ހދ. ކުޅުދުއްފުށީ ގެއަކުން ވަގަށް ނެގި ކަރަންޓު ސާމާނުތަކެއް ވިއްކައި، އެއިން ފައިސާ ހޯދި މައްސަލައެއްގައި ހދ. ކުޅުދުއްފުށި، ދިޔަވަރު، މުޙައްމަދު ޢަބްދުލްހާދީ އެއް އަހަރު ދުވަހުގެ މުއްދަތަށް ޖަލަށްލުމަށް ކުޅުދުއްފުށީ މެޖިސްޓްރޭޓް ކޯޓުން ހުކުމްކޮށްފިއެވެ.
ކުޅުދުއްފުށީ މެޖިސްޓްރޭޓް ކޯޓުގެ އިސް މެޖިސްޓްރޭޓް މުޙައްމަދު އިސްމާޢީލް ކުރެއްވި މި ހުކުމަކީ، 2023 ޖޫން 28 ގައި ހިނގި ހާދިސާއަކާ ގުޅިގެން ދައުލަތުން އޭނާގެ މައްޗަށް އުފުލި "އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުން" ކުށުގެ ދައުވާގެ ހުކުމެކެވެ.
ދައުލަތުން ހުށަހެޅި ދައުވާގައިވާ ގޮތުން، މުޙައްމަދު ޢަބްދުލްހާދީ ވަނީ އިތުރު މީހަކާއެކު ހދ. ކުޅުދުއްފުށީ ގެއަކަށްވަދެ، މަކިޓާ ބްރޭންޑްގެ ގްރޭންޑަރަކާއި ބުރުމާއެއް ވަގަށް ނަގާފައެވެ. އޭގެފަހުން އެ ދެ މީހުން ގުޅިގެން އެ ތަކެތި ވަނީ ކުޅުދުއްފުށީ އެހެން މީހަކަށް 500 ރުފިޔާއަށް ވިއްކާލައި، އެ ފައިސާ ދެ މީހުންގެ މެދުގައި އެއްވަރަކަށް ބަހާލާފައެވެ.
މި މައްސަލައިގެ އިބްތިދާއީ އަޑުއެހުމާއި ޝަރީޢަތުގެ ފުރަތަމަ މަރުޙަލާތަކުގައި ޢަބްދުލްހާދީ ދައުވާއަށް އިންކާރުކުރި ނަމަވެސް، މައްސަލައިގެ އަޑުއެހުންތައް ނިމި ހުކުމްކުރުމާ ހަމައަށް ގޮސްފައިވަނިކޮށް، އޭނާ ވަނީ ކުށަށް އިއުތިރާފުވާކަން ސިޓީއަކުން ކޯޓަށް އަންގާފައެވެ. އެހެންކަމުން ކޯޓުން އިތުރު އަޑުއެހުމެއް ބާއްވައި، އޭނާ އިއުތިރާފުވީ އެއްވެސް މަޖުބޫރުކަމެއް ނެތި އަމިއްލަ އިޚްތިޔާރުގައިކަން ވަނީ ކަށަވަރުކޮށްފައެވެ.
މި ކުށަކީ ޖިނާޔަތުގެ 5 ވަނަ ދަރަޖައިގެ ކުށަކަށްވެފައި، އަސާސީ އަދަބަކީ ނުވަމަހާއި 18 ދުވަހުގެ ޖަލު އަދަބެކެވެ. ނަމަވެސް އަދަބު ކަނޑައެޅުމުގައި ކޯޓުން ރިއާޔަތްކުރި ކަންކަމަކީ ޢަބްދުލްހާދީގެ މައްޗަށް ފާއިތުވި ފަސް އަހަރު ތެރޭގައި ޖިނާއީ އެހެން ކުށްތަކެއް ސާބިތުވެފައިވުމާއި، ފާއިތުވި ދެ އަހަރު ތެރޭގައި މި ބާވަތުގެ ކުށެއް ސާބިތުވެފައިވާތީ އަދަބުގެ ދަރަޖަ ތިން ދަރަޖަ މަތިކުރުމެވެ.
އެކަމަކު، ޝަރީޢަތުގައި ކުށަށް އެއްބަސްވުމުން އަދަބުގެ ދަރަޖައިން ދެ ދަރަޖަ ދަށްކުރެވުނެވެ. އެހެންކަމުން އަދަބު މަތިކުރުމާއި ދަށްކުރުމަށްފަހު، ކޯޓުން މުޙައްމަދު ޢަބްދުލްހާދީގެ މައްޗަށް އިއްވީ އެއް އަހަރު ދުވަހުގެ ޖަލު އަދަބެކެވެ.