ރަމަޟާން މަހަކީ ތާޒާ މޭވާ ބޭނުންކޮށްގެން ރޯދަވީއްލާ ވަގުތަށް އެކި ވައްތަރުގެ ޖޫސްތަކުން ސުފުރާމަތި ފަޅުފިލުވާލާ މައްސަރެކެވެ.
އެގޮތުން އަލަނާސި ޖޫހަކީ ވެސް ވަރަށް ގިނަ ދިވެހީންގެ މެދުގައި މަގުބޫލު ބުއިމެކެވެ. ތާޒާ އަލަނާސި ނުލިބިއްޖެނަމަ ދަޅުގައި ބަންދުކޮށްފައި ހުންނަ އަލަނާސި ބޭނުންކޮށްގެން ޖޫސް ތައްޔާރުކުރާ މީހުންވެސް މަދެއް ނޫނެވެ.
އަލަނާސީގައި ހުންނަ ސިއްހީ ފައިދާތަކަށް ބަލާއިރު މި މޭވާއަކީ ވިޓަމިން ސީ، މެންގަނީޒް އަދި އެންޒައިމް ފަދަ ހަށިގަނޑަށް ފައިދާހުރި އެތައް މާއްދާތަކަކުން މުއްސަނދިވެފައިވާ މޭވާއެކެވެ.
އަލަނާސި އަކީ ވަރަށް ފަސޭހައި ހެދޭ މޭވާއެއް. މިއީ މިހާރު ރާއްޖޭގެ ގޭގޭގައި ވެސް ގިނަ ބަޔަކު ހައްދައިއުޅޭ މޭވާގެ ބާވަތެއް--ފޮޓޯ/ޕިންޓްރެސްޓް
އަލަނާސި ކެއުމުގެ ސަބަބުން ދިފާއީ ނިޒާމު ވަރުގަދަވުމާއި، ކެންސަރުގެ ނުރައްކާ ކުޑަވުމުގެ އިތުރުން، އޮޕަރޭޝަންތަކަށްފަހު ފާރު ފަސޭހަވުމަށް އެހީތެރިވެދޭ ކަމަށް އެމެރިކާގެ ޓެކްސަސްއަށް ނިސްބަތްވާ ޑރ.އެންޖެލިކާ ބަލިންގިޓް، މުތާލިއާކުރައްވާފައިވާ ލިޔުމެއްގައި ބަޔާންކުރައްވާފައިވެއެވެ. ޑރ.އެންޖެލިކާ އަކީ ޓެކްސަސްގެ ގިނަ ބައެއްގެ އިތުބާރު ހޯއްދަވާފައިވާ އިންޓާނަލް މެޑިސިން ފިޒީޝަންއެކެވެ.
ހޫނު މާހައުލުގައި ފަސޭހައިން ހެއްދޭ އަލަނާސި އަކީ މީގައި އެކުލެވޭ އެންޓިއޮކްސިޑެންޓްތަކާއި އެންޒައިމްތަކުގެ ސަބަބުން ހަށިގަނޑުގެ ދުޅަހެޔޮކަން އިތުރުކޮށްދީ ބަލިތަކުން ރައްކާތެރިކޮށްދޭ މޭވާއެކެވެ. މި މޭވާއިން ޖޫސް ތައްޔާރުކުރުމުގެ އިތުރުން ރޯކޮށް، ފިހެގެން ނުވަތަ ގްރިލްކޮށްގެން ވެސް ބައެއް މީހުން މި މޭވާ ބޭނުންކުރެއެވެ.
ޖޫސް ތައްޔާރުކުރުމުގެ އިތުރުން އަލަނާސި އަކީ ސެލެޑް ތައްޔާރުކޮށްލަން ވެސް ވަރަށް ގިނަ ބަޔަކު ބޭނުންކުރާ މޭވާއެއް--ފޮޓޯ/ޕިންޓްރެސްޓް
އަލަނާސީގައި އެކުލެވޭ މުހިއްމު މާއްދާތަކުގެތެރޭ ވިޓަމިން ސީ، ވިޓަމިން ބީ6، ކޮޕަ، ޕޮޓޭސިއަމް، މެގްނީޒިއަމް އަދި ދަގަނޑުގެ މާއްދާ ހިމެނެއެވެ. ޚާއްޞަކޮށް މީގައި ހުންނަ ވިޓަމިން ސީ އަކީ ދިފާއީ ނިޒާމު ވަރުގަދަކުރުމަށާއި، ދަގަނޑުގެ ބައި ހަށިގަނޑަށް ދަމައިގަތުމަށް ވަރަށް މުހިންމު މާއްދާއެކެވެ.
އަލަނާސި ކެއުމުން ހަށިގަނޑަށް ލިބިދޭ މުހިއްމު ފައިދާތަކުގެތެރޭ، ހަށިގަނޑުގެ ސެލްތަކަށް ލިބޭ ގެއްލުންތަކުން ރައްކާތެރިކޮށްދީ، ހިތުގެ ބަލިތަކުން ދުރުކޮށްދިނުމާއި ހަޖަމުކުރުމަށް އެހީތެރިވުން ހިމެނެއެވެ. އަދި ކެންސަރުގެ ނުރައްކާ ކުޑަކުރުމާއި ދިފާއީ ނިޒާމު ވަރުގަދަކޮށްދިނުމަށް އެހީތެރިވުމާއި ހުޅުހުޅުގެ ބަލިތަކަށް ލުއިލިބުން ހިމެނެއެވެ.
މީގެއިތުރުން އަލަނާސި ކެއުމުން ނުވަތަ އޭގައި ހުންނަ ބްރޯމެލައިން ބޭނުންކުރުމުން، އޮޕަރޭޝަނަށްފަހު ހަށިގަނޑުގައި އުފެދޭ ދުޅަޔާއި، ނޫފައިގަތުމާއި، ތަދު ކުޑަކޮށްދީ އަވަހަށް ފަސޭހަވުމަށް މަގުފަހިވާ ކަމަށް ވެސް ޑރ.އެންޖެލިކާގެ ލިޔުމުގުއި ފާހަގަކުރައްވާފައިވެއެވެ.
އާންމު ގޮތެއްގައި އަލަނާސިއަކީ ކެއުމުގައި ހިމެނުން ރައްކާތެރި މޭވާއެކެވެ. ނަމަވެސް، މި މޭވާ މާ ގިނައިން ކެއުމުގެ ސަބަބުން ދުލުން ދިލަނަގާ، ހިރުވުން ނުވަތަ މޭ ނުބައިކުރުން ފަދަ ކަންކަން ދިމާވެއްޖެނަމަ ޑޮކްޓަރެއްގެ އެހީތެރިކަން ވީހާވެސް އަވަހަށް ހޯދަން ވާނެއެވެ.
ބައެއް މީހުން އަލަނާސި ކެއުމުން އެލާޖިކް މައްސަލަ ކުރިމަތިވެދާނެތީ އެކަމަށް ކުރިން ސަމާލުވުން ވެސް މުހިއްމެވެ.