ދުނިޔޭގެ ބާޒާރުގައި ރަނުގެ އަގު ތިން ޕަސެންޓަށް ވުރެ ބޮޑަށް ދަށަށް ގޮސް، ފާއިތުވި ހަތް ހަފުތާގެ ތެރޭގައި ނުދާހާ ދަށަށް ހިނގައްޖެއެވެ.
ސްޕޮޓް ގޯލްޑްގެ އަގު ވަނީ 3.1 ޕަސެންޓް ދަށަށް ގޮސް، އައުންސަކަށް 4،155.67 ޑޮލަރަށް ވެއްޓިފައެވެ. މިއީ އޮގަސްޓް މަހުގެ ފަސް ވަނަ ދުވަހަށް ފަހު ރަނުގެ އަގު މިހާ ދަށަށް ދިޔަ ފުރަތަމަ ފަހަރެވެ. މީގެ އިތުރުން، ޑިސެންބަރު މަހަށް ވިއްކާ އެމެރިކާގެ ގޯލްޑް ފިއުޗާސްގެ އަގު ވެސް ވަނީ 3.1 ޕަސެންޓް ދަށަށް ގޮސް، 4،188.10 ޑޮލަރަށް ވެއްޓިފައެވެ.
ރަނުގެ އަގު ދަށަށް ގޮސްފައިވަނީ ދުނިޔޭގެ ބާޒާރުގައި ތެލުގެ އަގު އުފުލި، އިންފްލޭޝަން މަތިވެދާނެ ކަމުގެ ބިރު ބޮޑުވުމާ ގުޅިގެންނެވެ. ތެލުގެ އަގު އުފުލުނީ، ހޮރުމުޒް ކަނޑުއޮޅި ހުޅުވާލައި މެދުއިރުމަތީގެ މައްސަލަތައް ހައްލުކުރުމަށް އީރާނުން ހުށަހެޅި ސުލްހައިގެ އެއްބަސްވުން އެމެރިކާގެ ރައީސް ޑޮނަލްޑް ޓްރަމްޕް ގަބޫލުނުކުރެއްވުމާ ގުޅިގެންނެވެ. ހަކަތައިގެ އަގު އުފުލުމަކީ އާންމު ގޮތެއްގައި މުދަލުގެ އަގުތައް އުފުލި، މުޅި އިގުތިސާދުގައި އިންފްލޭޝަން މައްޗަށް ދާ ކަމެކެވެ.
މި ދަނޑިވަޅުގައި އެމެރިކާ ޑޮލަރުގެ އަގު ވަނީ އުފުލިފައެވެ. ޔޫބީއެސްގެ އެނަލިސްޓް ޖިއޮވާނީ ސްޓައުނޯވޯ ވިދާޅުވިގޮތުގައި، ރަނުގެ އަގު ދަށަށް ދިޔުމުގެ މައިގަނޑު ސަބަބަކީ ތެލުގެ އަގު އުފުލުމާއި އެމެރިކާގެ އިންޓްރެސްޓް ރޭޓުތައް އިތުރަށް މައްޗަށް ޖައްސާނެ ކަމަށް ލަފާކުރެވުމެވެ. އޭނާ އިތުރަށް ވިދާޅުވީ، މި ހާލަތުގެ ސަބަބުން އެމެރިކާ ޑޮލަރުގެ އަގު މަތީގައި ހިފެހެއްޓި، ފައިދާއެއް ނުލިބޭ ރަން ގަނެފައި ބެހެއްޓުމުގެ ބަދަލުގައި އެހެން ދިމާތަކަށް އިންވެސްޓަރުންގެ ޝައުގުވެރިކަން އެނބުރިގެންދާނެ ކަމަށެވެ.
ސީއެމްއީގެ ފެޑްވޮޗް ޓޫލް އިން ދައްކާ ގޮތުގައި، އޮކްޓޯބަރު މަހު އެމެރިކާގެ މަރުކަޒީ ބޭންކް (ފެޑަރަލް ރިޒާވް) އިން އިންޓްރެސްޓް ރޭޓު މައްޗަށް ޖެއްސުމުގެ ފުރުސަތު 70.3 ޕަސެންޓަށް ވަނީ އަރާފައެވެ. މި މަހުގެ ކުރީކޮޅު ވެސް ފެޑަރަލް ރިޒާވުން ވަނީ އިންޓްރެސްޓް ރޭޓު 0.25 ޕަސެންޓް މައްޗަށް ޖައްސާފައެވެ. ކްލީވްލޭންޑް ފެޑްގެ ވެރިޔާ ބެތު ހެމެކް ވިދާޅުވި ގޮތުގައި، އިންފްލޭޝަން މަތީގައި ހުރުމުގެ ސަބަބުން މުދަލުގެ އަގުތައް ބޮޑުވުމަކީ އާންމު ކަމެއްގެ ގޮތުގައި އެމެރިކާގެ ރައްޔިތުންނަށް ގަބޫލުކުރެވެން ފަށާފާނެ ކަމުގެ ކަންބޮޑުވުން އެބައޮތެވެ. އަދި އެކަން އެގޮތަށް ވިޔަ ނުދޭނެ ކަމަށް އޭނާ ވިދާޅުވިއެވެ.
އިންވެސްޓަރުންގެ ސަމާލުކަން މިހާރު ހުރީ މި ހަފުތާގައި އާންމުކުރުމަށް ހަމަޖެހިފައިވާ އެމެރިކާގެ އިގުތިސާދީ ތަފާސްހިސާބުތަކަށެވެ. މީގެ ތެރޭގައި ވަޒީފާގެ ފުރުސަތުތަކާއި، އޭޑީޕީ އެމްޕްލޯއިމަންޓް ރިޕޯޓާއި، ޕާސަނަލް ކޮންސަމްޕްޝަން އެކްސްޕެންޑިޗާ (ޕީސީއީ) އަދި ނޮންފާމް ޕޭރޯލްސް ހިމެނެއެވެ. ރަނުގެ އިތުރުން އެހެނިހެން މައުދަންތަކުގެ އަގު ވެސް ވަނީ ދަށަށް ގޮސްފައެވެ. އެގޮތުން، ރިހީގެ އަގު 4.6 ޕަސެންޓް ދަށަށް ގޮސް އައުންސަކަށް 61.32 ޑޮލަރަށް ވެއްޓިފައިވާއިރު، ޕްލެޓިނަމްގެ އަގު ވަނީ 2.4 ޕަސެންޓް ދަށަށް ގޮސް 1،735.95 ޑޮލަރަށް ވެއްޓިފައެވެ. އަދި ޕެލޭޑިއަމްގެ އަގު ވަނީ 3.4 ޕަސެންޓް ދަށަށް ގޮސް 1،224.39 ޑޮލަރަށް ވެއްޓިފައެވެ.