"ތިބާއަށް ލިބިފައި ނުވާ ކަންތައްތަކާއިމެދު ނުވިސްނާ ލިބުނު ނިއުމަތްތަކަށް ޝުކުރުކުރާށެވެ.
***
މިލްހާ އެ ދެކުދިންގެ މޫނަށް ނަޒަރު ހިންގައިލިއެވެ. "އެދޫނި ކޮބާ؟"
ރާހާގެ މޫނުމަތީގެ ކުލަވަރު އާދަޔާޚިލާފަށް ސީރީޢަސްވިއެވެ. އޭނާ އަޑު މަޑުކޮށްލިއެވެ. "ސިފްރާން އެ ކާލައިފި...."
މިލްހާ ދެލޯ ބޮޑުކޮށްލިއެވެ. އޭނަގެ ކަންފަތަށް އެ އިވުނީ ހަމަ ރަގަޅަށްހެއްޔެވެ؟ އޭނަ ޔަގީންކުރަން ސުވާލުކޮށްލިއެވެ.
"އޭނާ...ދޫނި ކާލައިފިޔޭ؟"
ރާހާ އަވަސްއަވަހަށް ބޯ ޖަހައިލުމާއެކު ސާރާގެ ނަޒަރު ރާހާއަށް ހުއްޓުނެވެ."ރާހާ............."
"ކިހިނެއްވީ؟" ރާހާ
"އެއީ ބުނަން ޖެހޭ ވާހަކައެއް ނޫނޭ......"
"އަހަރެން ގޯސް އެއްޗެއް ނޫން މި ބުނީ...." ރާހާ ކަޅި ހިންގައިލިއެވެ.
ސާރާ ބުމަ އަރުވައިލި ނަމަވެސް އިތުރު އެއްޗެއް ނުބުނެ ހިމޭންވިއެވެ. މިލްހާ އެ ދެކުދިންނަށް ވިސްނުންތެރިކަމާއެކު ބަލަހައްޓައިގެން އިންއިރު ހަތަރެސްފައި ފިނިވގޮތްވިއެވެ. ސިފްރާން ދޫންޏެއް ކައިލުމަކީ ގަބޫލުކުރެވޭވަރުގެ ކަމެއްނޫނެވެ. މިކުދިން މިހާ ލޯބިއިރުވެސް ދޮގު ހެދުމުގެ ނުބައި އާދަ ހުރީހެއްޔެވެ؟ ކުޑަކުދިން ވާހަކަ ކިޔައިދޭއިރު ބައެއްފަހަރަށް ހަގީގަތަށްވުރެ ބޮޑުކޮށް ކިޔާދީފާނެއެވެ. އޭނާއަށް ނުބައިކޮށް މާނަ ނެގުނީއެވެ. އެއީ ފިޔޮކަކަށްވެސް ވެދާނެއެވެ.
އޭނާ ލުއި ހިނިގަނޑެއް ޖަހައިލިއެވެ. "މާނައަކީ ސިފްރާން އެ ތެލުލައިގެން ނޫނީ ފިހެގެން ކެއީ ދޯ....؟"
ދެކުދިންކުރެ އެކަކުވެސް ޖަވާބެއް ނުދިނެވެ.
"ނުވަތަ..." މިލްހާ ހިނިތުންވެލަމުން އަނެއްކާވެސް މަސައްކަތްކުރީ އެކުދިން ލައްވާ އެކަމުގެ ހަގީގަތް އޮޅުން ފިލުވުމަށެވެ. "ފަހަރެއްގައި އޭނަ އެއީ ފިޔޮކެއް ކަމަށް ހީކޮށް ކަތިލީކަމަށްވެސް ވެދާނެއްނު... ފިޔޮއް ސޫޕް މީރުވާނެ....."
ރާހާ އޭނާގެ މޫނަށް ބަލަހައްޓައިގެން އިނީ ހިމޭންކަމާއެކުގައެވެ.
