ޒިންމާދާރު އިދިކޮޅު އެއްވެސް ބައެއް މި ގައުމުގައި މިވަގުތު ނެތް ކަމަށާއި، ޒިންމާދާރު އިދިކޮޅެއް ސަރުކާރުގެ ހުރިހާ ސިޔާސަތުތަކަށް ދެކޮޅު ނަހަދާނެ ކަމަށް ވިދާޅުވެ، އިދިކޮޅު ފަރާތްތަކަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ދައުލަތުގެ މީޑިއާ ޕީއެސްއެމްގެ "ނޭޝަން ޗެޓް"ގައި ވާހަކަފުޅު ދައްކަވަމުން ރައީސް ވިދާޅުވީ، މި ސަރުކާރުން މަސައްކަތްކުރަނީ ހުރިހާ މާނައެއްގައި ވެސް ރައްޔިތުންނަށް ހެވާއި ލާބަ ހޯދައިދިނުމަށް ކަމަށާއި، ރައްޔިތުންނަކީ ފުދުންތެރި އަދި ދުޅަހެޔޮ ބަޔަކަށް ހެދުމަށް ކަމަށެވެ.
އެ މަސައްކަތައިގެން މި ސަރުކާރުން ދާނީ ކުރިއަށް ކަމަށް، ރައީސް ވިދާޅުވިއެވެ.
އިދިކޮޅު ފަރާތްތަކުން ކުރަންޖެހޭ މަސައްކަތްތައް ކުރުމުގައި އެއްވެސް ހުރަހެއް ނޯންނާނެ ކަމަށް ވިދާޅުވެ، ރައީސް ވިދާޅުވީ، އިދިކޮޅު ބައެއް ފަރާތްތަކުން ދެކޮޅުނުޖެހޭ ވާހަކަ ދެއްކޭ ކަމަށާއި، އެކަން އެހެން ވަނީ ސަރުކާރުގެ ސިޔާސަތުތަކުގެ ހަގީގަތް ނުބެލޭތީ ކަމަށެވެ. އެހެން ވިދާޅުވެ، އެމަނިކުފާނު ވަނީ، ޒިންމާދާރުކަމާއެކީ މަސައްކަތްކުރުމަށް އިދިކޮޅު ފަރާތްތަކުގެ ކިބައިން އެދިވަޑައިގެންފައެވެ.
"މި ގައުމުގައި ނެތީ ޒިންމާދާރު އޮޕޮޒިޝަނެއް މިހާރު، ޒިންމާދާރު އޮޕޮޒިޝަނަކީ ސަރުކާރު ޖަވާބުދާރީކުރުވާނެ ބަޔަކަށް ވާނެ، އަދި ސަރުކާރުން ރައްޔިތުންނަށް ފައިދާހުރި ކަމެއް ކުރާ ނަމަ، ގައުމަށް ފައިދާހުރި ކަމެއް ކުރާ ކަމަށް ވަންޏާ، އެކަން އެކްނޮލެޖްކޮށް އެކަމަށް އެއްބާރުލުން ވެސް ދޭ ބަޔަކަށް ވާނެ،" ރައީސް ވިދާޅުވިއެވެ.
ދިވެހިރާއްޖޭގައި ޑިމޮކްރަސީ ފައްކާކުރަންޏާ އިދިކޮޅު ފަރާތްތައް ޒިންމާދާރުވާންޖެހޭ ކަމަށް ވިދާޅުވެ، ރައީސް ވިދާޅުވީ އެކަކު އަނެކަކުގެ ކިބައިން ބަދަލުހިފުމުގެ ރޫހާއި އަމިއްލަ މީހާއަށް މޮޅު ގޮތް ހޯދުމަކީ އިސްކުރަންވީ ކަންތައްތަކެއް ނޫން ކަމަށެވެ. ސަރުކާރު ޒިންމާދާރުކުރެވޭނީ ގައުމީ ވިސްނުމެއްގައި ކުރިއަށް ދިއުމުން ކަމަށް، ރައީސް ވިދާޅުވިއެވެ.
އެމަނިކުފާނަށް މުހިއްމީ ރާއްޖެއާއި، ހަމަހަމަކަމާއެކީ ރައްޔިތުންނަށް ޚިދުމަތްކުރެއްވުމާއި، ގާނޫނުއަސާސީއާއި ގާނޫނާއި ގަވައިދު ނަގަހައްޓައި އިސްލާމްދީނަށް ނަސްރުދިނުން ކަމަށް ވިދާޅުވާ ވިދާޅުވުން ރައީސް އަނެއްކާވެސް ތަކުރާރުކުރެއްވިއެވެ.
"ދެން މި ގައުމުގައި ހަމަޖެހުން ގާއިމްކުރުމަށް ހުރަސްއަޅަން ބައެއް ފަރާތްތަކުން އެ ކުރާ މަސައްކަތްތަކަކީ އެއީ ޒިންމާދާރުކަމެއް ނޫން ކަމާއި، އެއީ ޑިމޮކްރަސީގެ ހަމައެއްވެސް ނޫން ކަމާއި، އެ ކަންކަމަކީ އަމުދުން އިޚްލާސްތެރިކަމެއް އޮތް ކަމެއްނޫންކަން، އެއީ ރައްޔިތުން ދެނެގަންނަންވީ ކަމެއްކަން، އަޅުގަނޑު ޔަގީންކުރަނީ އެގޮތުގަ ރައްޔިތުން އެކަން ގަބޫލުކުރައްވާނެ ކަމަށް،" ރައީސް ވިދާޅުވިއެވެ.