ފަހި ދިރިއުޅުން ކޯޕަރޭޝަން (އެފްޑީސީ) ފުލެޓުތަކުގެ ޔުޓިލިތީ ބެލްކަނިތައް އުސޫލާ އެއްގޮތަށް ބަދަލުކުރަން މަސް ދުވަހުގެ މުއްދަތެއް އެ ކޯޕަރޭޝަނުން މިއަދު ދީފިއެވެ.
މި މަހުގެ ކުރީކޮޅު އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވަނީ "އަމާން އުދަރެސް" އަދި "އަމާން ދޯދި" ޓަވަރުތަކުގައި ކުޑަކުދިންނާއި ޚާއްސަ އެހީއަށް ބޭނުންވާ ފަރާތްތައް ދިރިއުޅޭ ޔުނިޓުތައް ފާހަގަކުރުމާއި އެ ޓަވަރުތަކުގައި ދިރިއުޅޭ ހުރިހާ އެންމެންގެ ސަލާމަތާއި ރައްކާތެރިކަން ކަށަވަރުކުރުމަށް ޓަކައި އަޅަންޖެހޭ ފިޔަވަޅުތަކާ ގުޅޭގޮތުން މަޝްވަރާކުރަމުން އަންނަ ކަމަށް ވިދާޅުވެފައެވެ.
މިރޭ އެފްޑީސީން ވަނީ، އެކޯޕަރޭޝަނުން ކަނޑައަޅާފައިވާ މިންގަނޑުތަކަ އެއްގޮތަށް އެ ތަންތަން ބަދަލުކުރުމަށް އެދިފައެވެ. މިގޮތުން، އެ ކުންފުނީގެ ވެބްސައިޓުގައި ބަޔާންކޮށްފައިވާ ގޮތުގެ އިތުރު އެހެން ގޮތަކަށް ބަދަލެއް ގެނައުމަކީ މަނާ ކަމެއް ކަމަށް އެފްޑީސީން ވަނީ ބުނެފައެވެ.
ފަހި ދިރިއުޅުމުގެ ޓަވަރުތަކެއް -- ފޮޓޯ: އެފްޑީސީމީގެއިތުރުން، އެ ކޯޕަރޭޝަނުން ވަނީ، ބެލްކަނިތަކާއި ކުޑަދޮރުތައް ދެ ފަރުމާއަކަށް ބަދަލުކުރުމަށް ހުއްދަ ދީފައެވެ. އެއީ، ގްރިލް އެންޑް ނެޓް ފިކްސިންއާއި ސްލައިޑިން ލޫވާ ފިކްސިންއެވެ.
އެފްޑީސީން ވަނީ، ޔުޓިލިޓީ ބެލްކަންޏަށް އުސޫލާ ޚިލާފަށް ބަދަލެއް ގެނެސްފައިވާނަމަ އަންނަ މަހު 28ގެ ކުރިން އިސްލާހު ކުރުމަށް ފުރުސަތު ދީފައެވެ. އެ ކޯޕަރޭޝަނުން ބުނީ، އެ މުއްދަތުގެ ތެރޭގައި އިސްލާހުނުކޮށްފިނަމަ ޖޫރިމަނާކޮށް ފިޔަވަޅު އަޅާނެ ކަމަށެވެ.
އެފްޑީސީން އެ ފިޔަވަޅުތައް އަޅަން ފެށިއިރު، ހުޅުމާލޭގެ ޓަވަރުތަކުގައި ކުޑަދޮރުތަކާއި ބެލްކަނީގައި ރެއިލިން ހަރުކުރުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ކުރަމުންދެއެވެ.
އެ ފިޔަވަޅުތައް އަޅަން ނިންމައިފައިވަނީ، ދެވަނަ ފިޔަވަހީގެ ފުލެޓުތަކުން ކުޑަ ދެ ކުދިން ވެއްޓުނު ދެ ހާދިސާއެއް ހިނގި ފަހުންނެވެ. އެގޮތުން މި މަހުގެ ތިން ވަނަ ދުވަހު ސްޓެލްކޯ ފުލެޓަކުން ދެ އަހަރުގެ އަންހެން ކުއްޖަކު ވެއްޓި މަރުވެފައިވާއިރު، އޭގެ ކުރީ ދުވަހު ވަނީ، އަމާން އުދަރެސް ޓަވަރަކުން 16 އަހަރުގެ ކުއްޖަކު ވެއްޓި، އަނިޔާވެފައެވެ.