މަސްތުގެ ހާލަތުގައި ތިބެގެން ވެހިކަލްތައް ދުއްވާ މިންވަރު އާދާޔާޚިލާފަށް އިތުރުވަމުން އަންނަކަން ހޯމް މިނިސްޓަރު އަލީ އިހުސާން މިރޭ ހާމަކުރައްވައިފިއެވެ.
އަހާ ފޯރަމްގައި ވާހަކަދައްކަވަމުން މިނިސްޓަރު ވިދާޅުވީ، މަގުމަތީގެ ނުރައްކާތެރި އެކި އެކްސިޑެންޓުތަކުގައި އަގުހުރި ދިވެހީންގެ ފުރާނަތައް ގެއްލިފައިވާ ކަމަށެވެ.
އެ މީހުންނަށް ސުވަރުގެ މިންވަރު ކުރެއްވުން އެދި ދުއާކުރައްވަމުން މިނިސްޓަރު ވިދާޅުވީ، ގާނޫނު ތަންފީޒުކުރަމުން ދަނިކޮށް، ދިވެހީންނަށް އެކި ގެއްލުންތައް ވުމަކީ ދިވެހި ކޮންމެ ފުލުހަކަށް ލިބޭ ވަރަށް ބޮޑު ހިތާމައެއް ކަމަށެވެ.
މިގޮތުން، އާބާދީ ބޮޑެތި ރަށްތަކުގައި އަދާޔާޚިލާފު ބާރަށް ދުއްވާ މީހުން ގިނަ ރަށްތައް މަދު ނޫން ކަން މިނިސްޓަރު ފާހަގަކުރެއްވިއެވެ.
މާލެއާއި ބޮޑެތި ސިޓީތައް ހިމެނޭހެން މި ވަގުތު އެންމެ އިސްކަން ދީގެން ކުރަނީ، ޓްރެފިކް ފުލުހުންގެ ޚިދުމަތް ގާއިމުކުރުން ކަމަށް އިހުސާން ވަނީ ވިދާޅުވެފައެވެ.
ހޯމް މިނިސްޓަރު އަލީ އިހުސާން މިރޭގެ އަހާ ފޯރަމްގައި --- ފޮޓޯ/ ރައީސް އޮފީސްއިތުރަށް ވާހަކަދައްކަވަމުން މިނިސްޓަރު ވިދާޅުވީ، ފާސްނުވަނީސް ލައިސަންސް ނަގައިގެން، ވެހިކަލްތައް ދުއްވާ މީހުން އުޅޭ ކަމަށެވެ. މިގޮތުން، މިނިސްޓަރު ވިދާޅުވީ، ގިނައީ މަގުމަތީގެ ގަވައިދުތައް ރަނގަޅަށް ނޭނގޭ މީހުންނާ ހެދި ދިމާވެފައިހުރި އެކްސިޑެންޓުތައް ހުރި ކަމަށެވެ.
މަގުމަތީގެ އިތުރު މައްސަލައެއް ވެސް މިނިސްޓަރު ފާހަގަކުރެއްވިއެވެ.
"މަސްތުގެ ހާލަތުގައި ތިބެގެން ވެހިކަލްތައް ދުއްވަމުން ދާކަން އަޅުގަނޑުމެނަށް އާދަޔާ ޚިލާފަށް ފާހަގަކުރެވިފައި އެބަހުރި. އެ ކަމަށް މިހާރު ވަރަށް ބޮޑަށް ސަމާލުކަން ދީގެން ދިވެހި ފުލުހުން ދަނީ މަސައްކަތް ކުރަމުން" މިނިސްޓަރު ވިދާޅުވިއެވެ.
މިނިސްޓަރު އެ ފަދައިން ވިދާޅުވިއިރު، މި ފަހުން މަގުމަތީގައި ނުރައްކާތެރި އެކްސިޑެންޓުތަކުގައި މީހުންގެ ފުރާނަ ވަނީ ގެއްލިފައެވެ. އެގޮތުން މި މަހު 19 ވަނަ ދުވަހުގެ ރޭ މާލޭގެ ސޯސަން މަގުގައި ހިނގި ނުރައްކާތެރި އެކްސިޑެންޓުގައި އަނިޔާވި 26 އަހަރުގެ އަންހެން މީހާ މިދިޔަ ހުކުރު ދުވަހު ވަނީ މަރުވެފައެވެ.
މާލެ ސަރަހައްދުގައި ވެސް ދުވާލެއްގެ މައްޗަށް ގިނަ އަދަދެއްގެ އެކްސިޑެންޓުތައް ހިނގައެވެ. ފުލުހުންގެ ތަފާސްހިސާބުން ދައްކާ ގޮތުގައި މި އަހަރުގެ މިހާތަނަށް 2,100 އެކްސިޑެންޓު ރިޕޯޓުކޮށްފައިވެއެވެ.