މެޓާ ކުންފުނިން، އިންސްޓަގްރާމް ބޭނުންކުރާ ފަރާތްތަކަށް އެހީތެރިވުމަށް ތައާރަފްކުރި އާޓިފިޝަލް އިންޓެލިޖެންސް (އޭއައި) ސަޕޯޓް ޗެޓްބޮޓަށް ދިމާވި ސެކިއުރިޓީ ބަލިކަށިކަމެއްގެ ފައިދާ ނަގައި، ހެކަރުން އިންސްޓަގްރާމްގެ ވަރަށް މަތީ ފަންތީގެ އެކައުންޓްތަކެއް ހެކްކޮށްފިއެވެ.
މި ހާދިސާގައި ހެކްކޮށްފައިވާ އެކައުންޓްތަކުގެ ތެރޭގައި އެމެރިކާގެ ކުރީގެ ރައީސް ބަރަކް އޮބާމާގެ ވައިޓް ހައުސް ޕޭޖާއި، މަޝްހޫރު މޭކަޕް ބްރޭންޑް "ސެފޯރާ" ގެ އެކައުންޓްގެ އިތުރުން އެމެރިކާގެ ސްޕޭސް ފޯސްގެ އިސް އޮފިޝަލެއްގެ އެކައުންޓް ހިމެނެއެވެ.
ސައިބާ ސެކިއުރިޓީ މާހިރުން ހާމަކުރި ގޮތުގައި ހެކަރުން މިހަމަލާދީފައިވަނީ "ޕްރޮމްޕްޓް އިންޖެކްޝަން" ކިޔާ ހަމަލާއެއްގެ ޒަރީއާއިންނެވެ. މި ހަމަލާގައި ހެކަރުން ވަނީ އެކައުންޓްގެ ވެރިފަރާތަކީ ކާކުކަން ކަށަވަރު ނުކޮށް، އެކައުންޓްތަކުގެ ޕާސްވޯޑް ރިސެޓްކޮށްދިނުމަށް އޭއައި ސަޕޯޓް ބޮޓަށް މަޖުބޫރުކުރުވައި، އޭގެ ކޮންޓްރޯލް އަތުލާފައެވެ. މީގެ ސަބަބުން ސެކިއުރިޓީ ވަރުގަދަކުރަން ހެދި މި ޓޫލް، އެކައުންޓްތަކަށް ވަނުމަށް ހެކަރުންނަށް ލިބުނު ބޮޑު ދޮރަކަށް ވެގެންދިޔައެވެ.
މިޚަބަރާއެކު މެޓާ ކުންފުނީގެ ހިއްސާގެ އަގު ވަނީ ފަހެއް އިންސައްތައަށްވުރެ ބޮޑަށް ދަށަށް ގޮސްފައި ----
މި ހާދިސާއާ ގުޅިގެން މެޓާ ކުންފުނިން ބުނެފައިވަނީ މިހާރު އެ މައްސަލަ ހައްލުކޮށް، ގެއްލުންވި އެކައުންޓްތައް ރައްކާތެރިކޮށްފައިވާ ކަމަށެވެ. ނަމަވެސް، މި ހެކްގެ ޚަބަރާއެކު އިންވެސްޓަރުންގެ މެދުގައި ކަންބޮޑުވުން އުފެދި، މެޓާ ކުންފުނީގެ ހިއްސާގެ އަގު ވަނީ ފަހެއް އިންސައްތައަށްވުރެ ބޮޑަށް ދަށަށް ގޮސްފައެވެ. ގިނަ ބަޔަކު ތުހުމަތުކުރާ ގޮތުގައި މެޓާ އިން ވަޒީފާތަކުން މުވައްޒަފުން ވަކިކޮށް، އިންސާނީ އެހީތެރިކަމުގެ ބަދަލުގައި އޭއައިއަށް މާ ބޮޑަށް ބަރޯސާވާން ފެށުމަކީ މިފަދަ މައްސަލައެއް ދިމާވާން މެދުވެރިވި ސަބަބެކެވެ.
މި މައްސަލައަކީ ހަމައެކަނި މެޓާއަށް ދިމާވި މައްސަލައެއް ނޫން ކަމަށާއި، ދުނިޔޭގެ އެކި ކުންފުނިތަކުން އޭއައި އެޖެންޓްތަކަށް ބޮޑެތި ބާރުތައް ދެމުންދާއިރު ސެކިއުރިޓީއަށް އެކަށީގެންވާ ސަމާލުކަމެއް ނުދެވޭކަން މާހިރުން ފާހަގަކުރެއެވެ. ޓެކްނޮލޮޖީ ދިރާސާކުރާ ފަރާތްތަކުން ބުނާ ގޮތުގައި ކުރިން އިންސާނުންނަށް އަމާޒުކޮށްގެން ސްކޭމްތައް ހިންގި ނަމަވެސް، މިހާރު ހެކަރުންގެ އަމާޒަކަށް ވެފައިވަނީ އޭއައި ސިސްޓަމްތައް އޮޅުވާލައިގެން ބޮޑެތި ފައިދާތައް ހޯދުމެވެ.