ކާބުލް (13 އޮކްޓޯބަރު 2025): ޕާކިސްތާނުގެ ބައެއް ޖަމާއަތްތަކުން އަފްޣާނިސްތާނާއި ޕާކިސްތާނުގެ ގުޅުންތައް ޚަރާބުކުރަން މަސައްކަތް ކުރަމުން ގެންދާކަމަށް އަފްޣާނިސްތާނުގެ ތާލިބާން ސަރުކާރުގެ ޚާރިޖީ ވަޒީރު އަމީރު ޚާން މުއްތަގީ ވިދާޅުވެއްޖެއެވެ.
އިންޑިއާއަށް ކުރައްވަމުން ގެންދަވާ ދަތުރުފުޅެއްގައި ނިއުދިއްލީގައި ދެއްވި ބަޔާނެއްގައި މުއްތަގީ ވިދާޅުވީ، ޕާކިސްތާނުން ދާދި ފަހުން އަފްޣާނިސްތާނަށް ވައިގެ ހަމަލާތައް ދިނީ ޕާކިސްތާނުގެ ތާލިބާން ހަނގުރާމަވެރިން އަފްޣާނިސްތާނުން ހިމާޔަތް ހޯދައިގެން އަފްޣާނިސްތާނުގައި މަރުކަޒުތައް ހަދައިގެން އުޅޭކަމަށް ބުނެފައެވެ. ނަމަވެސް، ޕާކިސްތާނުގެ ތާލިބާން ހަނގުރާމަވެރިންގެ އެއްވެސް ވުޖޫދެއް އަފްޣާނިސްތާނުގައި ނޯންނާނެ ކަމަށާއި އެ ޖަމާއަތާއި އަފްޣާން ސަރުކާރާ ދެމެދު ވެސް ގުޅުންނެތް ކަމަށް މުއްތަގީ ވިދާޅުވިއެވެ.
މުއްތަގީ ތުހުމަތުކުރެއްވި ގޮތުގައި އަފްޣާނިސްތާނާއި ޕާކިސްތާނުގެ ގުޅުންތައް ޚަރާބުކުރަނީ ޕާކިސްތާނުގެ ބައެއް ޖަމާއަތްތަކުން ކަމަށް ވަރަށް ބޮޑަށް ބެލެވެއެވެ. މުއްތަގީ ވިދާޅުވި ގޮތުގައި ޕާކިސްތާނުގެ ސަލާމަތަށް ނުރައްކާވާ ބައެއް ކަމަށް ދެކެ، އެ ބަޔަކާ ދެކޮޅަށް ޕާކިސްތާނުން ހަނގުރާމަ ކުރަމުންގެންދާ ޖަމާއަތްތަކަކީ ދެ ގައުމުގެ ސަރަހައްދީ ރޮނގު ހުރަސްކޮށް ޕާކިސްތާނުން އަފްޣާނިސްތާނަށް ވަދެގެން އުޅޭ ޕާކިސްތާނުގެ ހިޖުރަވެރިންގެ ގުރޫޕްތަކެކެވެ.
އެ ޖަމާއަތްތަކުގެ ބޭނުމަކީ ދެ ގައުމުގެ ގުޅުންތައް ގަޑުބަޑުކުރުން ކަމަށް މުއްތަގީ ތުހުމަތުކުރެއްވިއެވެ. ނަމަވެސް، މި ޖަމާއަތްތަކާ ބެހޭ އިތުރު ތަފުސީލެއް އޭނާ ނުދެއްވައެވެ.
ޕާކިސްތާނާއި އަފްޣާނިސްތާނުގެ ގުޅުންތައް ވަރަށް ބޮޑަށް ގޯސްވެފައިވާތާ މަސްތަކެއް ވެއްޖެއެވެ. ގުޅުންތައް ގޯސްވަނީ ޕާކިސްތާނުގެ ތާލިބާން ޖަމާއަތުގެ ހަނގުރާމަވެރިން ހިމެނޭގޮތަށް ޕާކިސްތާނުގެ ހަނގުރާމަވެރި ޖަމާއަތްތަކަށް އަފްޣާނިސްތާނުން ހިޔާވަހިކަން ފޯރުކޮށްދޭ މައްސަލައިގައި ކަމަށް ޕާކިސްތާން ބުނެއެވެ.
މި މައްސަލައިގައި ދާދިފަހުން ޕާކިސްތާނުން ވަނީ އަފްޣާނިސްތާނުގެ ވެރިރަށް ކާބުލަށް ވައިގެ ހަމަލާތަކެއް ވެސް ދީފައެވެ. މި ހަމަލާތަކަށް ފަހު ދެ ގައުމުގެ ސިފައިން ވަނީ ސަރަހައްދީ ރޮނގުގައި އިއްޔެ ވަރަށް ވަރުގަދަ ހަމަލާތަކެއް ބަދަލުކޮށްފައެވެ. ދެ ގައުމުގެ ސިފައިން ބަދަލުކުރި މި ހަމަލާތަކުގައި ޕާކިސްތާނު ސިފައިންގެ 23 މީހަކާއި އަފްޣާން ސިފައިންގެ ނުވަ މީހުން މަރުވިކަމަށް އެ ދެ ގައުމު މަސްއޫލުވެރިންނާ ހަވާލާދީ ރޮއިޓާސްއިން ބުނެއެވެ.
