އަމިއްލަ ނަފުސަށް އަމާޒުވާ ފާޑުކިޔުންތަކަށް ކެތްކުރެވުނު ކަމުގައި ވިޔަސް، ކާކުކަން ނޭނގޭ ފަރާތްތަކުން އާއިލާގެ ފޮޓޯތައް ބޭނުންކޮށްގެން ދިން އިންޒާރުތަކުގެ ސަބަބުން ނުހަނު ބޮޑަށް ކަންބޮޑުވި ކަމަށް މަޝްހޫރު ފިލްމީ ތަރި މަނޯޖް ބަޖްޕާއީ ހާމަކޮށްފިއެވެ.
ފާޑުކިޔުންތަކަކީ އާ ކަމެއް ނޫން ނަމަވެސް، ނެޓްފްލިކްސްއިން ގެނެސްދޭ އޭނާގެ އާ ފިލްމުގެ އަސްލު ނަމާ ގުޅިގެން އުފެދުނު ޚިޔާލުތަފާތުވުންތަކުގައި، އާއިލާއަށް އަމާޒުކޮށް ސޯޝަލް މީޑިއާގައި ދިން ހަމަލާތަކަކީ އެއްގޮތަކަށް ވެސް ބަލައިގަނެވޭނެ ކަންކަމެއް ނޫން ކަމަށް ދާދި ފަހުން ދިން އިންޓަވިއުއެއްގައި މަނޯޖް ބުންޏެވެ. އަދި އާއިލާގެ މެންބަރުންގެ ފޮޓޯތައް އާންމުކޮށް އިންޒާރު ދެމުންދިއުމުން، އެމީހުންގެ ރައްކާތެރިކަމާ މެދު ބިރު ހީވި ކަމަށް ވެސް އޭނާ ފާހަގަކުރިއެވެ.
މިއަހަރުގެ ފެބްރުއަރީ މަހު 'ގޫސްކޯރު ޕަންޑިތު'ގެ ނަމުގައި މި ފިލްމު އިއުލާނު ކުރުމާއެކު، ސޯޝަލް މީޑިއާގައި ބޮޑު ނުރުހުމެއް އުފެދުނެވެ. ސިޔާސީ ފަރާތްތަކާއި އެކި ޖަމިއްޔާތަކުން ދެކުނު ގޮތުގައި އެ ނަމަކީ ވަކި ބަޔަކަށް އަމާޒުކޮށްފައިވާ، އިހުސާސްތަކަށް އަސަރުކުރާ ނަމެކެވެ. މި ހަމަނުޖެހުންތަކާ ގުޅިގެން ފަހުން ފިލްމުގެ ނަން ވަނީ 'ގަޖަބް ރާތު'އަށް ބަދަލުކޮށްފައެވެ.
'ގޫސްކޯރު ޕަންޑިތު'ގެ ޓީޒާގެ ބައެއް މަންޒަރުތައް-- ފޮޓޯ/ އިންސްޓަގްރާމްޕީޓީއައިއަށް ދިން އިންޓަވިއުއެއްގައި މަނޯޖް ބުނީ، މި މައްސަލަ މިހާ ބޮޑުވެގެންދާނެ ކަމަށް އެއްވެސް ވަރަކަށް އުންމީދު ނުކުރާ ކަމަށެވެ. އެކްޓަރެއްގެ ހައިސިއްޔަތުން އަމިއްލަ ނަފުސަށް އަމާޒުވާ ފުރައްސާރަ އާއި ފާޑުކިޔުންތަކަށް ހޭނިފައިވީ ނަމަވެސް، އަނބިދަރިންނާ ހަމައަށް އެކަން ދިއުމަކީ ކެތްކުރަން ދަތިވި ކަމެއް ކަމަށް އޭނާ ބުންޏެވެ. މަނޯޖް ކައިވެނިކޮށްގެން އުޅެނީ ކުރީގެ ބަތަލާ ޝަބާނާ ރަޒާއާއެވެ. އަދި އެ ދެމަފިރިންގެ އަންހެން ކުއްޖަކު ހުރެއެވެ.
