ދިރުވާލައިގެން ރާއްޖެއަށް މަސްތުވާތަކެތި އެތެރެކުރި މައްސަލައިގައި ހައްޔަރުކުރި ދެ ބިދޭސީންގެ ހަށިގަނޑުން 142 ބުލެޓު ފެނިފައިވާ ކަމަށާއި އެ ތަކެތީގެ ވަގުތީ ބަރުދަން 1.5 ކިލޯއަށްވުރެ އިތުރު ކަމަށް ފުލުހުން މިއަދު ބުނެފިއެވެ.
ރާއްޖެއައިއިރު ހަށިގަނޑުގައި މަސްތުވާތަކެތި ރައްކާކޮށްފައި ހުރިކަމަށް ތުހުމަތުކުރެވޭ މައްސަލައަކާ ގުޅިން ނޭޕާލަށް ނިސްބަތްވާ ދެ މީހަކު ފުލުހުން ހައްޔަރުކުރީ މިދިޔަ ހުކުރު ދުވަހެވެ.
މި މައްސަލައިގައި ހައްޔަރުކޮށްފައި ވަނީ ނޭޕާލަށް ނިސްބަތްވާ 47 އަހަރުގެ ފިރިހެނެއް ކަމަށްވާ ނިއްކަ ތަމަންގް އާއި 40 އަހަރުގެ އަންހެނެއް ކަމަށްވާ އީތްރާނީ ގަލެއެވެ.
ފުލުހުން ބުނީ ކަސްޓަމުން އެ މީހުން ފުލުހުންނާ ހަވާލުކުރުމުން ދެ މީހުން ހައްޔަރުކޮށް ބަލައިފާސްކުރިއިރު 142 ބުލެޓް ފެނިފައިވާ ކަމަށާއި އެ ތަކެތީގެ ވަގުތީ ބަރުދަން 1.5 ކިލޯއަށްވުރެ އިތުރު ކަމަށެވެ.
އެ ދެ މީހުން އިއްޔެ ކްރިމިނަލް ކޯޓަށް ހާޒިރުކޮށްފައިވާއިރު، ކޯޓު އަމުރުތަކުގައި އޮތް ގޮތުން އެ ދެ މީހުންގެ ހަށިގަނޑުން ފެނުނީ ޖުމްލަ 53 ބުލެޓް (650 ގްރާމްގެ މަސްތުވާތަކެތި)އެވެ.
އެ ދެ މީހުން ކުށް ކުރިކަމަށް ތުހުމަތުކުރެވޭ މިންވަރަށް ހެކި ހުށަހަޅާފައިވާތީއާއި، މުޖުތަމަޢުގެ ސަލާމަތަށް ނުރައްކާވެދާނެތީ، ކޯޓުން ވަނީ އެ ދެ މީހުންގެ ބަންދަށް 30 ދުވަސް އިތުރުކޮށްދީފައެވެ.
ރާއްޖެއަށް ބިދޭސީން މަސްތުވާތަކެތި އެތެރެކުރުމުގެ މައްސަލަތައް ފަހަކަށް އައިސް ވަނީ އިތުރުވެފައެވެ. އަދި މި ފަދަ މައްސަލަތައް ހުއްޓުވުމަށްޓަކައި، ވަކި މިންވަރަކަށްވުރެ ގިނައިން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭ ގޮތަށް ޤާނޫނު ވަނީ އިޞްލާޙްކޮށްފައެވެ.