އަންނަ ޑިސެންބަރުން ފެށިގެން މި ސީޒަންގެ ކްރޫޒްލައިނާތައް ރާއްޖެ އަންނަން ހަމަޖެހިއްޖެއެވެ.
ރާއްޖެއަށް ކްރޫޒްލައިނާތައް ގެންނަ ކުންފުނިތައް ތަމުސީލުކުރާ މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް (މާޔާ)ގެ ރައީސް މުހައްމަދު ނަޝީދު 'ސަން'އަށް މިއަދު ވިދާޅުވީ، އެންމެ ފަހުން މި އަހަރު ކްރޫޒްލައިނާއެއް އައީ މިދިޔަ އޭޕްރީލް މަހު ކަމަށެވެ.
އެއަށްފަހު އޮފް ސީޒަން އައިސް، މިމަހު އަލުން ސީޒަން ފެށުނު ކަމަށް ވިޔަސް، ކްރޫޒްލައިނާތައް އަންނަން ފަށަނީ ޑިސެންބަރު ތިނަކުން ފެށިގެން ކަމަށް ނަޝީދު ވިދާޅުވިއެވެ.
މާޔާއިން އަންދާޒާ ކުރާ ގޮތުގައި، 'އަޒަމަރާ ޕާސުއިޓް' ކިޔާ އެ ކްރޫޒްލައިނާއިން ކްރޫއިންނާއެކު، 1،140 ފަތުރުވެރިން އަންނާނެއެވެ.
ކުރިން ކްރޫޒްލައިނާއަކުން އައި ފަތުރުވެރިންތަކެއް މާލޭގައި: މިހާރު ކްރޫޒްލައިނާތަކުން އަންނަ ފަތުރުވެރިން ބާލާނެ ތަނެއް ނެތުމަކީ މާޔާގެ ކަންބޮޑުވުމެއް -- ސަން ފޮޓޯ/ މުހައްމަދު އަފްވާން
އޭގެފަހުން، ދެވަނަ ކްރޫޒްލައިނާ އަންނަނީ ޑިސެމްބަރު 17ގައެވެ. 'އޯޝަން ސައިރީނާ' ކިޔާ ކްރޫޒްލައިނާއިން ގާތްގަނޑަކަށް 1،175 ފަތުރުވެރިން އަންނާނެ ކަމަށް މާޔާއިން ލަފާކުރެއެވެ.
އޭގެ އިތުރަށް ވެސް ކްރޫޒްލައިނާތައް އަންނަން ހަމަޖެހިފައިވާ ކަމަށް މާޔާއިން ބުނެއެވެ.
ޑިސެންބަރުގައި ކްރޫޒްލައިނާތައް އަންނަން ފަށާއިރު، މިހާރު އެ ކްރޫޒްލައިނާތަކުން އަންނަ ފަތުރުވެރިން މާލެއަށް ބާލާނެ ތަނެއް ނެތުމުން ނަޝީދު ކަންބޮޑުވުން ފާޅުކުރެއްވިއެވެ. އެގޮތުން، އެކަން ކުރުމަށް ހުއްދަ ދީފައި އޮންނަނީ އެއް ނަންބަރު ޖެޓީއާއި މަސްވެރިންގެ ޕާކު ސަރަހައްދަށްކަން އޭނާ ފާހަގަކުރެއްވިއެވެ.
ކްރޫޒްޝިޕެއް އައިސްގެން ޕެސެންޖަރުން ބޭލޭނެ އެއްވެސް ކަހަލަ ތަނެއް އަދި ހަމަނުޖެހިފައި އޮތީ. އެއީ އަޅުގަނޑުމެންގެ ވަރަށް ބޮޑު ކޮންސާންއެއްމާޔާގެ ރައީސް މުހައްމަދު ނަޝީދު
އެ ތަންތަނުގައި މަރާމާތުގެ މަސައްކަތްތައް ކުރިއަށްދާތީ ފަތުރުވެރިން އަޔަސް، މާލެއަށް ބާލާނެ ތަނެއް ނެތް ކަން ކަންބޮޑުވުމާއެކު، ނަޝީދު ފާހަގަކުރެއްވިއެވެ.
އެއް ނަމްބަރު ޖެޓީ ސަރަހައްދު ބަންދު ކޮށްފައިވާތީ، އަތޮޅުތެރެއިން އަންނަ ލޯންޗުތައް ބަނދަރު ކުރަނީ މަސްވެރިންގެ ޕާކާ ދިމާލަށެވެ.
އެހެންވެ، އެ ސަރަހައްދުގައި ގިނަ އަދަދެއްގެ ވެހިކަލްތައް ޕާކުކޮށްފައި ހުރެ، ޓްރެފިކް ވެސް ބާރުބޮޑުވާކަން އޭނާ ފާހަގަކުރެއްވިއެވެ.
ކްރޫޒްލައިނާތަކުން އަންނަ ފަތުރުވެރިން މާލެ ފައިބާއިރު ހިޔާވެވޭނެ ފަދަ ތަނެއް ވެސް ނެތި، އިންތިޒާމުތައް ހަމަޖައްސާފައި ނުހުންނާތީ މީގެ ކުރިން ވެސް ޖަމިއްޔާތަކުން ކަންބޮޑުވުން ފާޅުކޮށްފައިވެއެވެ.