މިލްހާގެ ތުންފަތުގައިވީ ހިނިތުންވުންވެސް މަޑުމަޑުން ފަނޑުވަމުންދިޔައެވެ. "ރާހާ؟"
ރާހާގެ ޝައުގުވެރިކަން ހުއްޓުނީ އޭނާ ލައިގެން ހުރި ހެދުމުގެ ފަސްބަޔަށެވެ. "ސޮރީ މިލްހާ.....އެ ވާހަކަ ދައްކާކަށް ބޭނުމެއް ނޫން."
"އަހަރެންވެސް ނޫޅެން......"ސާރާވެސް އެއްބައިވިިއެވެ.
އެހިސާބުން އެ މައުޟޫޢު ނިމުނީހެން ހީވިއެވެ.
މިލްހާ އިނީ ހިމޭންވެފައެވެ.. އޭނާ ދެކުދިންގެ މޫނަށް ބަލަމުން ދިޔައީ އެކުދިން އޭނާއާ ސަމާސާކުރީކަމަށް ބުނެ ހޭން ފަށާނެ ވަގުތަކަށެވެ. އެކަކުވެސް އެހެނެއް ނުހަދައެވެ. އަޖައިބެކެވެ. މިކުދިން ކުއްލިއަކަށް ހިމޭޭންވީ ކޮންސަބަބަކާއި ހެދިހެއްޔެވެ؟ އެކި ޚިޔާލުތައް ހިތަށް އަރާ ފައިބަމުން ދިޔައެވެ. އެއީ ކޮން ކަހަލަ ދޫންޏެއް ހެއްޔެވެ؟ ސިފްރާން އެ ކެއީ ކީއްވެހެއްޔެވެ؟ ސިފްރާންއަކީ ކޮންކަހަލަ އިންސާނެއްހެއްޔެވެ؟ އަނެއްކާ އެސައިލަމްއަކުން ނުކުމުގެން އައި މީހެއްހެއްޔެވެ؟ މިގޭގައި މިއުޅޭ ކޮންމެ މީހެއްގެ ސިއްރުތަކެއްވާފަދައެވެ. ކުޑަކުދިންވެސް އާއްމުކޮށް ފެންނަ ކުދިންނާއި ތަފާތެވެ. ޔަގީނުންވެސް އެކުދިން ކޮންމެވެސް ސިއްރެއް ފޮރުވަން މަސައްކަތް ކުރަނީއެވެ. އަނެއްކާ.......... އޭނާ ވަގުތުން ނުބައި ޚިޔާލު ދުރުކޮށްލިއެވެ. ވިސްނަންވާނީ ޕޮޒިޓިވްކޮށެވެ.ނޫނީ ދަނގަނޑު ދަގަތްފާނަށް ދަމާހެން ނުބައި ކަންތައްތައްވެސް ތިމާއާއި ކައިރިވާނެއެވެ.
ކޮންމެ ގޮތެއްވިޔަސް ސިފްރާންއަކީ ތަފާތު މިޒާޖެއްގެ ވެރި ޒުވާނެކެވެ. ފިނި ކެތްތެރިކަން ކުޑަ ދެނެގަންނަން އުނދަގޫ އަދި ބައެއްފަހަރަށް އޭނާ ބަލައިލާ ގޮތުން ބުނަން އުޅުނު އެއްޗެއްވެސް ހަނދާން ނެތޭވަރަށް ބިރުވެރި މީހެކެވެ. އެލޮލާއި ދިމާލަށް ބަލަން އުދަގޫވާފަދަ ލޮލެކެވެ. ނުބައި ޚިޔާލުތަކުން މިލްހާ އަމިއްލަ ނަފުސު ހުއްޓުވަން މަސައްކަތްކުރިއެވެ. އޭނާ ސިފްރާންއާއި ދިމާލަށް ބުނަން އުޅުނީ ކީކޭހެއްޔެވެ؟ ޤާތިލެއް ހެއްޔެވެ؟ ދޫންޏެއް ކެއީމަ ނުބައިމީހަކަށް ވީހެއްޔެވެ؟ އެއީ ކޮންފަދަ ހެއްވާ ޚިޔާލެއްހެއްޔެވެ؟ އޭނާ އަމިއްލަ ނަފުސަށް މަލާމާތްކޮށްފައި ހޭންފެށިޔަސް ހިތުގައިވާ ހަމަޖެހުމާއި އުފާވެރިކަން ކޮންމެވެސް ވަރަކަށް ގެއްލުނެވެ. ސިފްރާންއާއިމެދު ހިތުގައި އުފެދިގަތް ނުބައި ޝައްކުތަކުން ސަލާމަތްކުރެއްވުމަށް އެދި ދުޢާކުރެވުނެވެ.
