މަރުކަޒީ ބޭންކް، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)އަށް އައްޔަނުކުރީ ފައިނޭންޝަލް އިންޓެލިޖެންސް ރިޕޯޓު ލީކުވުމާ ގުޅިގެން ނޫން ކަމަށް އެފްއައިޔޫގެ ވެރިއަކަށް މި ފަހުން ހަމަޖެއްސި އިސްމާއިލް ސާޖިދު މިއަދު ވިދާޅުވެއްޖެއެވެ.
ކާކުކަން ނޭނގޭ ގޮތަށް ހިންގާ އެކްސް އެކައުންޓު 'ހަސަން ކުރުސީ'އިން އެ ރިޕޯޓު ލީކުކޮށްލީ، މި މަހު ދެވަނަ ދުވަހެވެ.
އެ ރިޕޯޓުގައި، ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕުގެ ސީނިއާ ޑެޕިއުޓީ ލީޑަރު, އިބްރާހީމް ޝުޖާއު (ޝުޖާ)އަށް ތުހުމަތަކެއް ކުރެވޭއިރު، އެ ރިޕޯޓުގައި ސިފައިންގެ ވެލްފެއާ ކޯޕަރޭޓިވް (ސިވެކް) މެދުވެރިކޮށް ޝުޖާއަށް ގިނަ އަދަދެއްގެ ފައިސާ ޖަމާކުރި ގޮތުގެ ތަފުސީލުތައް ހިމެނެއެވެ.
މި ރިޕޯޓް ލީކް ވެފައިވަނިކޮށް, "ސަން" އަށް އެނގިފައިވާ ގޮތުގައި އަޝްރަފް ވަނީ, އެފްއައިޔޫގެ ވެރިޔާގެ މަގާމުން ދުރުކޮށް, އެ ބޭންކުގެ ހެޑް އޮފް ރިސްކް އެންޑް ކޮމްޕަޔަލަންސަށް ބަދަލުކޮށްފައެވެ. އޭގެފަހުން އެ މަގާމަށް ސާޖިދު އައްޔަނުކުރިކަން އެމްއެމްއޭއިން ހާމަކުރިއެވެ. މިދިޔަ މަހުގެ 14 ވަނަ ދުވަހާ ޖެހެންދެން އޭނާ ހުންނެވީ ޓެކްސް އެޕީލް ޓްރައިބިއުނަލްގައެވެ.
އެ ރިޕޯޓަށް އިޝާރަތްކުރައްވައި، އެފްއައިޔޫގެ މައުލޫމާތުތައް ނޫސްވެރިންނާ ހިއްސާކުރަން ބޭއްވި ބައްދަލުވުމުގައި ސާޖިދު ވިދާޅުވީ، އޭނާ އެ މަގާމަށް އައްޔަނުކުރުމަށް މިދިޔަ މަހުގެ 31ގައި ނިންމާފައި އޮތް ކަމަށެވެ.
ނަމަވެސް، ރަސްމީކޮށް އެކަން އިއުލާނުކުރީ މި މަހުގެ ތިންވަނަ ދުވަހު ކަމަށާއި އެ މަގާމަށް އޭނާ އައްޔަނުކުރެއްވީ ރިޕޯޓެއް ލީކުވުމާ ގުޅިގެން ނޫން ކަމަށް ސާޖިދު ވިދާޅުވިއެވެ.
ހަގީގަތަކީ އަޅުގަނޑު އައްޔަންކުރުމުގެ ޑިސިޝަންއައީ ބުރާސްފަތި ދުވަހެއްގައި. އެ ރިޕޯޓު ލީކުވެފައި އިންނަނީ އެ ހަފުތާ ބަންދުގައި. މާނައަކީ ހުކުރު ހޮނިހިރު ހިސާބުގައޭ ލީކުވެފައި އޮތީ. އެހެންވީމާ، ރިޕޯޓެއް ލީކުވުމާ ގުޅިގެން ކުރި އެޕޮއިންޓުމަންޓެއް ނޫން. އެ އެޕޮއިންޓުކުރި ފަރާތަކަށް އެނގޭނީ އެބޭފުޅެއްގެ މަގުސަދަކީ ކޮބައިކަން. ނަމަވެސް، އަޅުގަނޑު ގަބޫލުކުރާ ގޮތުގައި، ފައިނޭންޝަން އިންޓެލިޖެންސްގެ މަސައްކަތްތައް ހަރުދަނާކުރުމަށް އެޅި ފިޔަވަޅެއް ކަމަށް ޕާސަނަލީ އަޅުގަނޑު ގަބޫލުކުރަނީއެފްއައިޔޫގެ ވެރިއަކަށް ހުންނެވި އިސްމާއިލް ސާޖިދު
އޭގެއިތުރަށް، އެފްއައިޔޫގެ ވެރިއަކަށް އައްޔަނުކުރީ އެ ޔުނިޓުގެ މަސައްކަތްތައް މިހާރަށް ވުރެ ހަރުދަނާ ކުރަން ކަމަށް ސާޖިދު ގަބޫލުކުރައްވައެވެ.
އެފްއައިޔޫއަކީ ބޭންކުތައް ފަދަ ތަންތަނުން ލިބޭ މައުލޫމާތުތައް އެނަލައިޒް ކުރުމަށް ފަހުގައި، ތަހުގީގީ އިދާތާރަކަށް ފޮނުވާ ޔުނިޓެކެވެ.
އެ ރިޕޯޓު ލީކުވެފައި ވަނިކޮށް ވަނީ، ޝުޖާއު މުގައްރިރުކަން ކުރައްވާ އެސްއޯއީ ކޮމިޓީންނާއި މާލިއްޔަތު ކޮމިޓީން ވަކިކޮށްފައެވެ.