ޝާހީ ޒިންމާތަކާއި އިމްތިޔާޒުތަކުން އެކަހެރިވެވަޑައިގެން، އިނގިރޭސިވިލާތު ދޫކުރައްވައި ކެނެޑާއަށް ދިރިއުޅުން ބަދަލުކުރެއްވި ދުވަސްވަރު، ފުން މާޔޫސްކަމާއި ނަފުސާނީ ބޮޑު އަނދިރިގަނޑެއްގެ ތެރޭގައި ގާތްގަނޑަކަށް ދެ ހަފުތާއެއްހާ ދުވަސް ވޭތުކުރައްވަން ޖެހިވަޑައިގެންނެވި ކަމަށް ޑިއުކް އޮފު ސަސެކްސް، ޕްރިންސް ހެރީ ހާމަކުރައްވައިފިއެވެ.
ޙަޔާތުގެ އައު ބާބެއް ފައްޓަވައި، އަމިއްލަ މިނިވަންކަން ހޯއްދެވުމުގެ މަޤުސަދުގައި ޤައުމު ދޫކުރެއްވި ހެރީ، މި ފުން އިހުސާސްތައް ހިއްސާކުރައްވާފައިވަނީ ފުންނާބުއުސް ނިއުރޯސައިންޓިސްޓަކާއެކު ވީޑިއޯ މެދުވެރިކޮށް ބޭއްވެވި ޚާއްސަ ސެޝަނެއްގައެވެ. އަނބިކަނބަލުން މޭގަން އާއި ދެ ދަރިކަލުންނާއެކު ދާދިފަހުން އަލުން އަނބުރާ އިނގިރޭސިވިލާތަށް ވަޑައިގެންނެވި ހެރީގެ މި ވާހަކަފުޅުތަކުން، ޝާހީ ދިރިއުޅުމުގެ ފަހަތުގައިވާ ނަފުސާނީ ހަނގުރާމައިގެ ބޮޑުކަން ހާމަވެގެންދެއެވެ.
ހިތާމަތަކާ ކުރިމަތިލުމާއި އެފަދަ ހާލަތްތަކުން އަރައިގަތުމާ ގުޅޭގޮތުން ގެނެސްދިން މި އޮންލައިން ސެޝަންގައި، އެމެރިކާއަށް ވަޑައިގަތުމުގެ ކުރިން ކެނެޑާގައި ހޭދަކުރެއްވި ދުވަސްވަރުގެ ހާލަތު އެމަނިކުފާނު ސިފަކުރެއްވިއެވެ.
އެގޮތުން، އަބަދުވެސް ނުތަނަވަސްކަމާއި ފިއްތުންތަކުން ފުރިގެންވީ މާހައުލަކުން ކުއްލިއަކަށް ހަމަހިމޭން މާހައުލަކަށް ބަދަލުވުމުން ހަށިގަނޑަށް ކުރިމަތިވި ކުއްލި ލޮޅުމާއެކު، މީގެ ކުރިން ދުވަހަކުވެސް ތަޖުރިބާނުކުރައްވާ ފަދަ "އެޑްރިނަލިން ކްރައިސިސް"އެއް ކުރިމަތިވި ކަމަށް ހެރީ ވިދާޅުވިއެވެ. ދާއިމީ ނުތަނަވަސްކަމަށް ސިކުނޑި ހޭނިފައިވުމުގެ ސަބަބުން، އާދައިގެ ދިރިއުޅުމަކަށް ރުޖޫއަވުމުގައި ބޮޑެތި ގޮންޖެހުންތަކާ ކުރިމަތިލާންޖެހި، ގޭތެރޭގެ އާދައިގެ ކަންކަން ކުރުމަށްވެސް ނުކުޅެދި، މާޔޫސްކަމުގެ ތެރެއަށް ގެނބިވަޑައިގެންނެވި ކަމަށް ހެރީ ފާހަގަކުރެއްވިއެވެ.
ޕްރިންސް ހެރީ އާއި އަނބިކަނބަލުން މޭގަން މާކަލް، ޕްރިންސް އާޗީ އަދި ޕްރިންސެސް ލިލިބެޓްއާ އެކު--ފޮޓޯ/ޕީޕްލް ވޭތުވެދިޔަ ހަ އަހަރު ދުވަސް އެމެރިކާގައި ހޭދަކުރެއްވުމަށްފަހު، ހަތް އަހަރުގެ ޕްރިންސް އާޗީ އާއި ފަސް އަހަރުގެ ޕްރިންސެސް ލިލިބެޓް ގޮވައިގެން އެނބުރި އިނގިރޭސިވިލާތަށް ވަޑައިގެންނެވި ހެރީގެ އާއިލާ މިހާރު ދިރިއުޅެމުންދަނީ ކޮޓްސްވޯލްޑްސްގައެވެ.
