ތެހެރާން (10 މެއި 2026): އީރާނާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް އެއްބާރުލުން ދޭ ގައުމުތަކުގެ ބޯޓުތަކަށް ހުރުމުޒު ކަނޑުއޮޅި ހުރަސްކުރަން ވަރަށް ބޮޑެތި ދަތިތައް ކުރިމަތިވާނެ ކަމަށް އީރާނުން ބުނެފިއެވެ.
އީރާނުގެ ރިވޮލިއުޝަނަރީ ގާޑުންގެ ކަނޑުގެ ބާރުތަކުގެ ކޮމާންޑާ ހަވާލާދީ އެ ގައުމުގެ ތަސްނީމް ނޫސް އެޖެންސީ ޚަބަރު ދޭ ގޮތުގައި އީރާނާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް ބޯލަނބައި، އެ ފިޔަވަޅުތައް ތަންފީޒުކުރަން އެއްބާރުލުންދޭ ގައުމުތަކުގެ މަދަނީ އަދި އަސްކަރީ ބޯޓުތަކަށް ހުރުމުޒު ކަނޑުއޮޅި ހުރަސް ނުކުރެވޭނެއެވެ. ހުރަސްކުރެވުނަސް އެކަން ކުރެވޭނީ އީރާނާ ވާހަކަދައްކައިގެން އެ ކަމަށް ބޮޑު ފީއެއް އީރާނަށް ދެއްކުމަށް ފަހުގައެވެ.
އެ ނޫން ގައުމުތަކުގެ ބޯޓުތަކަށް އާދައިގެ ގޮތަށް ޓޯލް ފީއެއް ދައްކައިގެން ހުރުމުޒު ކަނޑުއޮޅި ހުރަސްކުރުމުގެ ފުރުސަތު އީރާނުން ދޭނެއެވެ. ގަލްފުގެ ގައުމުތަކަށް ވެސް އޮންނާނީ މި ގޮތް ކަމަށާއި ނަމަވެސް ގަލްފުގެ ގައުމުތައް އެމެރިކާގެ އަސްކަރީ ވުޖޫދަށް ފުރުސަތު ނުދޭނަމަ އެއްވެސް ފީއަކާ ނުލައި އަމާންކަމާ އެކު ހުރުމުޒު ކަނޑުއޮޅި ހުރަސްކުރުމުގެ ފުރުސަތު އީރާނުން އެ ގައުުމުތަކަށް ދޭނެއެވެ. ގަލްފުގެ އަރަބި ހުރިހާ ގައުމުތަކެއްގައި ވެސް އެމެރިކާގެ އަސްކަރީ ބޭސްތައް އެބަހުއްޓެވެ.
އީރާނުގެ ޕާލަމެންޓްގެ ތަރުޖަމާން ވިދާޅުވި ގޮތުގައި ޕާލަމެންޓުން މިހާރު ގެންދަނީ ހުރުމުޒު ކަނޑުއޮޅި ހުރަސްކުރުމުގެ ފުރުސަތު ދޭނެ ގައުމުތަކާއި ނުދޭނެ ގައުމުތަކާ ބެހޭ ޚާއްސަ ބިލަކަށް ބަހުސުކުރަމުންނެވެ. މީގެ ކުރިން އީރާނުގެ ޕާލަމެންޓުންވަނީ ހުރުމުޒު ކަނޑުއޮޅި ހުރަސްކުރާ އުޅަނދުތަކުން ފީ ނެގުމާ ބެހޭ ބިލެއް ވެސް ފާސްކޮށްފައެވެ. މި ބިލު މިހާރު ވަނީ ގާނޫނަކަށްވުމުގެ މަގުމަތީގައެވެ.
މި ގާނޫނު ތަންފީޒުކުރުމަށް ތައްޔާރުވުމުގެ ގޮތުން އީރާނުގެ ސަރުކާރުންވަނީ ހުރުމުޒު ކަނޑުއޮޅި ހުރަސްކުރާ އުޅަނދުތަކުން ފީ ނެގުމުގެ ކަންތައްތައް މެނޭޖްކުރާ ޚާއްސަ އިދާރާ އެއްވެސް މިހާރު އުފައްދާފައެވެ. މި އިދާރާއިން މިހާރު ގެންދަނީ ހުރުމުޒު ކަނޑުއޮޅި ހުރަސްކުރާ ބޯޓުތަކުން ޓޯލް ފީއެއް ނަގަމުންނެވެ. މިކަން މިހާރު ކުރަނީ އީރާނުގެ ރައީސް ނެރުއްވި ރިޔާސީ އަމުރެއްގެ ދަށުންނެވެ. މި ކަމާ ބެހޭ ގާނޫނު ވުޖޫދަށް އައުމާ އެކު މި އަމުރުގެ ބަދަލުގައި ދެން މިކަންކުރާނީ މި ދެންނެވި ގާނޫނުގެ ދަށުން ކަމަށް އީރާން ސަރުކާރުން ބުނެއެވެ.
އީރާނުން ހުރުމުޒު ކަނޑުއޮޅީގެ ފުލް ކޮންޓްރޯލް ނަގާފައިވާ މައްސަލައިގައި އެމެރިކާއާއި ޔޫރަޕްގެ ގައުމުތައް ވަނީ ވަރަށް ބޮޑަށް ރުޅިއައިސްފައެވެ. މިއާއެކު ގަދަބާރުން ހުރުމުޒު ކަނޑުއޮޅި ހުޅުވުމަށްޓަކައި އެމެރިކާއިން ޚާއްސަ އަސްކަރީ އޮޕަރޭޝަނެއް ވެސް ފެށިއެވެ. ނަމަވެސް، އީރާނުން މި އޮޕަރޭޝަނަށް ހުރަސްއެޅުމުން އެމެރިކާއިން ވަނީ މި އޮޕަރޭޝަން ހުއްޓާލާފައެވެ.