***
މިލްހާމެން ގެއާއި ހަމަޔަށް ފޯރިއިރު މެންދުރުފަހުގެ އަލި މަޑުވަމުން ދިޔައެވެ. އެގޭގެ ކަޅުކުލައިގެ ހިލަ ފާރުތަކުން އަލި އެޅޭ ބައިތައް ރަން ކުލައެއްގައި ވިދައެވެ. ގަސްތަކުގެ ތެރެއިން ގަނޑުވަރު ފެންނަން ހުރީ އަޖައިބުވާހާ ފުރިހަމަކަމާއެކުގައެވެ. ރީތި މަންޒަރެކެވެ. ޕޯސްޓަރުތަކުން ފެންނަފަދަ ސްކޮޓްލޭންޑްގެ ހަވޭލީއެކެވެ. މިލްހާއަށް އަދިވެސް މި ފެންނަ މަންޒަރުތައް ގަބޫލުކުރަން ދަތިވެފައިވިއެވެ. ހުވަފެނެއްގައި އުޅެވޭފަދައެވެ. އޭނަފަދަ އާދައިގެ އާއިލާއެއްގެ އަންހެންކުއްޖަކު މިފަދަ ގެއެއްގެ ޅީދަރިއަކަށްވުމުގެ ޝަރަފު ލިބުމަކީ ނިއުމަތެކެވެ. ނަމަވެސް ހާރިސް ބުނިފަދައިން އެކައިވެނީގައި ފޮރުވިފައިވާ ސިއްރެއް ވެދާނެކަމާއިމެދު ޝައްކުވާންފެށިއެވެ.
ގެއާ ހަމަޔަށް އޮންނަ ދިގު މަގުގެ ފެށޭ ހިސާބަށް ކާރު މަޑުކުރަން ނާއިލާ ޑްރައިވަރު ކައިރީގައި އެދުނެވެ.
"ޚަރީފު މޫސުމްގައި މިހެން ހިނގާލުމުން ރޫހާއި ހިތަށްވެސް ތާޒާކަން ލިބޭ. ފިނި މޫސުމް ފެށުނީމަ މިފަދަ ހިނގާލުންތަކުން އަހަރެމެންނަށް އުފަލެއް ނުލިބޭނެ......."ނާއިލާ ކާރުން ފޭބިއެވެ.
ރާހާއާއި ސާރާ ގެއާއި ދިމާލަށް ދުއްވައިގަތުމުން ހިލަ ތަކުގެ މަތީގައި އެކުދިންގެ ބޫޓުތައްޖެހޭ އަޑު ފަޒާގައި ހަރުލިއެވެ.
ވައިރޯޅިތަކުން ގަސްތަކުގެ ގޯނާއިން ފަތްތަކަށް ނުކުޅަދާނަވެ އުދުހެމުން ދިޔަ ފަތްތައް މަގުގެ ދެފަރާތުގައި އެއްވެފައި ހުއްޓެވެ. ގަސްތަކުގެ ތެރެއިން ކޮންމެވެސް ދިމާލަކުން ދޫންޏެއް އެއް ފަހަރު ގޮވާލުމަށްފަހު ހިމޭންވިއެވެ.