މީގެއިތުރުން، ހެރީގެ އުމުރުން އެންމެ 12 އަހަރުފުޅުގައި މަންމަ ޕްރިންސެސް ޑަޔާނާ އަވަހާރަވުމުން ލިބިވަޑައިގެންނެވި ފުން ހިތާމަތަކުގެ ވާހަކަވެސް މި ވީޑިއޯ ސެޝަންގައި ވަނީ ހިއްސާކުރެއްވާފައެވެ. ޒުވާން އުމުރުގައި ޝާހީ ސިފައިންގެ ޚިދުމަތާ ގުޅިވަޑައިގެން އަފުޣާނިސްތާނުގެ ހަނގުރާމައަށް ދެ ފަހަރެއްގެ މަތިން ވަޑައިގަތީ، އެ ފުން ހިތާމަތަކުން ފިލައިވަޑައިގަތުމުގެ ބޭނުމުގައި ކަމަށް ހެރީ ވިދާޅުވިއެވެ. އަދި މަންމަގެ ވަކިވެދިޔުމަށްފަހު، އުފާވެރިކަމާއެކު ހިނިތުންވެ އުޅުއްވުމަކީ މަންމައަށް ވެވޭ ބޭވަފާތެރިކަމެއް ކަމަށް ދެކެވަޑައިގެންނެވުނު ކަމަށާއި، ކުށްވެރިކަމުގެ އެ އިހުސާސާ ހުރެ ދިގު މުއްދަތަކަށް އަމިއްލަ ޖަޒުބާތުތައް ފޮރުއްވައިގެން ހުންނެވި ކަމަށްވެސް ހެރީ ވަނީ ހާމަކުރައްވާފައެވެ.
ޕްރިނސް ހެރީ، މަންމަ ޑަޔާނާ އަދި ބޭބެ ވިލިއަމްސްއާ އެކު--ފޮޓޯ/ބީބީސީ މަންމަ ޑަޔާނާގެ ޖަނާޒާއަށްފަހު ގާތްގަނޑަކަށް ދެ އަހަރު ވަންދެން ލޮލުން ކަރުނައެއް ނުއޮހޮރޭ ކަމަށް ވިދާޅުވަމުން ހެރީ ހާމަކުރެއްވި ގޮތުގައި، އެ ޖަޒުބާތުތައް ހުޅުވިގެންދިޔައީ ތެރަޕިސްޓެއްގެ ލަފާގެ މަތިން ޑަޔާނާ ބޭނުންކުރެއްވި ސެންޓު ފުޅިއެއްގެ ވަސް ބައްލަވައިލެއްވި ހިސާބުންނެވެ. އެއާއެކު އެތެރޭގައި ފޮރުވިފައިވި ހުރިހާ އިހުސާސްތަކެއް ބޭރުވެ، މަންމަ އަބަދުވެސް އެދިވަޑައިގަންނަވާނީ ދަރިކަލުން އުފަލުގައި ހުރުމަށްކަން ވިސްނިވަޑައިގެންނެވި ކަމަށް ވިދާޅުވިއެވެ.
މި ބައްދަލުވުމުގައި ވާހަކަދައްކަވަމުން އެރިޒޯނާ ޔުނިވަސިޓީގެ ޕްރޮފެސަރު އަދި ނިއުރޯސައިންޓިސްޓް މޭރީ-ފުރެންސިސް އޮކޮނަރް ވިދާޅުވީ، ލޯބިވާ މީހަކު ވަކިވެދިއުމުން އިންސާނާގެ ސިކުނޑި އެކަން މުޅިން ގެއްލިދިޔުމެއްގެ ގޮތުގައި ޤަބޫލުކުރަން ފަސްޖެހޭ ކަމަށެވެ. އަދި އެ މީހަކު އަލުން އެނބުރި އަތުވެދާނެ ކަމުގެ އިންތިޒާރެއްގައި ސިކުނޑި ދެމިއޮންނަ ކަމަށްވެސް އޭނާ ފާހަގަކުރެއްވިއެވެ. މި މުހިންމު ޕްރޮގްރާމް ރެކޯޑުކޮށްފައިވަނީ މިދިޔަ ހޫނު މޫސުމުގައި އެމެރިކާގެ ކެލިފޯނިއާގައެވެ.