވެ. އެއީ ތިޔަބައިމީހުން އެ ކަނބަލުންގެ ފަރާތުން ހަމަހިމޭންކަން ލިބިގަތުމަށް ޓަކައެވެ. އަދި، އެ ކަލާނގެ ތިޔަބައިމީހުންގެ މެދުގައި ލޯތްބާއި، އޯގާވެރިކަން ލެއްވިއެވެ. ހަމަކަށަވަރުން، ފިކުރުހިންގާ ބަޔަކަށް އެ ކަމުގައި ހެކިތަކެއްވާކަން ކަށަވަރެވެ،" ޚުތުބާގައި ބުންޏެވެ.
އާއިލާ ބަލިކަށިވެއްޖެނަމަ، ދިރިއުޅުމުގެ ނިޒާމު ހަލާކުވާނެ ކަމަށާއި މުޖުތަމައުން އިންސާނިއްޔަތުކަން ނެތިދާނެކަން ޚުތުބާގައި ހަނދާންކޮށްދިނެވެ.
އާއިލާއަކީ ލޯތްބާއި އޯގާތެރިކަމުގެ މައްޗަށް ބިނާވެފައިވާ ޝަރުއީ ހިޔާވަހި ކަމެއް ކަމަށްވާއިރު، އެކަމަށް ޝުކުރުވެރިވުމަށް އެޅޭ އެންމެ ފުރަތަމަ ބިންގަލަކީ ހަރުދަނާ އާއިލާއެއް ބިނާކުރުން ކަމަށް ޚުތުބާގައި ބުންޏެވެ. މިގޮތުން، ހަރުދަނާ އާއިލާއެއް ބިނާކުރެވޭނީ އިސްލާމީ އަގީދާގެ މަތީގައި މުޅި ދިރިއުޅުން އާރާސްތުކުރެވިގެން ކަމަށާއި ދީނާ ދުރު ފިކުރުތަކާއި އަމަލުތައް ގޭތެރޭގެ މާހައުލުން ނައްތާލެވިގެން ކަން ފާހަގަކުރިއެވެ.

މަގެއްމަތިން ދެ ކުޑަކުދިން ހިނގާފައި ދަނީ: ދަރިންގެ ކަންކަމުގައި އިހުމާލު ނުވުމަށް ޚުތުބާގައި ނަސޭހަތްތެރިވި ---ސަން ފޮޓޯ/ މުހައްމަދު އަފްރާހް
އެކަމުގައި އިސްލާމީ އަގީދާ މުހިންމު ދައުރެއް އަދާކުރާކަން ފާހަގަކޮށް ޚުތުބާގައި ބުނީ، ދެމަފިރީންގެ ކިބައިން ދަރިންނަށް ރިވެތި މިސާލުތަކެއް ދެއްކުމަކީ ރަނގަޅު އާއިލާއެއް ބިނާކުރެވޭ ކަމެއް ކަމަށެވެ.
"ފަސާދަޔާއި މަގުފުރެދުމާއި، ބައިބައިވުމާއި ހަމަނުޖެހުންތަކުން އިސްލާމީ އުންމަތް ސަލާމަތްކުރުމަށްޓަކައި ހަރުދަނާ ޢަޤީދާގެ މަތީގައި ދަރީން ތަރުބިޔަތުކުރާން ވަރަށް ބޮޑު އިސްކަމެއް ވަނީ ދޭން ޖެހިފައެވެ. ދަރީންގެ ހިތްތަކުގައި އީމާންކަމުގެ އޮށް އިންދައި ތައުޙީދުގެ ޢިލްމު އުނގަންނައިދިނުމަކީ، ހަރުދަނާ ތަރުބިޔަތާއި ޢިލްމުތަކުގެ ކުރިބޯއްޓަށް ދަރީން ވާޞިލުކޮށްދިނުމަށް ޓަކައި ހުޅުވޭނެ އަމާން ދޮރެކެވެ،" ޚުތުބާގައި ބުންޏެވެ.
މީގެ އިތުރުން، މައިންބަފައިން މިއަދު ކުރަން ޖެހިފައިވާ އެންމެ މުހިންމު މަސައްކަތަކީ ދަރިން ތަރުބިއްޔަތު ކުރުމުގައި އިސްލާމް ދީން ގެނެސްފައިވާ މަންހަޖާ އެއްގޮތަށް އަމަލުކުރުން ކަމަށް ޚުތުބާގައި ބުންޏެވެ.
އެންމެ ކުޑައިރުން ފެށިގެން އެ ދަރިންނަށް އިސްލާމީ ހުކުމްތަކަކީ އަމަލު ކުރަން ޖެހޭ ހުކުމްތަކެއްކަން ދަސްކޮށްދިނުމަށާއި ދަރިންނަށް ތައުލީމު ދިނުމުގައި އިހުމާލުނުވުމަށް ޚުތުބާގައި ނަސޭހަތްތެރިވިއެވެ.
ދުނިޔަވީ ތައުލީމާ އެކީގައި އުޚުރަވީ ތައުލީމު ދަރިންގެ ހިތްތަކުގައި އަހުލުވެރިކުރުމަށާއި ޒަމާނީ ވަސީލަތްތައް ބޭނުންކޮށްގެން ދަރިންނަށް ދީނީ މައުލޫމާތު ދޭން ޚުތުބާގައި ގޮވާލިއެވެ. އަދި، އިމާންކަމާއި އިސްލާމްކަމުގެ ރުކުންތަކަށް ދަރިން ހާނުވާން ޚުތުބާގައި ހަނދާންކޮށްދިނެވެ. އެކަންކަމަށް އެއްވެސް ފަރާތަކުން ފަރުވާ ކުޑަނުކުރުމަށް ޚުތުބާގައި ވަސިޔަތްކުރިއެވެ.