މިލްހާ ބަގީޗާއާ ދިމާލަށް ނަޒަރު ހުއްޓައިލުމާއެކު ފިޔަވަޅުތައް ކޮންމެވެސް ވަރަކަށް ލަސްވިއެވެ. މިހިސާބުގައި ތިބެފައި ބަލާއިރު އެ ހަލާކުވެފައިވާ ބިންގަނޑު ފެންނަނީ ހަމަ ކިރިޔާއެވެ. އޭނާއަށް އެ ސަރަހަްދާއިމެދު ވިސްނައިލެވުނެވެ. މާދަމާ އެ ބަގީޗާ ސާފުކުރަން އަންގިތައް ހޯދަން ނަސްރީނު ގާތުގައި ނަމަވެސް ބުނަންޖެހޭނެއެވެ.
މިލްހާއަށް އެހެން ކަމެއްވެސް ފާހަގަކުރެވުނެވެ. ތަފާތު އިހުސާސެކެވެ. ކާކުކަން ނޭނގޭ މީހަކު އޭނާއަށް ބަލަހައްޓައިގެން ހުރިކަން ޔަގީންވާފަދަ އިހުސާސެކެވެ.
އޭނާގެ ނަޒަރު ދަތުރުކުރީ ގަނޑުވަރުގެ މަތީ ފަންގިފިލާއަށެވެ. އެބައިގާ އުސް ކުޑަދޮރުތަކެއް ހުއްޓެވެ. އޭނާގެ ސަމާލުކަން އެތަނުން ދޮރަކަށް ހުއްޓުނެވެ. ބިއްލޫރިގަނޑުގެ ފަހަތުގައި ކޮންމެވެސް އެއްޗެއް ނޫނީ މީހަކު ހުރިކަން ޔަގީންވިއެވެ. އެއީ ހަމަ އިންސާނެއްގެ ސޫރައެވެ. އޭނަގެ ހިތް ތެޅިގަތުމާއެކު ފިޔަވަޅުތައްވެސް ހުއްޓުނެވެ. ކުޑަދޮރު ކައިރީގައި ހުރީ މީހެއްކަން ޔަގީންވާން ސިކުންތުކޮޅެއްނެގިއެވެ. އޭނާއަށް އެ މޫނު ވަކިކުރާކަށް ނޭނގުނެވެ. ދުރުމިނާއި، އުޑުގެ ހިޔަނި ބިއްލޫރިގަނޑުން އެޅިފައި ހުރުމުގެ ސަބަބުން ބިއްލޫރިން އެތެރެ ފެނުން އުނދަގޫވިއެވެ.
ނަމަވެސް އެއީ އިންސާނެއްކަން ޔަގީނެވެ. އޭނާ ކުޑަދޮރަށް ބަލަހައްޓައިގެން ހުރީ އަލުން އެ މީހަކު ފެނިދާނެކަމުގެ އުއްމީދުގައެވެ. ކޮންމެގޮތެއްވިޔަސް އޭނާއަށް ފެނުނު އެއްޗެއްވިއްޔާ ގެއްލިއްޖެއެވެ. ބިއްލޫރިގަނޑުގެ ފަހަތުން ފެންނަނީ ހަމައެކަނި ހަރަކާތެއްނެތް ފަރުދާތަކެވެ.
"މިލްހާ. ކިހިނެއްވީ؟" ނާއިލާވެސް މައްޗަށް ބަލައިލަމުން ސުވާލުކުރިއެވެ.
"ހީވީ މީހަކު ފެނުނުހެން..."
