ޕާކިސްތާނުގެ ޓީވީ ސްކްރީންތަކަށް ފަހަކަށް އައިސް ގެނެސްދޭ ޑްރާމާތަކުގެ ތެރެއިން ގިނަ ބައެއްގެ ސަމާލުކަން ހޯދާފައިވާ "ދާރޭ ނިޖާތު"އިން ފެންނަ ބަޠަލު އަބޫބަކުރުގެ ކެރެކްޓަރަކީ ޙަގީގަތަކަށް ވާން މާ ފުރިހަމަ ޝަޚްޞިއްޔަތެއް ކަމަށް ބެލުންތެރިން ފާހަގަކުރެއެވެ.
އިންސާނީ ތަބީޢަތާ ނުބައްދަލު މި ފުރިހަމަކަމާ ހުރެ، މިއީ ހަމައެކަނި ޚިޔާލީ ތަޞައްވުރެއްގައި އުފަންވެފައިވާ "އޭއައި" ނުވަތަ ރޮބޮޓިކް ކެރެކްޓަރެއްގެ ގޮތުގައި އެއްބަޔަކު ސިފަކުރާއިރު، އޭނާގެ މިޒާޖުގައި ހުރި މަޑުމައިތިރިކަމާއި ޙިކުމަތްތެރިކަމަކީ ގިނަ ބެލުންތެރިންގެ ހިތް އަތުލައިގަތް މައިގަނޑު ސަބަބަށް ވެސް ވަނީ ވެފައެވެ.
އަމިއްލަ ޖަޒުބާތުތައް ފުރިހަމައަށް ކޮންޓްރޯލްކޮށް، އަނބިމީހާގެ ފަރާތުން ކުރިމަތިވާ ރުޅިއެރުވުންތަކުގެ ކުރިމަތީގައި ކެތްތެރިކަން އިސްކުރުމުގެ އިތުރުން މައިންބަފައިންނަށް ކިޔަމަންތެރިވުމުގައި އަބޫބަކުރު ދައްކުވައިދެނީ އިސްލާމީ ރިވެތި އުސޫލުތަކަށް ފުރިހަމައަށް ތަބާވާ ޒުވާނެއްގެ ދިރިހުރި މިސާލެވެ. އެހެންކަމުން މިއީ ޝައުގުވެރި ލޯބީގެ ވާހަކައެއްގެ ސިފައިގައި ގެނެސްދޭ ދީނީ އަޚްލާގީ މެސެޖެއްތޯ ނުވަތަ މާ ގިނަ ދީނީ ނަޞޭޙަތްތަކެއްގެ ސަބަބުން ލޯބީގެ ވާހަކައިގެ އަސްލު ރަހަ ގެއްލިފައިވާ އުފެއްދުމެއްތޯ މިއަދު މިވަނީ ސުވާލު އުފެދިފައެވެ.
މި ވާހަކައިގެ ތެރެއިން އެންމެ ބޮޑަށް ބަހުސްކުރެވެމުންދާ ކަމަކީ، ގަސްދުގައި އަބޫބަކުރުގެ ކެތްތެރިކަން އިމްތިޙާނުކުރަމުންދާ އޭނާގެ އަނބިމީހާއާ މެދު އޭނާ އެހާ އޯގާތެރިކޮށް ހިތަންޖެހޭ ސަބަބާމެދުގައެވެ. ދީނީ އުސޫލުތަކަށް ތަބާވާ މަޑުމައިތިރި ފިރިއެއްގެ ޒިންމާ އަދާކުރުމުގެ އިތުރުން، އަނބިމީހާއާ މެދު އޭނާގެ ހިތުގައި ޚާއްޞަ ޝުޢޫރުތަކެއް ވާކަން ހާމަވާ ކޮންމެ ދަނޑިވަޅަކީ ބެލުންތެރިން ހައިރާންކޮށްލާ ކަމެކެވެ. ކުރީގެ އެއްވެސް މަންޒަރަކުން އެފަދަ ލޯތްބެއްގެ ކުލަވަރު ފެނިފައި ނުވާއިރު، މި ކެތްތެރިކަމުގެ ފަހަތުގައިވަނީ ފޮރުވިފައިވާ ލޯބިތޯ ނުވަތަ ދީނީ ހަމަތަކުގެ މައްޗަށް ބިނާވެފައިވާ ސުލޫކެއްތޯ އޮޅުންފިލުވަން ބެލުންތެރިންނަށް ވަނީ އުނދަގޫވެފައެވެ.