"އަހަރެންނަކީ ދިރިއުޅުމުގައި މަޑުމައިތިރިކަމަށް ލޯބިކުރާ މީހެއް. އެކަމަކު އާއިލާގެ ދިފާއުގައި އަބަދުވެސް ނުކުންނާނަން. ނަމަވެސް މިފަހަރު އަހަރެން ކުރިމަތިލާނީ ވަކި ކާކާ؟ މިއީ ފަހަތުގައި ތިބީ ކޮން ބައެއްކަން ނޭނގޭ އެކައުންޓްތަކަކުން ހިންގި އަމަލުތަކެއް،" މަނޯޖް ބުންޏެވެ.
ފިލްމުގެ ވާހަކަ އާއި ކެރެކްޓާއާ ގުޅުވައިގެން ފުރަތަމަ ނަން ހޮވިއިރު، މިފަދަ ހަމަނުޖެހުމެއް އުފެދިދާނެ ކަމަށް ވިސްނިފައި ނެތް ކަމަށް މަނޯޖް ބުންޏެވެ. އަދި މި މައްސަލައިގައި އަޑުއުފުލި ގިނަ މީހުންނަކީ ފިލްމުގެ ޙަޤީޤަތް ނޭނގި، ހަމައެކަނި ނަމަށް ބަލައިގެން ވާހަކަދެއްކި ބައެއް ކަމަށާއި، މި މައްސަލަ ހޫނުވެ މަރުގެ އިންޒާރު ލިބުމުން ބައެއް ސަރަހައްދުތަކަށް ނުކުމެ އުޅުމުގައި ސަމާލުވުމަށް ކަމާބެހޭ ފަރާތްތަކުން އިރުޝާދު ދިން ކަމަށް ވެސް އޭނާ ހާމަކުރިއެވެ.
ރިތޭޝް ޝާހް ޑައިރެކްޓްކޮށް، ނީރަޖް ޕާންޑޭގެ 'ފްރައިޑޭ ސްޓޯރީޓެލާސް'އިން ގެނެސްދޭ މި ފިލްމުގައި މަނޯޖް އަދާކުރަނީ 'އަޖޭ ނިރްވެތު' ކިޔާ ފުލުހެއްގެ ރޯލެވެ. އެންމެ ރެއެއްގެ ތެރޭގައި ހިނގާ ކަންތައްތަކެއްގެ މައްޗަށް ބިނާކޮށްފައިވާ މި ފިލްމުގެ ރޯލަށް ތައްޔާރުވުމަށްޓަކައި، ފުލުހުންގެ ޙަޤީޤީ ދިރިއުޅުމާއި އިހުސާސްތައް ދެނެގަތުމަށް ގިނަ ފުލުހުންނާ ބައްދަލުކޮށް މައުލޫމާތު ހޯދި ކަމަށް މަނޯޖް ވަނީ ބުނެފައެވެ.
ހިންދީ ސިނަމާގައި ފުލުހުންގެ ޙަޤީޤީ ދަތިތައް ނުދައްކައި، މާ ބޮޑަށް ހައިރާންކުރުވަނިވި ގޮތަކަށް ސިފަކުރާތީ އެކަމަށް އޭނާ ފާޑުކިޔެވެ. ބޮޑު އާބާދީއެއް ބަލަހައްޓާ ފުލުހުން ކުރަނީ ނުހަނު ބުރަ އަދި ގޮންޖެހުން ބޮޑު މަސައްކަތެއްކަން އޭނާ ހަނދާންކޮށްދިނެވެ.
މި ފިލްމުގައި މަނޯޖާއެކު މުހިންމު ރޯލުތަކުން ދިވްޔާ ދައްތާ، ސާގިބް ސަލީމް، ޝްރައްދާ ދާސް، އަކްޝޭ އޮބެރޯއީ، ކީކޫ ޝަރުދާ އަދި ނުޝްރަތު ބަރޫޗާ ފެނިގެންދާނެއެވެ. މަނޯޖާއެކު ކުރެވުނު މަސައްކަތަށް ތަޢުރީފުކުރަމުން ދިވްޔާ ބުނީ، މަނޯޖަކީ ކޮންމެ ރޯލަކުންވެސް ތަފާތު މޮޅު ހުނަރެއް ދައްކުވައިދޭ ފަންނާނެއް ކަމަށެވެ.