ޕާކިސްތާން ބުނާގޮތުން އެ ގައުމު ހަނގުރާމަކުރަނީ ސަރަހައްދީ ރޮނގު ހުރަސްކޮށް އަފްޣާނިސްތާނަށް ވަދެގަނެގެން އުޅޭ ޕާކިސްތާނުގެ ހަނގުރާމަވެރި ޓެރަރިސްޓް ގުރޫޕްތަކާ ދެކޮޅަށެވެ. އެ ގުރޫޕްތަކަކީ ޕާކިސްތާނުގައި ބަޣާވާތް ކުރަމުންދާ އަދި ޓެރަރިޒަމްގެ އަމަލުތައް ހިންގަމުން ގެންދާ ޖަމާއަތްތަކެވެ.
ބޮންއެޅީ ވެސް އަފްޣާން ސިފައިންގެ މަރުކަޒުތަކަކަށް ނޫންކަމާއި އަފްޣާނިސްތާނުގައިވާ ޕާކިސްތާނުގެ ހަނގުރާމަވެރި ޖަމާއަތްތަކުގެ ޓެރަރިސްޓް މަރުކަޒުތަކަށް ކަމަށް ޕާކިސްތާނުން ބުނެއެވެ. ސަރަހައްދީ ރޮނގުގައި ބަދަލުކުރި ހަމަލާތަކުގައި ހަނގުރާމަވެރިންގެ 200 އަށް ވުރެގިނަ މީހުން މަރާލި ކަމަށް ޕާކިސްތާނުން ބުނެފައިވެއެވެ.
ޕާކިސްތާނުން ވަނީ އެ ގައުމުގައި ޕާކިސްތާން ތާލިބާން ހަނގުރާމަވެރިންނަށް އަފްޣާނިސްތާނުގެ ތާލިބާން ސަރުކާރުން ހިޔާވަހިކަން ދޭކަމަށް ތުހުމަތުކޮށްފައެވެ. ރައްދުގައި އަފްޣާނިސްތާނުން ބުނަނީ އެއީ ދޮގެއް ކަމަށާއި ޕާކިސްތާނުން އަފްޣާނިސްތާނާ ދެކޮޅަށް ހިންގަނީ އުދުވާނެއް ކަމުގައެވެ. ޕާކިސްތާނުން ހިންގި މި އުދުވާނުގެ ރައްދުގައި އަފްޣާން ސިފައިން ދިން ހަމަލާތަކުގައި ޕާކިސްތާން ސިފައިންގެ 58 ސިފައިން މަރާލިކަމަށް ތާލިބާން ސަރުކާރުގެ ދިފާއީ ވުޒާރާއިން ނެރުނު ބަޔާނެއްގައި ބުންޏެވެ.
ޕާކިސްތާނުގެ ރަސްމީ މީޑިޔާ ބުނާގޮތުން އަފްޣާނިސްތާނުގެ ސަރަޙައްދީ ރޮނގުގައިވާ ޕާކިސްތާނުގެ ހަ ސަރަޙައްދަކަށް އަފްޣާނިސްތާނުގެ ތާލިބާން ސަރުކާރުގެ ސިފައިން އިއްޔެ ވަރުގަދަ ޙަމަލާތަކެއް ދިނެވެ. އެ ހަމަލާތަކަށް ރައްދު ދިނުމުގެ ގޮތުން ޕާކިސްތާން ސިފައިން އާޓިލަރީ ބަޑިއާއި އެ ނޫން ވެސް ބަރުހަތިޔާރު ބޭނުންކޮށް އަފްޣާން ސަރުކާރުގެ ސިފައިންނަށާއި އަފްޣާނިސްތާނުގައި ހަރަކާތްތެރިވާ ޕާކިސްތާނުގެ ބާޣީ ހަނގުރާމަވެރިންނަށް ވަރުގަދަ ހަމަލާތައް ދީ ފައިވާނެ ކަމުގައެވެ.
މި ހަމަލާތަކަށް ފަހު އަފްޣާނިސްތާނާއި ޕާކިސްތާނުގެ ސަރަހައްދީ ރޮނގުވަނީ ބަންދުކޮށްފައެވެ. މިއީ ގާތްގަނޑަކަށް 2600 ކިލޯމީޓަރުގެ ދިގު ބޯޑަރެކެވެ.