އާޓިފިޝަލް އިންޓެލިޖެންސް (އޭއައި) އުފައްދާ ދުނިޔޭގެ އެންމެ ބޮޑު އެއް ކުންފުނި ކަމަށްވާ އޯޕަންއޭއައި އިން، އެ ކުންފުނީގެ އެންމެ ފަހުގެ މޮޑެލް ކަމަށްވާ ޖީޕީޓީ-5.3 އިންސްޓަންޓް އާންމުކުރިތާ އެންމެ ދުވަހެއްގެ ތެރޭގައި، އޭގެ ފަހުގެ އެޑިޝަން ކަމަށްވާ ޖީޕީޓީ-5.4 ގެ ޓީޒާއެއް ދައްކާލައިފިއެވެ.
ބުދަ ދުވަހު އެކްސް މެދުވެރިކޮށް އޯޕަންއޭއައި އިން ކުރި ޕޯސްޓެއްގައި ބުނެފައިވަނީ "5.4 ހީކުރާ ވަރަށް ވުރެ އަވަހަށް" ފެންނާނެ ކަމަށެވެ. މިއީ އެ ކުންފުނިން މޮޑެލްއެއް ނެރުމަށްފަހު، އެއަށްވުރެ ފަހުގެ މޮޑެލްއެއްގެ ޚަބަރު މިހާ އަވަހަށް ދިން ފުރަތަމަ ފަހަރެވެ.
މި ޓީޒާ ދައްކާލުމުގެ އެންމެ ދުވަހެއް ކުރިން، އަންގާރަ ދުވަހު އޯޕަންއޭއައި އިން ވަނީ ޖީޕީޓީ-5.3 އިންސްޓަންޓް ހުރިހާ ޔޫޒަރުންނަށް ބޭނުންކުރެވޭ ގޮތަށް އާންމުކޮށްފައެވެ. މި މޮޑެލްއަކީ މައިގަނޑު ގޮތެއްގައި ލިޔުންތެރިކަމާއި މުއާމަލާތް ކުރުމުގެ ފެންވަރު ރަނގަޅު ކުރުމަށް އަމާޒުކޮށްގެން ނެރުނު މޮޑެލްއެކެވެ. މިގޮތުން، ޖަވާބު ދިނުމުގައި ބޭނުންކުރާ ބޭކާރު އިންޒާރުތައް (ޑިސްކްލެއިމާސް) މަދުކުރުމާއި، އިންޓަނެޓުން ލިބޭ މައުލޫމާތާއި އޭއައިގެ އަމިއްލަ ވިސްނުން އެއްހަމައެއްގައި ހިފެހެއްޓުމަށް މި މޮޑެލްގައި އިސްކަންދީފައިވެއެވެ. އަދި މިއީ އިހުސާސްތަކާއި ހިޔާލީ ލިޔުންތަކަށް ކުރިއަށްވުރެ ބޮޑަށް އަހުލުވެރި މޮޑެލްއެއް ކަމަށްވެސް އެ ކުންފުނިން ބުނެއެވެ.
އޯޕަންއޭއައި އިން މިހާ އަވަސް އަރުވާލައިގެން އައު މޮޑެލްތަކުގެ ޚަބަރު ފަތުރަމުން މިދަނީ، ގާތްގަނޑަކަށް 2.5 މިލިއަން ޔޫޒަރުން ޗެޓްޖީޕީޓީ ބޭނުންކުރުން ހުއްޓާލަން އުޅޭ ކަމަށް ރިޕޯޓުތައް ބުނަމުންދާ ދަނޑިވަޅެއްގައެވެ.
މަސްދަރުތަކުން ބުނާ ގޮތުގައި، ގިނަ އަދަދެއްގެ ޔޫޒަރުން މި ޕްލެޓްފޯމާ ދުރަށް ދާން ބޭނުންވަނީ އެމެރިކާގެ ދިފާއީ ވުޒާރާ (ޕެންޓަގަން) އާއެކު އޯޕަންއޭއައި އިން ވެފައިވާ އެއްބަސްވުމުގެ ސަބަބުންނެވެ. އެ އެއްބަސްވުމުގެ ދަށުން އެމެރިކާ ސަރުކާރަށް އެ ކުންފުނީގެ ޓެކްނޮލޮޖީ ބޭނުންކުރުމުގެ ހުއްދަ ވަނީ ދީފައެވެ.
ޖީޕީޓީ-5.4 ރަސްމީކޮށް ނެރޭނެ ތާރީޚެއް އޯޕަންއޭއައި އިން އަދި ހާމަކޮށްފައެއް ނުވެއެވެ. ނަމަވެސް މިއީ ކުރީގެ މޮޑެލްތަކަށްވުރެ މާ ފުރިހަމަ އަދި ގާބިލު މޮޑެލްއަކަށް ވާނެ ކަމަށް ބެލެވެއެވެ.