"އެތަނުންތަ؟ ގަނޑުވަރުގެ އެ ބައި މިހާރު ހުންނަނީ ތަޅުލާފައި.... ކުރިން އަހަރެމެން އެތާ މެހުމާނުން ބައިތިއްބަން....މަންމައާއި ބައްޕަ ނިޔާވިފަހުން އެތަން ހުންނަނީ ތަޅުލާފައި... އެކަމަކު ސާފުކުރަން މުވައްޒަފުން ވަންނާނެ..... އެހެންވެ އެތަނަށް ވަން މުވައްޒަފަކަށް ވެދާނެ." ނާއިލާ ގަނޑުވަރުގެ ވާތްފަރާތަށް އިޝާރާތްކޮށްލަމުން ކިޔައިދިނެވެ.
މިލްހާ މަޑުމަޑުން ބޯޖަހައިލިއެވެ. ނާއިލާ އެބުނީ އެކަށީގެންވާ ސަބަބެކެވެ.
"ކަންބޮޑުނުވޭ ކޮއްކޯ. މިލްހާކަހަލަ އަޅުވެރި އަންހެންކުދިންނަށް ދެރަގޮތެއް ނުވާނެ.. ބިރުވެރިކަންތައްތަކުން ސަލާމަތްވާނެ. މިގެއަކީ ހަމަ އަމާން ގެއެއް.......އެތެރެއަށް ހިނގާ...." ނާއިލާ އޯގާތެރިކަމާއެކު ބުނެލިއެވެ. "މާބޮޑަށް ފިނިވެެއްޖެއްޔާ ރޯގާ ޖެހިދާނެ.."
މިލްހާ ގެއަށް ވަނުމާއެކު ހޫނުކަން ސާލެއްފަދައިން އޭނަގެ ހަށިގަނޑުގައި އޮޅައިލެވުނުފަދައެވެ. ލަކުނޑިއާއި މާތަކުގެ މީރުވަސް ނޭފަތުގައި ޖެހުނެވެ. އޭނަ ސަލާމްގޮވާލާފައި ގެއަށްވަންނަހިނދު ކިޔާ ދުޢާ ކިޔެވިއެވެ.
ނާއިލާ ގެނައި ކޮތަޅުތަކާ ބެހޭގޮތުން މުވައްޒަފަކާ ވާހަކަ ދައްކަން މަޑުކޮށްލިއެވެ. މިލްހާ ނިންމީ ކޮޓރިއަށް ދާށެވެ.
އޭނާ ސިޑިން އަރާފައި ކޮރިޑޯއިން ހިނގައިގަތީ ވަށައިގެން ނަޒަރު ހިންގަމުންނެވެ. ސިފްރާން ކޮބާހެއްޔެވެ؟ އޭނަ ކުރަނީ ކޮން މަސައްކަތެއްހެއްޔެވެ؟ ސިފްރާންއަކީ ވެމްޕަޔަރެއްނޫނީ ޖިންނިއަކަށް ވެދާނެ ހެއްޔެވެ؟ ޔަގީނުންވެސް އެފަދަ ފިލްމަކަށް ސިފްރާންގެ ސޫރައާއި މިޒާޖުވެސް ގުޅެއެވެ. އަސްތަޣުފިރުﷲ ކޮންފަދަ ނުބައި ޚިޔާލުތަކެއްހެއްޔެވެ؟ވެމްޕަޔަރަކުންނަކީ ހަގީގަތެއްނޫނެވެ. އިންސާނުންގެ އުފެއްދުމެކެވެ. ޖިންނިންވެސް ކޯޓުފަޓުލޫނުގައެއް ނޫޅޭނެއެވެ.
އޭނާ އަމިއްލަ ނަފުސާ ދެކޮޅުހެދިޔަސް ކުދިންގެ ވާހަކަތައް ދޭތެރެއަކުން ޚިޔާލަށް ވެރިވެގަތެވެ. "ސިފްރާން ދޫނި ކާލައިފި" އެ ޖުމްލަ ހީކުރިވަރަށްވުރެ ބޮޑަށް ސިކުނޑިއަށް އުދަގޫކުރަނީއެވެ. މިލްހާ ބުމަ އަރުވައިލިއެވެ. އޭނަ މޮޔަވީހެއްޔެވެ؟ އޭނާ އެކަމާ ވިސްނުން ހުއްޓާލަންޖެހެއެވެ. ފަހަރެއްގައި އެ ދޫންޏަކީ ކުކުޅަކަށް ވެދާނެއެވެ. އޭނަވެސް ކުރިން ގުރައެއް ގެންގުޅުނެވެ. ރާހާ އެހެން ބުނުމުން އޭނާ ހިތަށް މާ ބޮޑު އަސަރެއްކުރި ސަބަބަކީ އެއީއެވެ.