"ދާރޭ ނިޖާތު"ގެ މަންޒަރެއްގައި ޝެހެރްޔާރު އަދި ބަތަލާ ދުއްރޭ ފިޝާން--ފޮޓޯ/ފޭސްބުކްއަނެއްކޮޅުން، ވާހަކަލިޔުންތެރިޔާ ޢުމައިރާ އަޙްމަދު ބެލުންތެރިންނަށް ދޭން މަސައްކަތްކުރާ މެސެޖަކީ، ކައިވެނީގެ މާތް ގުޅުމުގެ ބާރު ކަމަށްވެސް ބައެއް މީހުން އަންނަނީ ބުނަމުންނެވެ. އެންމެ ޠާހިރު ޢަގުދަކުން ދެމީހުން ގުޅި، އެކަކު އަނެކަކަށް ރައްކާތެރިކަން ފޯރުކޮށްދޭ ހާލަތުގައި، ފިރިއެއްގެ ފަރާތުން އަނބިމީހާއަށް ލިބެންޖެހޭ އަޅާލުމާއި އިޙްތިރާމް އަބޫބަކުރުގެ ކެރެކްޓަރުން ވަރަށް ރީއްޗަށް ދައްކުވައިދެއެވެ. މި މަންޒަރުތައް ޙަގީގީ ދުނިޔެއާ ދުރު ކަމަށް ފެނުނު ނަމަވެސް، މިއީ މުޖުތަމަޢުގެ ކޮންމެ ފިރިއަކުވެސް ނަމޫނާއަކަށް ބަލަންޖެހޭ މިންގަނޑެއްގެ ގޮތުގައި ބެލެވިދާނެއެވެ.
ޑްރާމާގެ ފުރިހަމަކަން ބޮޑު ނަމަވެސް، ފޯނުން ފެންނަ ގުރުއާނުގެ އާޔަތްތަކުން ފެށިގެން އެކި މަންޒަރުތަކުގައި ބޭނުންކޮށްފައިވާ ދީނީ އިޝާރާތްތަކަކީ ބެލުންތެރިންގެ ސަމާލުކަން ވާހަކައިގެ މައިގަނޑު ރޫޙުން ބޭރުކޮށްލާ ކަމެއް ކަމަށް ބައެއް ފަރާތްތަކުން ދެކެއެވެ. ޕާކިސްތާނު ޑްރާމާތަކުގެ ބެލުންތެރިންނަކީ އަބަދުވެސް ރީތި ލޯބީގެ ވާހަކަތަކަށް ލޯބިކުރާ ބަޔަކަށް ވުމުން، މާ ގިނަ ފަލްސަފާތަކަކާ ނުލައި ވެސް މިފަދަ ވާހަކައަކުން ބެލުންތެރިންގެ ހިތްތަކާ ހަމައަށް ވާސިލުވެވިދާނެއެވެ.
ނަމީރު ޚާން، ޝަހެރްޔާރު މުނައްވަރު އަދި ދުއްރޭ ފިޝާން ސަލީމް ފަދަ ކުޅަދާނަ ތަރިންގެ މޮޅު އެކްޓިންގްއާއެކު ޑައިރެކްޓަރު ޘާގިބު ޚާން ގެނެސްދޭ "ދާރޭ ނިޖާތު"ގެ އަބޫބަކުރަކީ ޙަގީގަތުގައިވެސް އަތްނުފޯރާ ފަށުގައިވާ ފުރިހަމަ މިސާލެއްތޯ ނުވަތަ އަޅުގަނޑުމެންގެ ތެރެއިން ފެންނަންޖެހޭ ނަމޫނާއެއްތޯ ކުރެވޭ ބަހުސް އަދިވެސް އޮތީ ކުރިއަށެވެ.