މަޝްހޫރު ބޮލީވުޑް އެކްޓަރު އަނިލް ކަޕޫރު ހުށަހަޅައިދެމުންދާ "އިންޑިއާ ކޭ ޓޮޕް 1 ޕަސެންޓް" ރިއަލިޓީ ޝޯގެ އެންމެ ފަހުގެ އެޕިސޯޑުގައި، އޭނާގެ ދިރިއުޅުމުގެ މުހިންމު ހަނދާނެއް ބައިވެރިންނާ ވަނީ ހިއްސާކޮށްފައެވެ.
ޝޯގެ ބައިވެރިއަކު ގޭތެރޭގެ މަސައްކަތްތަކުން ސަލާމަތްވާން ބޭނުންވާކަމަށް ބުނުމާ ގުޅިގެން، އަނިލް ވަނީ އޭނާގެ އަނބިމީހާ ސުނީތާ ކަޕޫރާ ކައިވެނިކުރަން ތައްޔާރުވި ދުވަސްވަރު ސުނީތާ ކުރި ޚާއްޞަ ޝަރުޠެއްގެ ވާހަކަ ކިޔައިދީފައެވެ.
އަނިލް ހާމަކުރި ގޮތުގައި ސުނީތާ ބޭނުންވީ ކައިވެންޏަށްފަހު ބަދިގޭގެ އެއްވެސް މަސައްކަތެއް ކުރަން ނުޖެހޭނެކަމުގެ ޔަގީންކަމެވެ. އެ ޝަރުޠަކީ އޭނާ އިތުރަށް މަސައްކަތްކޮށް، ދިރިއުޅުމުގައި ކާމިޔާބު މީހަކަށް ވުމަށް ލިބުނު ބޮޑު ހިތްވަރެއްގެ ގޮތުގައި އަނިލް ސިފަކުރިއެވެ. ސުނީތާގެ އެ އެދުން ފުރިހަމަކޮށްދިނުމަށްޓަކައި ބުރަކޮށް މަސައްކަތްކޮށް އެ ޒިންމާ ނެގި ކަމަށާއި، ކައިވެންޏަށްފަހު މިއަދާ ހަމައަށްވެސް ސުނީތާ ބަދިގެއަށް ވަދެފައިނުވާނެ ކަމަށް އަނިލް ބުންޏެވެ.
އަނިލް ކަޕޫރުގެ ދެމަފިރިން އާއިލާގެ މެމްބަރުންނާ އެކު--ފޮޓޯ/އިންސްޓަގްރާމްއަނިލް އާއި ސުނީތާ ކައިވެނިކުރީ 1984 ވަނަ އަހަރު ކަމަށްވީ ނަމަވެސް، އެ ދެމަފިރިންގެ ލޯބީގެ ވާހަކަ ފެށުނީ އޭގެ 10 ވަރަކަށް އަހަރު ކުރިންނެވެ. އެގޮތުން 1973 ވަނަ އަހަރު އަނިލް ފިލްމީ ދާއިރާގައި ފައިތިލަ ސާބިތުކުރަން މަސައްކަތް ކުރަމުންދިޔަ ދުވަސްވަރު، ސުނީތާއަކީ ކާމިޔާބު މޮޑެލެކެވެ.
ސަމާސާ ފޯނު ކޯލަކުން ފެށުނު އެ އެކުވެރިކަން ކައިވެންޏާ ހަމައަށް ދިޔައީ 11 އަހަރުގެ ލޯބީގެ ގުޅުމަކަށްފަހުއެވެ. އެ ދުވަސްވަރު އަނިލްއަށް މާލީ ގޮތުން ދަތިތަކާ ކުރިމަތިލާން ޖެހުނު ނަމަވެސް، ސުނީތާ ވަނީ އޭނާއަށް ވަރަށް ބޮޑަށް އެހީތެރިވެދީފައެވެ. އެގޮތުން ރެސްޓޯރެންޓްތަކަށް ކާންދާއިރު، އަނިލްއަށް ނޭނގި ސުނީތާ އެތައް ފަހަރަކު ބިލްތަކަށް ފައިސާ ދައްކާފައިވާކަން އަނިލް އުފަލާއެކު ފާހަގަކުރިއެވެ.
މިދިޔަ މެއި މަހު އިންސްޓަގްރާމްގައި ހިއްސާކުރި މެސެޖެއްގައި އަނިލް ވަނީ، އެމީހުންގެ 42 އަހަރުގެ ކައިވެންޏާއި 53 އަހަރުގެ އެކުގައިވުމުގެ އުފާވެރި ހަނދާންތައް އާކޮށްފައެވެ. އެންމެ 30 މިނެޓުގެ ތެރޭގައި މައިންބަފައިންނާއި ގާތް ބަޔަކާއެކު ކުރެވުނު އެ އާދައިގެ ކައިވެނި މިހާ ދިގު މުއްދަތަކަށް ދެމިގެންދާނެ ކަމަށް އޭރު ހީވެސްނުކުރާ ކަމަށާއި، އޭނާގެ ކޮންމެ ހުވަފެނެއް ޙަޤީޤަތަކަށް ހެދުމުގެ ފަހަތުގައިވަނީ ސުނީތާ ކަމަށް އަނިލް ބުނެފައިވެއެވެ. އަނިލް އާއި ސުނީތާގެ ކައިވެންޏަށް ތިން ކުދިން ލިބިފައިވާއިރު އެ ތިން ކުދިންނަކީ ވެސް ފިލްމު އިންޑަސްޓްރީގައި ކާމިޔާބުކަމާ އެކު މަސައްކަތްކުރަމުން އަންނަ ކުދިންނެވެ. އޭގެތެރެއިން ދޮށީ ދަރިފުޅު ސޯނަމް ކަޕޫރާއި ފިރިހެން ދަރިފުޅު ހަރްޝް ވަރްދަން ކަޕޫރަކީ ފިލްމު އެކްޓަރުންނެެވެ. އަދި ރިއާ ކަޕޫރަކީ ފިލްމު ޕްރޮޑިއުސަރެއްގެ އިތުރުން ސެލެބްރިޓީ ސްޓައިލިސްޓެކެވެ.
ވަރަށް ފޯރިގަދަ ކަމާ އެކު އަނިލް ހޯސްޓު ކުރަމުން އަންނަ "އިންޑިއާ ކޭ ޓޮޕް 1 ޕަސެންޓް" އަކީ ބަނިޖޭ އޭޝިއާއިން އުފައްދައިގެން ކުރިއަށްގެންދާ މަގުބޫލު ރިއަލިޓީ ޝޯއެކެވެ. މި ޝޯ ކޮންމެ ހޮނިހިރު އަދި އާދީއްތަ ދުވަހެއްގެ ރޭގަނޑު 8:00އިން ފެށިގެން ސްޓާ ޕްލަސް އަދި ޖިއޯ ހޮޓްސްޓާ މެދުވެރިކޮށް ފެންނާނެއެވެ.