ވޯޓާ ތީމް ޕާކް ސަރަހައްދުން ފެނުނު މީހާގެ މަރުގައި ތުހުމަތު ކުރެވޭ ކަމެއް ނެތް: ފުލުހުން

ވޯޓާ ތީމް ޕާކް ސަރަހައްދު: ވޯޓާ ތީމް ޕާކް ސަރަހައްދުން ފެނުނު މީހާގެ މަރުގައި ތުހުމަތު ކުރެވޭ ކަމެއް ނެތް ކަމަށް ފުލުހުން ބުނި -- ފޮޓޯ/ ޕީއެސްއެމް

ހުޅުމާލޭ ވޯޓާ ތީމް ޕާކު ހަދަން ދޫކޮށްފައި އޮތް ސަރަހައްދުން މަރުވެ, ކުނިވެފައި އޮއްވައި ފެނުނު މީހާގެ މަރުގައި ތުހުމަތު ކުރެވޭ ކަމެއް ނެތް ކަމަށް ފުލުހުން ބުނެފިއެވެ.

ފުލުހުން މިދިޔަ ހޯމަ ދުވަހު މީޑިއާތަކާ ހިއްސާކުރި މެސެޖެއްގައި ބުނީ، ވޯޓާ ތީމް ޕާކެއް ހަދަން ދޫކުރި ސަރަހައްދުން މަރުވެފައި އޮތް މީހަކު ފެނިގެން ފުލުހުން ހަރަކާތްތެރިވި ކަމަށެވެ.

އެއީ ފިރިހެނެއް ކަމަށާއި އޭނާގެ ހަށިގަނޑު ކުނިވެފައި އޮތުމުން، އެއީ ކާކުކަން ދެނެގަންނަން މަސައްކަތްކުރަމުންދާ ކަމަށް އޭރު ފުލުހުން ބުންޏެވެ. އަދި އެއީ ބުރާސްފަތި ދުވަހުން ފެށިގެން ގެއްލިގެން ހޯދަމުން ދިޔަ ބިދޭސީއެއް ކަމަށް ބެލެވޭނެ ބައެއް ކަންކަން ހުރި ކަމަށް ވެސް އެ ދުވަހު ފުލުހުން ބުންޏެވެ.

ފުލުހުން މިއަދު "ސަން"އަށް ބުނީ މަރުވެފައި އޮއްވައި ފެނިފައިވަނީ މިދިޔަ ބުރާސްފަތި ދުވަހުން ފެށިގެން ގެއްލިގެން ހޯދަމުން ދިޔަ، ނޭޕާލަށް ނިސްބަތްވާ މީހެއް ކަމަށެވެ. އެގޮތުން އެއީ ރުޕަން ތަޕާ މަގަރު ކިޔާ 29 އަހަރުގެ މީހެއްކަން ފޮރެންސިކް ތަހުލީލުތަކުން ކަށަވަރުކުރެވިފައިވާ ކަމަށް އެ މުއައްސަސާއިން ބުންޏެވެ.

"މިހާތަނަށް ބެލިބެލުމުން އޭނާގެ މަރުގައި ތުހުމަތު ކުރެވޭ އެއްވެސް ކަމެއް ފާހަގަކުރެވިފައި ނުވޭ،" ފުލުހުން ބުންޏެވެ.

އެ މައްސަލަ ފުލުހުން ދަނީ ތަހުގީގު ކުރަމުންނެވެ.

ވޯޓާ ތީމް ޕާކް ހެދުމުގެ މަސައްކަތް މެލޭޝިއާގެ ކުންފުންޏަކާ 2017 ވަނަ އަހަރު ހަވާލުކުރި ނަމަވެސް، އެ މަސައްކަތް ނުނިމި، މިހާރު އެ ސަރަހައްދު އޮންނަނީ ބޭނުންނުކޮށެވެ.

comment ކޮމެންޓް