"މިލްހާ..........." އޭނަގެ ކަންފަތުގައި އެ އަޑު ޖެހުމާއެކު ސިއްސައިގެންދިޔައެވެ. ބިރުން ހަޅޭއްލަވައިގަނެވުނެވެ. އޭނާ އެނބުރުނު ގޮތުން ކޮނޑުގައި އޮތް ދަބަސް ސޮއްސާލައިގެންގޮސް ބިންމަތީގައި ޖެހުނެވެ.
އޭނާގެ ފަހަތުގައި ހުރީ ސިފްރާންއެވެ. އެ ތޫނު ނަޒަރު ހުއްޓިފައިވީ އޭނަގެ މޫނަށެވެ. ސީރިޔަސްކަމުގެ އިންތިހާއެވެ.
ބިރުވެރި ސިކުންތުކޮޅަކަށް އޭނާގެ ސިކުނޑިއަށް ވެރިވީ ދޫންޏެއްގެ ސޫރައެވެ. ބަދުނަސީބު ދޫންޏެކެވެ.
މިލްހާ ދެލޯ ބޮޑުވިއެވެ.
ސިފްރާންގެ ބުމަ ގާތްކޮށްލިއެވެ. "ކިހިނެއްވީ؟"
"ތިހެން ނަހަދަފާނަންތަ؟"އޭނަ މޭގައި އަތް އަޅާ ބާރުކޮށްލިއެވެ.
"ކޮންކަމެއް؟"ސިފްރާންގެ މޫނުމަތިން އެއްވެސް އަސަރެއްނުފެނުނެވެ.
"މިގޮތަށް ކުއްލިއަކަށް ފާޅުނުވާތި."
"އަހަރެން މި ހިނގަނީ މި ކޮރިޑޯއިން......"ސިފްރާން އޭނައަށް ބަލައިލީ ތާކުންތާކު ނުޖެހޭ އެއްޗެއް ބުނުމުން ބަލާފަދަ ނަޒަރަކުންނެވެ.
"ފިޔަވަޅުގެ އަޑު ނީއްވާ ހިނގާތީ މައްސަލައަކީ...."
"އަހަރެން އަންނަ ކަން ކުރިން އިއުލާން ކުރަން ޖެހޭކަމެއް ނޭނގެ....." ސިފްރާން ކޮނޑު އަރުވައިލިއެވެ.
"ކަރު ކަހައިލެވިދާނެއެއްނު......."މިލްހާ ނުރުހުމުގެ ނަޒަރަކުން ބަލައިލިއެވެ.
"އަހަރެންގެ އަމިއްލަ ގޭގެ އަމިއްލަ ކޮރިޑޯއަށް ވަނުމުގެ ކުރިން ޓަކި ދޭންވީތަ؟ ހަމަޖެހޭ އެއްޗެއް ކިޔާބަލަ........"ސިފްރާންގެ ލޮލުން ފެނުނީ ފޫހިވީކަމެވެ.
މިލްހާ އަނގަ ހުޅުވިއެވެ. އަދި ލެއްޕިއެވެ. "އެހެނެއް ނޫން މިބުނީ...."
އޭނާ ދަބަސް ނަގަން ގުދުވެފައި ހިންދެމިލިއިރުވެސް ސިފްރާންގެ ލޯ އޭނައަށް ހުއްޓިފައިވާކަން ފާހަގަވިއެވެ.
