މި މަހު ރާއްޖެ އައި ފަތުރުވެރިންގެ އަދަދު، މިދިޔަ އަހަރުގެ މި މުއްދަތާ އަޅައިބަލާއިރު 1.3 ޕަސެންޓް އިތުރުވެއްޖެއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުން ދައްކާ ގޮތުގައި މި މަސް ތެރޭ، އިއްޔެގެ ނިޔަލަށް 134,339 ފަތުރުވެރިން ވަނީ ރާއްޖެ އައިސްފައެވެ. އެއީ މިދިޔަ އަހަރުގެ ސެޕްޓެންބަރު މަހުގެ 27ގެ ނިޔަލަށް އައި ފަތުރުވެރިންގެ އަދަދާ އަޅައިބަލާއިރު 1.3 ޕަސެންޓްގެ އިތުރުވުމެކެވެ.
މި އަހަރު ތެރޭ އައި ފަތުރުވެރިންގެ ޖުމްލަ އަދަދު މިހާރު ވަނީ 1.59 މިލިއަނަށް އަރައިފައެވެ. އެއީ މިދިޔަ އަހަރުގެ މި މުއްދަތާ އަޅައިބަލާއިރު 3.3 ޕަސެންޓްގެ ދަށްވުމެކެވެ. އެގޮތުން އެ މިދިޔަ އަހަރު އެ އަދަދު ހުރީ 1.64 މިލިއަނުގައެވެ.
މިނިސްޓްރީގެ ތަފާސްހިސާބުގައިވާ ގޮތުން، ހުރިހާ ފަތުރުވެރިންގެ ތެރެއިން 1.15 މިލިއަން ފަތުރުވެރިން ދިޔައީ ރިސޯޓުތަކަށެވެ. އަދި 342,557 ފަތުރުވެރިން ގެސްޓްހައުސްތަކަށް ދިޔައިރު، ޓޫރިސްޓު އުޅަނދުތަކުގައި 29,548 މީހުން ޗުއްޓީ ހޭދަކޮށްފައިވެއެވެ.
ރާއްޖެއަށް އެންމެ ގިނަ އަދަދަކަށް ޓޫރިސްޓުން އަންނަނީ ޗައިނާއާއި ރަޝިއާއިން ކަމަށްވާއިރު އެ ދެ ގައުމުން ޖުމްލަ ފަސް ލައްކައަށް ވުރެ ގިނަ ފަތުރުވެރިން އައިސްފައިވެއެވެ. އަދި އިނގިރޭސިވިލާތުން އައި ފަތުރުވެރިންގެ އަދަދު އެއް ލައްކައަށް އަރާއިރު، ޖަރުމަނުން 98,052 ފަތުރުވެރިން އައިސްފައިވެއެވެ.
ރާއްޖެއަށް މި އަހަރު އައި ފަތުރުވެރިންގެ އަދަދު މަދުވީ، މިދިޔަ ފެބުރުވަރީ މަހުގެ 28ގައި މެދުއިރުމަތީގައި ފަށައިފައިވާ ހަނގުރާމައާ ގުޅިގެންނެވެ. ރާއްޖެއަށް ގިނަ އަދަދެއްގެ ފަތުރުވެރިން އަންނައިރު ބޭނުންކުރާ މެދުއިރުމަތީގެ ރޫޓްތަކަށް ހަނގުރާމައިގެ އަސަރުކޮށް، ވައިގެ ދަތުރުފަތުރަށް ގިނަ ދުވަސްތަކެއް ވަންދެން ހުރަސްއެޅިފައި އޮތެވެ.
އެހެންނަމަވެސް މިހާރު ފަތުރުވެރިން އަންނަ މިންވަރު އިތުރުވަމުން އަންނައިރު، މިދިޔަ މަހަކީ މެދުއިރުމަތީގެ ހަނގުރާމަ ފެށުނު ފަހުން ރާއްޖެއަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކުރި މަސްކަން ފާހަގަކޮށްލެވެއެވެ.
ޓޫރިޒަމް މިނިސްޓަރު މުޙައްމަދު އަމީން ވަނީ މި އަހަރުގެ ފަހު ސީޒަން ވާނީ ފަތުރުވެރިކަމުގެ ދާއިރާއަށް ވަރަށް ކާމިޔާބު ސީޒަނަކަށް ކަމަށާއި، މި އަހަރު އަންނަ ފަތުރުވެރިންގެ އަދަދު މިދިޔަ އަހަރަށްވުރެ މަދުނުވާނެ ކަމަށް ވިދާޅުވެފައެވެ.