ޓެކްނޮލޮޖީގެ އެންމެ ވަރުގަދަ އެއް ކުންފުނި، ގޫގުލްއިން މުއާސަލާތީ ދާއިރާއަށް ގެންނަ އިންގިލާބީ ބަދަލެއްގެ ގޮތުން އެ ކުންފުނީގެ އެންމެ ފަހުގެ ފްލެގްޝިޕް ސްމާޓްފޯން، ޕިކްސެލް 10 އަށް، މޮބައިލް ނެޓްވޯކް ނުވަތަ ވައި-ފައި ނެތް ހާލަތްތަކުގައި، ސެޓެލައިޓް މެދުވެރިކޮށް ވަޓްސްއެޕުން ވޮއިސް އަދި ވީޑިއޯ ކޯލް ކުރުމުގެ މުޅިން އާފިޗާއެއް ތައާރަފްކޮށްފިއެވެ.
މިކަމުގެ ސަބަބުން، ޕިކްސެލް 10 ވެގެންދާނީ ދުނިޔޭގެ ފުރަތަމަ ފަހަރަށް މިފަދަ ޚިދުމަތެއް ފޯރުކޮށްދޭ ސްމާޓްފޯނަށެވެ.
މި ޚާއްސަ ފީޗާގެ ވާހަކަ ގޫގުލް އިން ހާމަކޮށްފައިވަނީ، އޮގަސްޓް 20 ގައި "މޭޑް ބައި ގޫގުލް" އިވެންޓުގައި ފޯނު ތައާރަފްކުރިތާ ދުވަސްކޮޅެއް ފަހުން، އެކްސް ގައި ކުރި ޕޯސްޓެއްގައެވެ.
މި ޚިދުމަތް ޕިކްސެލް 10 ބޭނުންކުރާ ފަރާތްތަކަށް ލިބެން ފަށާނެ ކަމަށް އިއުލާންކޮށްފައިވަނީ މިހިނގާ އޮގަސްޓް މަހުގެ 28 ވަނަ ދުވަހުން ފެށިގެންނެވެ. އެއީ ޕިކްސެލް 10 ފޯނުތައް ފުރަތަމަ ފަހަރަށް ބާޒާރުގައި ވިއްކަން ފަށާ ދުވަހާ ދިމާވާ ތާރީޚެވެ.
ގޫގުލް އިން އާންމުކުރި ވީޑިއޯއަކުން ދައްކާ ގޮތުގައި، ސެޓެލައިޓް ނެޓްވޯކް މެދުވެރިކޮށް ވަޓްސްއެޕް ކޯލެއް އަންނަ ހިނދު، ފޯނުގެ ސްޓޭޓަސް ބާ ގައި ސެޓެލައިޓެއްގެ ނިޝާނެއް ފެންނާނެއެވެ. އޭގެ ފަހުން، އާންމުކޮށް ކޯލްތަކަށް ޖަވާބުދޭ އުސޫލުން، އެއްވެސް ތަފާތެއް ނެތި ވޮއިސް ނުވަތަ ވީޑިއޯ ކޯލް ކުރިއަށް ގެންދެވޭނެއެވެ. ހަމައެކަނި ތަފާތަކީ، މި ކޯލް ގުޅިފައި ހުންނާނީ މޮބައިލް ނެޓްވޯކް ނުވަތަ ވައި-ފައިގެ ބަދަލުގައި ސެޓެލައިޓް ނެޓްވޯކަކާ ކަމެވެ.
ނަމަވެސް، މި ޚިދުމަތް ބޭނުންކުރުމުގައި ބައެއް ޝަރުތުތައް ހިމެނެއެވެ. ގޫގުލް އިން ބުނާ ގޮތުގައި، މި ޚިދުމަތް ލިބޭނީ އެކަމަށް ކަނޑައަޅާފައިވާ ވަކި މޮބައިލް ކެރިއަރުތަކެއްގެ ޔޫޒަރުންނަށެވެ. އަދި މި ޚިދުމަތް ބޭނުންކުރުމަށް އިތުރު އަގެއް ނަގާފާނެ ކަމުގެ އިޝާރާތެއްވެސް ވަނީ ދީފައެވެ. މީގެ އިތުރުން، މި ފީޗާ މެދުވެރިކޮށް ވަޓްސްއެޕުން ޓެކްސްޓް މެސެޖް ކުރެވޭނެ ކަމެއް އަދި ކަށަވަރެއް ނުވެއެވެ.
މި އާ ޚިދުމަތަކީ، ޕިކްސެލް 10 ގައި ހިމަނާފައިވާ ސެޓެލައިޓް މުއާސަލާތީ ޚިދުމަތްތަކުގެ ތެރެއިން ކުރިއެރުމެކެވެ. ކުރިން ގޫގުލް އިން ވަނީ، ނޮން-ޓެރެސްޓްރިއަލް ނެޓްވޯކް ޕްރޮވައިޑަރެއް ކަމަށްވާ ސްކައިލޯ އާ ގުޅިގެން، ފައިންޑް ހަބް ނުވަތަ ގޫގުލް މެޕްސް މެދުވެރިކޮށް ސެޓެލައިޓް ބޭނުންކޮށްގެން ލޮކޭޝަން ޝެއާ ކުރުމުގެ ޚިދުމަތްވެސް ތައާރަފްކޮށްފައެވެ.