"ކިހިނެއްވީ؟" މިލްހާ އެހިއެވެ.
"ހީވަނީ ބިރުން ހުރިހެން....."
"އަހަރެން ސުވާލެއް ކުރިޔަސް އެންމެ ރަގަޅުތަ؟"މިލްހާ ޖެހިލުންވިއެވެ.
"ކޮންކަމެއް؟"ސިފްރާންގެ މޫނުމަތީގެ ކުލަވަރު ބަދަލުވިއެވެ.
އޭނާ އެ ސުވާލުކުރަން އަނގަ ހުޅުވާފައިވެސް ހިމޭންވިއެވެ.
"ދުވަހަކުވެސް ދޫންޏެއް ކެއިންތަ؟ "މި ސުވާލުކޮށްފިއްޔާ ވާނީ ކިހިނެއްހެއްޔެވެ؟ ސިފްރާންގެ މޫނަށް އަރާނެ ކުލަވަރު ދެކެން ބޭނުމެވެ. ފަހަރެއްގައި ރުޅިގަދަވެގެން ހަޅޭއްލަވައިގެންފާނެއެވެ. އޭނަ އެ ޚިޔާލު ބަދަލުކޮށްލާފައި ދުރަށް ބަލަންފެށިއެވެ. މޫނަށް ހޫނުވާގޮތްވީ ފިނިގަދަކަމުންކަމަށް ވެދާނެއެވެ. އަމިއްލަ ކޯތާފަތުގައި އަތް ޖައްސައިލެވުނެވެ. އަލަށް ކައިވެނިކޮށްގެން އުޅޭ މީހެއް ނަމަވެސް، ކޮންމެވެސް ސަބަބަކާއި ހުރެ އިޙުސާސްވަނީ ބޮޑު ހޮޓަލެއްގައި މަޑުކޮށްގެން ހުރި މެހެމާނެއްގެ ގޮތުގައެވެ.
"ކަމެއްނުވޭ..........." މިލްހާ އަވަސްއަވަހަށް ކޮޓަރިއާއި ދިމާލަށް ހިނގައިގަތެވެ.
ކުޑަކުއްޖެއްގެ ކިބައިން އިވުނު އާދަޔާޚިލާފު ޖުމްލައެއް އެހާ ފަސޭހައިން ސިކުނޑީގައި ހަރުލާފައި ހުރުމަކީ ހައިރާންވާވަރުގެ ކަމެކެވެ. އޭނާ އެ ޚިޔާލު ދުރުކޮށްލާފައި ކޮޓަރިއަށް ވަނެވެ.
އޭނާގެ ލޮލުގައި އެންމެ ފުރަތަމަ އަޅައިގަތީ ކުޑަދޮރު ކައިރީގައި ހުރި ލިޔާ މޭޒެވެ. ކުޑަ ބިއްލޫރި ގުޅިއެއްގައި ދެއްޔާއެކު ފައުންޓެން ގަލަމެއް އޮތެވެ. ދެން އޮތީ ކްރީމް ކުލައިގެ ކަރުދާސްގަނޑެކެވެ.
އޭނާ ކައިރިއަށް ޖެހިލިއެވެ. މޭޒުގެ އަނެއް ފަރާތުގައި އާދަޔާޚިލާފު މެޝިނެއްވެސް ބަހައްޓާފައިވިއެވެ. މިފަދަ އެއްޗެއް އޭނާ ކުރިން ތިރީބައިގެ ކޮންމެވެސް ތަނަކުން ދެކެފައިވި ނަމަވެސް ދުވަހަކުވެސް ބޭނުންކޮށްފައެއް ނުވެއެވެ.
