ރާއްޖޭގެ ފަތުރުވެރިކަމާއި ހޮސްޕިޓަލިޓީ ދާއިރާއަށް ހާއްސަކޮށްގެން ބާއްވާ އެންމެ ބޮޑު އެކްސްޕޯ، "ހޯޓެލް އޭޝިއާ މާލްޑިވްސް" ގެ 20 ވަނަ އެޑިޝަން ފަށައިފިއެވެ.
ރާއްޖޭގެ ހޮސްޕިޓަލިޓީ، ރިސޯޓް ސަޕްލައި އަދި ކަލިނަރީ ދާއިރާގައި އެންމެ ފާހަގަކޮށްލެވޭ އެއް ހަރަކާތް ކަމަށްވާ "ހޮޓެލް އޭޝިއާ މޯލްޑިވްސް" ގެ 20 ވަނަ އެޑިޝަން މިއަދުން ފެށިގެން ބުދަ ދުވަހުގެ ނިޔަލަށް ހުޅުމާލޭ ސިންތެޓިކް ޓްރެކްގައި ބޭއްވުމަށް ވަނީ ހަމަޖެހިފައެވެ.
މި މައުރަޒާއެކު ކުރިއަށްދާ "އިންޓަނޭޝަނަލް ކަލިނަރީ ޗެލެންޖް" އިއްޔެއިން ފެށިގެން ބުދަ ދުވަހުގެ ނިޔަލަށް މާލޭގައި ހުންނަ ދިވެހިރާއްޖޭގެ ގައުމީ ޔުނިވަސިޓީ (އެމްއެންޔޫ) އާއި ހުޅުމާލޭ ސިންތެޓިކް ޓްރެކްގައި ކުރިއަށްދާނެއެވެ.
އިންޓަނޭޝަނަލް ކަލިނަރީ ޗެލެންޖާއެކު ހޮޓެލް އޭޝިއާ އެގްޒިބިޝަންގެ 20 ވަނަ އެޑިޝަން ފަށައިގެން ކުރިއަށް ދަނީ -- ފޮޓޯ: އެމްއީސީއެސްމޯލްޑިވްސް އެގްޒިބިޝަން އެންޑް ކޮންފަރެންސް ސާވިސަސް (އެމްއީސީއެސް) އިން އިންތިޒާމުކުރާ މި ހަރަކާތުން ރަމްޒުކޮށްދެނީ ފާއިތުވި ދެ ދަހައިގެ ތެރޭގައި ދިވެހިރާއްޖޭގެ ފަތުރުވެރިކަމުގެ ދާއިރާއަށް އައިސްފައިވާ އިންގިލާބީ ކުރިއެރުމެވެ.
ދެހާސް ވަނަ އަހަރު ހޮޓެލް އޭޝިއާ އެންމެ ފުރަތަމަ ފެށުނީ އެންމެ 40 ކުންފުނީގެ ބައިވެރިވުމާއެކު، ކޮންމެ ދެ އަހަރަކުން އެއް އަހަރު ބާއްވާ މައުރަޒެއްގެ ގޮތުގައެވެ. އެ ދުވަސްވަރު ރާއްޖޭގެ ރިސޯޓުތަކާއި ހޯޓާތަކަށް ބޭނުންވާ ސާމާނުގެ 80 އިންސައްތަ ހޯދަމުންދިޔައީ ރާއްޖެއިން ބޭރުގައި ބާއްވާ މައުރަޒުތަކަށް ގޮސްގެންނެވެ.
ހޮޓެލް އޭޝިއާ އުފެދިގެން ދިޔައީ ބޭރުގެ ސަޕްލަޔަރުންނާއި، ހޮޓެލް އޮޕަރޭޓަރުން އަދި މި ދާއިރާގެ ފަންނީ ބޭފުޅުން އެއް ފުރާޅެއްގެ ދަށަށް ގެނެސްދިނުމަށެވެ. އަދި ރާއްޖޭގެ ފަތުރުވެރިކަން ފުޅާވެ، ބައިނަލްއަގުވާމީ ބްރޭންޑްތަކުގެ މާކެޓް ބޮޑުވަމުން ދިއުމާއެކު، 2008 ވަނަ އަހަރުން ފެށިގެން މި މައުރަޒު ވަނީ ކޮންމެ އަހަރަކު ބާއްވާ ހަރަކާތަކަށް ބަދަލުކޮށްފައެވެ.
އިންޓަނޭޝަނަލް ކަލިނަރީ ޗެލެންޖާއެކު ހޮޓެލް އޭޝިއާ އެގްޒިބިޝަންގެ 20 ވަނަ އެޑިޝަން ފަށައިގެން ކުރިއަށް ދަނީ -- ފޮޓޯ: އެމްއީސީއެސްފާއިތުވި އަހަރުތަކުގައި ހޮޓެލް އޭޝިއާއިން ވަނީ ރާއްޖޭގެ ރިސޯޓުތަކާއި، ހޯޓާތަކާއި، ގޭސްޓްހައުސްތަކާއި، ސަފާރީތަކާއި، ރެސްޓޯރެންޓްތަކަށް ބޭނުންވާ ޒަމާނީ ކިޗަން ޓެކްނޮލޮޖީއާއި، ކެއިންބުއިމުގެ ބާވަތްތަކާއި، ކޮޓަރިތަކަށް ބޭނުންވާ ސާމާނު ފަސޭހައިން ލިބޭނެ މަގު ތަނަވަސްކޮށްދީފައެވެ. އަދި މިކަމުގެ ސަބަބުން، ކުރިން ބޭރު ގައުމުތަކަށް ބަރޯސާވި 80 އިންސައްތަ، މިއަދު ވަނީ 20 އިންސައްތައަށް ތިރިކުރެވިފައެވެ.
މިއަދު ހޮޓެލް އޭޝިއާއަކީ ހަމައެކަނި އެގްޒިބިޝަނެއް ނޫނެވެ. އެއީ ރިސޯޓް އޮޕަރޭޓަރުންނާއި، ބަޔަރުން، އެގްޒެކެޓިވް ޝެފުން އަދި ފަތުރުވެރިކަމުގެ ދާއިރާގެ އިސް ފަރާތްތައް އެއްވެ، ވިޔަފާރީގެ ގުޅުންތައް ބަދަހިކޮށް، އާ އީޖާދުތައް ތައާރަފުކުރާ އެންމެ މުހިންމު އަހަރީ ބައްދަލުވުމެވެ.