މާލެ ސަރަހައްދުން މިދިޔަ ހަފުތާގައި ފަސް މީހަކަށް ހިމަބިހި ޖެހި، މިއަހަރުގެ މިހާތަނަށް ރާއްޖޭން ހިމަބިހި ޖެހުނު މީހުންގެ އަދަދު ވިއްސަށް އިތުރުވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އާންމުކުރި މައުލޫމާތުގައިވަނީ، މިދިޔަ ހަފުތާގައި ފަސް މީހަކަށް މާލޭން ހިމަބިހި ޖެހި، މިއަހަރުގެ މިހާތަނަށް ހިމަބިހި ޖެހުނު މީހުންގެ އަދަދު ވިއްސަށް އިތުރުވެއްޖެ ކަމަށެވެ. ހިމަބިއްސަށް ފައްސިވި މީހުންގެ ތެރޭ ގިނައީ 18އަހަރުން މަތީ މީހުން ކަމަށް، އެޗްޕީއޭއިން ބުންޏެވެ.
ހިމަބިއްސަށް ފައްސިވި މީހުންގެ ތެރޭ ގިނައީ ދިވެހިން ކަމަށް އެޗްޕީއޭއިން ބުނި ނަމަވެސް، ސީދާ ޖެހުނީ ކިތައް ދިވެހިންނަށްކަން ހާމަ ނުކުރެއެވެ.
މިހާތަނަށް ހިމަބިއްސަށް ފައްސިވީ މީހުންގެ ތެރޭ ޖުމުލަ 489 ކޮންޓެކްޓެއް ފާހަގަކުރެވިފައިވާ ކަމަށާއި، އޭގެ ތެރެއިން 88 ކޮންޓެކްޓެއް ގާތުން ބަލަމުން އަންނަ ކަމަށް، އެޗްޕީއޭއިން ބުންޏެވެ.
އެ އިދާރާއިން ވަނީ، ހިމަބިހި ފެތުރުން ހުއްޓުވުމަށްޓަކައި ކަމާބެހޭ ފަރާތްތަކާ ގުޅިގެން ކުރާ ބައެއް މަސައްކަތްތަކަށް އަލިއަޅުވައިލައިފައެވެ. އެގޮތުން ހިމަބިހި ޖެހިފައި ހުރި ކަމަށް ޝައްކުކުރެވޭ މީހުން އަވަހަށް ދެނެގަނެ ރިޕޯޓުކުރުމަށްޓަކައި، ހުން އައިސް ހަމުގައި ބިހި ނަގާ މީހުން ސްކްރީން ކުރާނެ އިންތިޒާމުތައް ވަނީ ގާއިމުކުރެވިފައި ކަމަށް، އެޗްޕީއޭއިން ބުންޏެވެ.
އެޗްޕީއޭއިން ބުނީ، ހިމަބިއްސަށް ފައްސިވީ މީހުންގެ ކޮންޓެކްޓުންގެ ތެރެއިން ވެކްސިން ދެ ޑޯޒް ފުރިހަމަކޮށްފައިނުވާ ފަރާތްތަކަށް ވެކްސިން ދިނުމުގެ މަސައްކަތް ކުރަމުން އަންނަ ކަމަށާއި، އެ މަސައްކަތުގެ ތެރެއިން މިހާތަނަށް 220 ކޮންޓެކްޓުންނަށް ވެކްސިން ދެވިފައިވާ ކަމަށެވެ.
އޭގެ އިތުރުން، ފްރަންޓްލައިންގައި މަސައްކަތްކުރާ ސިއްހީ ޚިދުމަތްތެރިންގެ ތެރެއިން 1،118 ޚިދުމަތްތެރިއަކަށް ވެކްސިން ދެވިފައިވާ ކަމަށް، އެޗްޕީއޭއިން މައުލޫމާތުދެއެވެ.
ފާހަގަކުރެވޭ ގޮތުގައި، ރާއްޖޭގައި ހިމަބިހި ޖެހޭ މިންވަރު އިތުރުވަމުން އަންނަ މި ދަނޑިވަޅުގައި، އެ ބަލި ކޮންޓްރޯލް ކުރުމަށް ދިވެހި ސަރުކާރުން ކުރަމުންދާ މަސައްކަތްތަކަށް އެހީތެރިވުމުގެ ގޮތުން އިންޑިއާ ސަރުކާރުން 20،000 ޑޯޒްގެ ހިމަބިހި ވެކްސިނާއި، ގާތްގަނޑަކަށް 3 ޓަނުގެ ސިއްހީ ސާމާނު މިދިޔަ ބުރާސްފަތި ދުވަހު ހަދިޔާކޮށްފައިވެއެވެ.