މިއީ މުއްސަދި އާއިލާއެކެވެ. މުޅިގޭގައި ކަރަންޓުގެ ޚިދުމަތްވެއެވެ. ބޮޑެތި ކޮޓަރިތަކާއި އަގުބޮޑު ފަރުނީޗަރާއި ރީތި ކާރުތަކާއި ޚާދިމާއިންނާއި ކުޑަ އަވަށަކަށް ކާންދެވޭވަރަށް ކާނާ އެބަހުއްޓެވެ. ނަމަވެސް މިލްހާ އާއިލާއާ ވާހަކަދައްކަން ބޭނުންވުމުން އެހެން ގަރުނެއްގެ އަންހެނެއްހެން ގަލަމާއި ކަރުދާސް ހިފައިގެން އިށީންނަންޖެހުނީހެއްޔެވެ؟ އޭނައަށް ނޭގި މާ ކުރީގެ ޒަމާނަކަށް ދަތުރުކުރެވުނީކަމަށް ވެދާނެއެވެ. އޭނާ ކުޑަކޮށް ގުދުވެލިއެވެ. އޭގައި ތަޅުދަނޑިތަކެއް އަތުރާފައި ހުއްޓައި މަތީގައި ކަރުދާސް ރޯލެއް ހަރުކޮށްފައިވެއެވެ. މިލްހާ އެއިން ތަޅުދަނޑިއެއްގައި އަތްޖައްސައިލުމާއެކު އެއިން ބާރު އަޑެއް އިވުނެވެ. އޭނާ ވަގުތުން އަތް ދަމައިގަތެވެ. އޭނާ ބޭނުންވީ ހަމައެކަނި ގަލަމެވެ.
މިލްހާ އިށީނދެ ކަރުދާސްގަނޑު އޭނާއާ ދިމާލަށް ދަމައިލިއެވެ. އޭނާގެ އަތުލިޔުން ރީއްޗެވެ. ނަމަވެސް ސިފްރާންގެ އަތުލިޔުން ފަދައިން މުޅިން ފުރިހަމަވެފައި ޒީނަތްތެރިއެއް ނޫނެވެ.
"އައްސަލާމް އަލައިކުމް......" އޭނާ ފެށިއެވެ. އޭނާ ލިޔުނީ ސްކޮޓްލެންޑާ ބެހޭގޮތުނެވެ. ފިނިކަމާ ބެހޭގޮތުންނެވެ. ގަނޑުވަރުތަކާއި މޫސުމާއި ގަސްތަކާއި ފަރުބަދަތަކާ ބެހޭގޮތުންނެވެ.
އޭނާ އިނގިލިތައް މަޑުޖެހިލިއެވެ. އޭނާގެ ގަލަން ކަރުދާސްމަތީގައި ޖައްސާލައިގެން އިނދެ މިގަނޑުވަރާ މެދު ވިސްނައިލިއެވެ. ޔަގީނުންވެސް އާދަޔާޚިލާފު ކަންތައްތަކެއް ހުއްޓެވެ. ބައެއްފަހަރަށް އާދަޔާ ޚިލާފަށް އުޅޭ ޚާދިމާއިންނެވެ. ކާބަފައިންގެ ޒަމާނުގެ ގޮތްގޮތެވެ. އޭނާއަކީ އަދި ސިފްރާންއެވެ. މިލްހާ ކުޑަކޮށް ހިނިތުންވެލިއެވެ. އޭނާގެ މައިންބަފައިންނަށް ސިފްރާން ސިފަކޮށްދޭނެ ގޮތެއް އޭނާއަކަށް ނޭނގުނެވެ. "މަންމަމެންގެ ދަނބިދަރިފުޅަކީ ވަރަށް އުނދަގޫ މީހެއް." އޭނާ ލިޔަން ބޭނުންވިއެވެ. އެއާ ޚިލާފަށް އޭނާ ހިނިތުންވެލާފައި ވިސްނީ ރަގަޅުގޮތަކަށް ކުރިއަށް ގެންދިޔުމަށެވެ.
"އެންމެންވެސް އަހަންނަށް ވަރަށް ހެޔޮ"
އެއީ ތެދެކެވެ.
ނުނިމޭ