ޔުއެފާ ނޭޝަންސް ކަޕުގައި ނިއުޓްރަލް ގްރައުންޑެއްގައި އިސްރާއީލާ ދެކޮޅަށް ކުޅުނު މެޗު 0-3 ގެ ނަތީޖާއިން އަޔަލެންޑު ކާމިޔާބުކޮށް މުޅި ދުނިޔެއަށް ވަރުގަދަ މެސެޖެއް ދީފިއެވެ.
ފަލަސްޠީނުގެ އިތުރުން ލުބްނާން އަދި ސީރިއާގައި އިސްރާއީލުން ހިންގަމުންދާ ޢުދުވާނުތަކާ އެންމެ ފާޅުގައި ދެކޮޅު ހަދަމުންދާ އެއް ގައުމުކަމަށްވާ އަޔަލެންޑަށް އިސްރާއީލު ފުޓުބޯޅަ ޓީމު ގޮސްފިނަމަ މަޝްރަހު ހޫނުވެދާނެކަމަށް ލަފާކޮށް، މިމެޗު ނިއުޓްރަލް ގްރައުންޑެއްގައި ކުޅެން ނިންމީ އެގައުމުގެ ފުލުހުންގެ މަޝްވަރާގެ މަތީންނެވެ. އެހެންކަމުން މިމެޗު ކުޅެފައިވަނީ ހަންގޭރީގެ ޑެބްރެސެންގައި ހުންނަ ނަގްޔޭޑެއި ސްޓޭޑިއަމުގައެވެ.
މުބާރާތުގެ ގުރުނެގިއިރު ދެޓީމު ކުޅެން ޖެހުމުން އަޔަލެންޑުން ވަނީ އިސްރާއީލާ އެކު ކުޅެން ދެކޮޅު ހަދައި، ދެގައުމު ކުޅެން ނުޖެހޭނެ ގޮތް ހަދައިދިނުމަށް ޔުއެފާގައި އެދިފައެވެ. ނަމަވެސް ދެގައުމުގެ މެދުގައި ސީދާ ހަނގުރާމައެއް ހިނގަމުން ނުދާތީ ޔުއެފާއިން ވަނީ މިކަމާ ދެކޮޅުހަދާފައެވެ.
އަޔަލޭންޑުން މި މެޗު ކުޅެފައިވަނީ ޔަހޫދީންގެ ގަތުލުއާންމުތަކުގައި ޝަހީދުކޮށްލާފައިވާ ފަރާތްތަކުގެ ހަނދާނުގައި ކަޅުކުލައިގެ ބޭންޑެއް އަޅައިގެންނެވެ.
މި މެޗު ފެށުމުގެ ކުރިން އިސްރާއީލުގެ ގައުމީ ސަލާން ކިޔަމުންދިޔަ ވަގުތުވެސް އަޔަލެންޑުން ވަނީ ޔަހޫދީ ދައުލަތާމެދު އޮތް ހިތްހަމަ ނުޖެހުން ފާޅުކޮށްފައެވެ. އެގޮތުން އެޓީމުގެ ފުރަތަމަ އެގާރައިގައި ހިމެނުނު ހުރިހާ ކުޅުންތެރިންވެސް ތިބީ އިސްޖަހައިގެންނެވެ.
މީގެ އިތުރުން، ދެގައުމުގެ ގައުމީ ސަލާމަށްފަހު ދެޓީމުގެ ކުޅުންތެރިން އާންމުކޮށް ސަލާންކުރާ ނަމަވެސް، އަޔަލެންޑު ކުޅުންތެރިންވަނީ އީސްރާއީލުގެ ކުޅުންތެރިންނާ ސަލާންކުރަން ދެކޮޅުހަދާފައެވެ. އަދި މެޗުގެ ޓޮސް ނެގި ގަޑީ އިސްރާއީލުގެ ކެޕްޓަނާ ސަލާންކުރަންވެސް އަޔަލޭންޑުގެ ކެޕްޓަން ޑޭރާ އޯޝޭ ދެކޮޅުހެދިއެވެ.
އިސްރާއީލުގެ ގައުމީ ސަލާން ކިޔަމުންދިޔަ ވަގުތު އަޔަލެންޑު ކުޅުންތެރިން އިސްޖަހައިގެން--މެޗަށް ބަލާއިރު، %64 ބޯޅަ ހިފަހައްޓައިގެން ކުޅެފައިވަނީ އިސްރާއީލުން ނަމަވެސް ގޯލާ އަމާޒުކޮށް ދެޓީމަށްވެސް ފޮނުވާލެވިފައިވަނީ ހަތަރު ޝޮޓެވެ. މި މެޗުގައި އަޔަލެންޑުން ޖެހި ތިން ލަނޑުވެސް ޖަހާފައިވަނީ ފުރަތަމަ ހާފުގައެވެ.
އެގޮތުން އެޓީމުގެ ފުރަތަމަ ލަނޑު، މެޗުގެ 13 ވަނަ މިނެޓުގައި އެޓީމުގެ ފުރަތަމަ ލަނޑު ކާމިޔާބުކޮށްދީފައިވަނީ ޓްރޯއީ ޕެރޮޓް އެވެ. އޭގެ ތިން މިނެޓު ފަހުން އެޓީމުގެ ދެވަނަ ލަނޑު، އެޑަމް އިޑާ ކާމިޔާބުކޮށްދިން އިރު މެޗުގެ 25 ވަނަ މިނެޓުގައި އަޔަލެންޑުގެ ތިންވަނަ ލަނޑު ކާމިޔާބުކޮށްދިނީ ޖެކް މޮއިލަން އެވެ.
އޭނާގެ ލަނޑު ޖެހުމަށްފަހު މޮއިލަން ވަނީ ފަލަސްޠީނަށް އޮތް ތާއީދު ދައްކުވައިދިނުމުގެ ގޮތުން އޭނާގެ ބޭންޑު އަތުން ނަގާ ދައްކާލާފައެވެ.
މެޗުގެ އެއްދުވަސް ކުރިން އަޔަލެންޑުގެ އެއް ނަންބަރު ގޯލްކީޕަރު ގެވިން ބަޒޫނޫ ވަނީ އިސްރާއީލުގެ ލާއިންސާނީ ޖަރީމާތަކާއި އުދުވާނުތަކާ ދެކޮޅު ހެދުމުގެ ގޮތުން މެޗު ކުޅެން ދެކޮޅުހަދާފައެވެ. އެހެންކަމުން މި މެޗަށް އަޔަލެންޑުގެ ތިންވަނަ ކީޕަރެއްގޮތަށް ހިމަނާފައިވަނީ ޑިފެންޑަރެއް ކަމަށްވާ ޖިމީ ޑަން އެވެ.
އަންނަ ހަފްތާގައި ކުޅޭ މި ދެޓީމުގެ ދެވަނަ މެޗު ކުޅުމަށް ހަމަޖެހިފައިވަނީ ސާބިއާގެ ޓީއެސްސީ އެރީނާގައެވެ.