އަމީނީ މަގުގެ މަރާމާތުކުރަމުންދާ ސަރަހައްދުގެ ދެވަނަ ބައިގައި ވެސް ތާރު އަޅައި ނިންމައިލައިފިއެވެ.
އަމީނީ މަގު އަލުން ހަދަން ފެށީ ހާބަރު ފުޑްކޯޓު ސަރަހައްދުގައި "މުލިހި"ތަކެއްހެން ތާރުގަނޑު އުފުލިފައިވުމުގެ ސަބަބުން، އެ މަގުން ދަތުރުކުރާ ފަރާތްތަކަށް ބޮޑެތި ތަކުލީފުތަކަކާ ކުރިމަތިލާންޖެހޭ ކަމުގެ ޝަކުވާތައް އިތުރުވެފައި ވަނިކޮށެވެ.
އެ މަސައްކަތް ކުރާ ސަރުކާރު ކުންފުނި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ)އިން ބުނީ، އަމީނީ މަގުގައި އަލުން ތާރު އަޅައި އެ ސަރަހައްދު ތަރައްގީކޮށް ނިންމައިލުމުގެ ސަބަބުން މާލޭގައި ދިރިއުޅޭ މީހުންނަށް ފަސޭހަކަމާއެކު ދަތުރުފަތުރުކުރުމަށް މަގުފަހިވެގެން ދާނެ ކަމަށެވެ.
އެމްޓީސީސީއާ އަމީނީ މަގުގެ މަރާމާތުކުރަމުންދާ ސަރަހައްދުގެ މަސައްކަތް ހަވާލުކުރީ މިިދިޔަ ޖޫން މަހުގެ 15ވަނަ ދުވަހެވެ. އެ މަސައްކަތް އޮގަސްޓު މަހު ފަށައި މި ހިނގާ ސެޕްޓެންބަރު މަހުގެ 19ވަނަ ދުވަހު ވަނީ ތާރު އެޅުމުގެ މަސައްކަތް ފަށައިފައެވެ. ތާރު އެޅުމުގެ މަސައްކަތް އެމްޓީސީސީން ނިންމައިލައިފައިވަނީ މިއަދުގެ ވަގުތެއްގައެވެ.
އޭރު އަމީނީ މަގުގެ އެ ސަރަހައްދުގެ ތާރުގަނޑު ރަނގަޅުކުރަން ހަވާލުކުރީ ސަރުކާރުން އުވައިލައި، އެމްޓީސީސީގެ ދަށަށް ގެންނަން އުޅޭ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާއެވެ. އެ މަސައްކަތް މިދިޔަ އޭޕްރިލް މަހުގެ 11ވަނަ ދުވަހު ފަށާނެ ކަމަށް އެ ކުންފުނިން އޭރު ބުންޏެވެ.
އެއަށްފަހު އެ މަސައްކަތް ނުފެށި ލަސްވާތީ ސުވާލުކުރުމުން އާރުޑީސީން ޖޫން މަހުގެ ކުރީކޮޅު ބުނީ، އެ ސަރަހައްދުގައި އަލުން ތާރުއެޅުމުގެ މަސައްކަތް ފެށުން ލަސްވަނީ ހައުސިން މިނިސްޓްރީން އެ މަސައްކަތުގެ ބައެއް ކަންކަމަށް ބަދަލު ގެންނާތީ ކަމަށެވެ.
އޭގެ އެއް މަސް ފަހުން ހައުސިން މިނިސްޓްރީން އެ މަސައްކަތް ހަވާލުކުރީ އެމްޓީސީސީއާއެވެ.
ފާހަގަކުރެވޭ ގޮތުގައި އަމީނީ މަގުގެ އެންމެ ފަހު ސެގްމަންޓުގައި ތާރު އަޅައި ނިންމައިލީ މީގެ ދެ އަހަރެއްހާ ދުވަސްކުރިން މި ސަރުކާރުން ވެރިކަމާ ހަވާލުވުމަށްފަހެވެ. ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ޕްލޭނިން މިނިސްޓްރީން އާރުޑީސީއާ އަމީނީ މަގު ޒަމާނީ ފެންވަރަށް ހެދުމުގެ މަސައްކަތް ހަވާލުކުރީ 84.4 މިލިއަން ރުފިޔާއަށެވެ.
އެއަށްފަހު އަމީނީ މަގުގެ ދެ ފަރާތުން ވަރަށް ބޮޑަށް "މުލިހިތަކެއްހެން" ތާރުގަނޑު އެކި ގޮތްގޮތަށް އުފުލި، އެ މަގުން ދުއްވާ ގިނަ ބަޔަކަށް އެ ކަމުގެ ނުރައްކަލާއި ތަކުލީފާ ކުރިމަތިލާންޖެހުނެވެ. އެކަމާ ގުޅޭ ގޮތުން އެކި ފަހަރު މަތިން އާންމުން ކަންބޮޑުވުން ފާޅުކޮށްފައިވެއެވެ.