އެމްޑީޕީއަކީ ރާއްޖޭގައި އޮތް އެންމެ ވަރުގަދަ ސިޔާސީ ޕާޓީ ކަމަށްވި ނަމަވެސް ޕާޓީގެ ވަރުގަދަކަން ދެމިއޮންނާނީ އެންމެން އެކަތިގަނޑަކަށް ވެގެން ކަމަށާއި އެގޮތުން ދެން ކުރީގެ ރައީސް މުޙައްމަދު ނަޝީދާއި ރައީސް އިބްރާހީމް މުޙައްމަދު ސޯލިހަށް ވެސް އެމްޑީޕީ ދޫކޮށް ވަޑައިނުގެންނެވޭނެ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެއެވެ.
ފައްޔާޒު މިފަދައިން ވިދާޅުވީ ރައީސް ނަޝީދާއެކު ޗެއާޕާސަން އިންތިޚާބުގެ ކެމްޕެއިނަށް ފ. ބިލެއްދޫއަށް ކުރެއްވި ޒިޔާރަތުގައި އެ ރަށުގެ އެމްޑީޕީ މެމްބަރުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
މި ބައްދަލުވުމުގައި މެމްބަރަކު ވަނީ ޗެއާޕާސަންގެ މަގާމަށް ހޮވިވަޑައިނުގެންފި ނަމަ ޕާޓީ ދޫކޮށް ވަޑައިގަންނަވާނެތޯ ރައީސް ނަޝީދާ ސުވާލު ކުރައްވާފައެވެ. އެ ސުވާލުގެ ޖަވާބުގައި ނަޝީދު ވިދާޅުވީ އިންތިޚާބުން ނާކާމިޔާބުވި ނަމަވެސް ޕާޓީ ދޫކޮށް ވަޑައިނުގަންނަވާނެ ކަމަށާއި، އެހެން ނަމަވެސް އެ ހާލަތުގައި ހުންނަވާނީ ގޭގައި ކަމަށެވެ.
މި ވާހަކަފުޅަށް އިތުރު ތަފްސީލު ދެއްވަމުން ފައްޔާޒް ވިދާޅުވީ ޕާޓީ އެކަތިގަނޑެއްގެ ގޮތުގައި ބޭއްވުމަކީ ކޮންމެ މެމްބަރެއްގެ ވެސް ޒިންމާއެއް ކަމަށެވެ. އަދި މީގެ ކުރިން ޕާޓީގެ ކަންކަން ރަނގަޅު ކުރަން އެންމެ އެކަށީގެންވާ ޖޯޝުގައި މަސައްކަތް ނުކުރެވުމަކީ ހެދުނު ގޯހެއް ކަމަށް އޭނާ އިއުތިރާފުވެވަޑައިގަތެވެ. ނަމަވެސް މިހާރު ހުންނެވީ އާ އަޒުމެއްގައި ޕާޓީ ކުރިއަށް ގެންދަން ކަމަށް ފައްޔާޒް ވިދާޅުވިއެވެ.
"އަޅުގަނޑުމެން އަލުން އަނބުރާ ތެދުވެވޭނީ އެންމެން އެއްކޮށް ތިބެގެން. އަޅުގަނޑުމެންނަކީ ވެސް ޕާޓީގެ ތެރޭގައި ބަސްވިކޭ މީހެއް. ނަމަވެސް ހެއްދެވުނު ގޯހަކީ ޕާޓީގެ ކަންކަން ރަނގަޅު ކުރަން އަސްލު ޖޯޝުގައި މަސައްކަތް ނުކުރެވުން. އެހެން ނަމަވެސް މިހާރު މިހުންނެވީ ކުރިއަށް ދާން. ދެން ރައީސް ނަޝީދުއަށް ވެސް އަދި ރައީސް ޞާލިހަށް ވެސް އެމްޑީޕީ ދޫކޮށް ނުދެވޭނެ." ފައްޔާޒް ވިދާޅުވިއެވެ.
މީގެ އިތުރުން، ރައީސް ނަޝީދަށް ވެސް އެމްޑީޕީ ރޫޅާނުލެވުނު ކަމަށާއި، ނަމަވެސް ވޭތުވެދިޔަ ތަނުގައި ޕާޓީ ވަރަށް ބޮޑަށް ނިކަމެތިވެގެން ދިޔަކަން ފައްޔާޒް ފާހަގަކުރެއްވިއެވެ. އޭނާ ވިދާޅުވީ ދެން އެއްވެސް ބޭފުޅަކަށް ޕާޓީ ދޫކޮށް ވަޑައިގަތުމުގެ ފުރުސަތު ނުދެއްވާނެ ކަމަށެވެ.