ފްރާންސް ގައުމީ ފުޓްބޯޅަ ޓީމުގެ ކާމިޔާބު ކޯޗު ޑިޑިއޭ ޑެޝޯމްޕްސްގެ މަންމަ ކުއްލި ގޮތަކަށް މަރުވުމާއި ގުޅިގެން، ޖަނާޒާގެ ކަންކަމުގައި ބައިވެރިވުމަށްޓަކައި އޭނާ އެނބުރި ގައުމަށް ދާން ނިންމާފައިވާ ކަމަށް ފްރާންސްގެ ފުޓްބޯޅަ ފެޑެރޭޝަނުން (އެފްއެފްއެފް) އިން ހާމަކޮށްފިއެވެ.
މި ހިތާމަވެރި ހާދިސާއާ ގުޅިގެން، 2026 ގެ ވޯލްޑް ކަޕްގެ ގްރޫޕް "އައި" އެއްގައި ނޯވޭއާ ދެކޮޅަށް ފްރާންސް ކުޅޭ ގްރޫޕް ސްޓޭޖުގެ ފަހު މެޗުގައި ޓީމަށް އިރުޝާދު ދިނުމުގެ ފުރުސަތު ޑެޝޯމްޕްސްއަށް ވަނީ ގެއްލިފައެވެ.
އެފްއެފްއެފްއިން ނެރުނު ރަސްމީ ބަޔާނެއްގައި ބުނެފައިވަނީ، މަންމަ މަރުވި ހިތާމަވެރި ޚަބަރު ޑެޝޯމްޕްސްއަށް ލިބުނީ އިއްޔެ ހެނދުނުގެ ވަގުތެއްގައި ކަމަށެވެ.
އެހެންކަމުން، ކުރިއަށްއޮތް މެޗަށް ތައްޔާރުވުމުގެ ގޮތުން ބާއްވާ ފަހުގެ ތަމްރީނުތަކުގައިވެސް އޭނާ ބައިވެރިނުވާނެ ކަމަށާއި، އަންނަ ހުކުރު ދުވަހު ކުޅުމަށް ހަމަޖެހިފައިވާ މެޗުގައި ފްރާންސްގެ ބެންޗުން އޭނާ ނުފެންނާނެ ކަމަށް އެ ފެޑެރޭޝަނުން ކަށަވަރުކޮށްދެއެވެ.
މި ނިންމުމަކީ އެފްއެފްއެފްގެ ރައީސް ފިލިޕް ޑިއާލޯއާއެކު ކުރެވުނު މަޝްވަރާތަކަށްފަހު، މި ދަނޑިވަޅުގައި އާއިލާއަށް ވަގުތު ދިނުމުގެ ގޮތުން ނިންމި ނިންމުމެކެވެ.
ޑެޝޯމްޕްސް އެނބުރި ގައުމަށް ދިއުމާ ގުޅިގެން، އޭނާ އެނބުރި ޓީމާ ގުޅެންދެން ހެޑް ކޯޗެއްގެ ހުރިހާ މަސްއޫލިއްޔަތުތަކާއި ޓީމުގެ ފުރިހަމަ ކޮންޓްރޯލް މިހާރު ވަނީ އެސިސްޓަންޓް ކޯޗު ގައި ސްޓެފަންއާ ހަވާލުކޮށްފައެވެ.
ސްޓެފަންގެ އިރުޝާދުގެ ދަށުން ނޯވޭއާ ދެކޮޅަށް ފްރާންސް ނިކުންނައިރު، އެ ޓީމަށް މާ ބޮޑު ފިއްތުންތަކެއް ނެތެވެ. ސަބަބަކީ މުބާރާތުގެ ފުރަތަމަ ދެ މެޗުގައި ސެނެގޯލް އަތުން 3-1 އިން އަދި އިރާގު އަތުން 3-0 ގެ ނަތީޖާއަކުން މޮޅުވެ، ފްރާންސް މިހާރުވެސް ވަނީ މުބާރާތުގެ ދެވަނަ ބުރުން ޖާގަ ކަށަވަރުކޮށްފައެވެ.