އެޕަލް ކުންފުނިން މި މަހުގެ ކުރީކޮޅު ތަޢާރަފުކުރި އެ ކުންފުނީގެ ފަށްޖެހޭ ފުރަތަމަ ފޯން "އައިފޯން ޑުއޯ" އަށް ކުރީކޮޅު ބޮޑު ތަރުޙީބަކާއި ސަމާލުކަމެއް ލިބުނު ނަމަވެސް، އެ ފޯނާ މެދު އޮތް ޝައުޤުވެރިކަން ވަރަށް އަވަހަށް ކުޑަވެ، މީހުން އެ ވާހަކަ ދެއްކުން މަދުވެއްޖެއެވެ.
އެޕަލްގެ އުފެއްދުންތަކަށް ލޯބިކުރާ މީހުން ޑުއޯ ފޯނެއް ހޯދުމަށް އިންތިޒާރުކުރަމުން ދިޔަ ނަމަވެސް، ޢާންމު ގިނަ ބަޔަކު ދެކޭގޮތުގައި މިއީ މާ ބޮޑު ޚާއްޞަކަމެއް ނެތް، އާދައިގެ ފޯލްޑަބަލް ފޯނެކެވެ.
އައިފޯން ޑުއޯގެ ޕްރީ-އޯޑަރުތައް އަންނަ މަހު 16 ގައި ހުޅުވާލުމަށް ހަމަޖެހިފައިވާއިރު، ފޯނު ރަސްމީކޮށް ބާޒާރަށް ނެރުމަށް ނިންމާފައިވަނީ އަންނަ މަހު 23 ގައެވެ. ނަމަވެސް 1,999 އެމެރިކާ ޑޮލަރަށް ވިއްކުމަށް ހަމަޖެހިފައިވާ މި ފޯނު ގަތުމުގެ ކުރިން، އެޕަލްގެ ބްރޭންޑަށް ޚާއްޞަ ތާއީދެއް ނުކުރާ ގިނަ ބަޔަކު ދަނީ ދެވަނަ ވިސްނުމަކަށް ދަމުންނެވެ.
މި ފޯނު ނުގަންނަން ނިންމި މީހުންގެ މެދުގައި ނެގުނު ޚިޔާލު ހޯދުމުގެ ސާވޭއެއްގައި 876 މީހަކު ބައިވެރިވެފައިވާއިރު، އޭގެ ތެރެއިން 49 އިންސައްތަ (433 މީހުން) ބުނެފައިވަނީ ފޯނު ނުގަންނަ މައިގަނޑު ސަބަބަކީ އެ ފޯނުގެ އަގު އިންތިހާއަށް ބޮޑުވުން ކަމަށެވެ. މީގެ އިތުރުން 37 އިންސައްތަ (320 މީހުން) ޤަބޫލުކުރާ ގޮތުގައި، މި ފޯނުން ކުރެވޭ އެއްވެސް ކަމަކީ މިހާރު އެ މީހުން ބޭނުންކުރާ ފޯނުތަކުން ނުކުރެވޭ ކަމެއް ނޫނެވެ.
މި ފޯނާ މެދު އޮތް ސަމާލުކަން ކުޑަވި އެއް ސަބަބަކީ، އައިފޯން 18 ޕްރޯ" އަށް ކަސްޓަމަރުންގެ ސަމާލުކަން ހުއްޓިފައިވުން ކަމަށް ބެލެވޭ ---މި ސާވޭގައި ބައިވެރިވި މީހުންގެ ތެރެއިން 11 އިންސައްތަ (92 މީހުން) މެޓް ސުކްރީން ކަމުނުދާ ކަމަށް ބުނެފައިވާއިރު، ހަތަރު އިންސައްތަ (31 މީހުން) ވަނީ ފޯނުގެ މަލްޓިޓާސްކިން ޤާބިލުކަން ކުޑަކަމާމެދު ހިތްހަމަނުޖެހުން ފާޅުކޮށްފައެވެ. އަދި ފޯނުގެ ޑިޒައިން ފުޅާވުމާއި، ކަނާތުން ބޭނުންކުރާ މީހުންނަށް އިސްކަންދީގެން ފަރުމާކޮށްފައިވުމުގެ ސަބަބުން ވާތުން ބޭނުންކުރާ މީހުންނަށް ދަތިތަކާ ކުރިމަތިވުމަކީ ވެސް ފާހަގަކުރެވުނު މައްސަލަތަކެކެވެ.
ފޯލްޑަބަލް ފޯނުތައް ބާޒާރަށް ނުކުންނަތާ އަށް އަހަރު ވެފައިވީ ނަމަވެސް، އެޕަލް ފަދަ ބޮޑު ކުންފުންޏަކުން މިފަދަ ފޯނެއް ނެރުމުން ޢާންމުންގެ މެދުގައި މަޤުބޫލުކަން ބޮޑުވާނެ ކަމަށް ބެލެވުނެވެ. ނަމަވެސް ގޫގުލް ޓްރެންޑްސްގެ މައުލޫމާތުތަކުން ދައްކާގޮތުގައި، ފޯނު އިއުލާނުކުރި ފުރަތަމަ ދުވަސްކޮޅަށްފަހު، އިންޓަނެޓްގައި އައިފޯން ޑުއޯއާ މެދު ހޯދާ ހޯދުންތަކާއި ދެކެވޭ ވާހަކަތައް ވަނީ ވަރަށް ބޮޑަށް ދަށްވެފައެވެ.
މި ފޯނާ މެދު އޮތް ސަމާލުކަން ކުޑަވި އެއް ސަބަބަކީ، މީގެ ހަފުތާއެއްހާ ދުވަސް ކުރިން އެޕަލްއިން ނެރުނު "އައިފޯން 18 ޕްރޯ" އަށް ކަސްޓަމަރުންނާއި ރިވިއުކުރާ މީހުންގެ ސަމާލުކަން ހުއްޓިފައިވުން ކަމަށް ބެލެވެއެވެ.
މީގެ އިތުރުން ސަޕްލަޔަރުންގެ މެދުގައިވެސް މި ފޯނާ މެދު ތަފާތު ޝައްކުތައް ހުރި ނަމަވެސް، ފޯނު ނެރެ ޕްރީ-އޯޑަރަށް ހުޅުވާލުމާ ގާތްވުމުން އަލުން އާ ޝައުޤުވެރިކަމެއް އުފެދޭނެ ކަމަށް ބެލެވެއެވެ.