ނޫސްވެރިން 'އުލު ބައިންދަން' ޖެހޭ ކަމަށް ވިދާޅުވެ، ސަރުކާރު ހިންގާ ޕީއެންސީގެ ޕާލިމަންޓްރީ ގްރޫޕު (ޕީޖީ) ލީޑަރު އިބްރާހިމް ފަލާހް ދެއްކެވި ވާހަކަ ކުށްވެރިކުރުމުން، މި ސަރުކާރުގެ ސިޔާސީ މަގާމެއްގައި ހުންނެވި އިބްރާހިމް ސައީދު (ކޭޑް) މިއަދު ވަޒީފާއިން ވަކިކޮށްފިއެވެ.
އޭނާ ހުންނެވީ ސްޕޯޓްސް މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމުގައެވެ.
ފަލާހް ދެއްކެވި ވާހަކަތަކާ ގުޅިގެން ވަރަށް ބޮޑަށް ފާޑުކިޔުން ވަނީ އަމާޒުވެފައެވެ. އިދިކޮޅު އެމްޑީޕީން ވެސް ފަލާހްގެ ވާހަކަތައް ކުށްވެރިކުރިއެވެ. އަދި، ނޫސްވެރިންގެ ޖަމިއްޔާ (އެމްޖޭއޭ)އިން ވަނީ ފަލާހާއި ޕީއެންސީން ނޫސްވެރިންގެ ކިބައިން މާފަށް އެދެންޖެހޭނެ ކަމަށާއި އެ ވާހަކަތައް ދެއްކެވީ ބިރުދައްކަން ކަމަށް ބުނެފައެވެ.
'ސަން'އަށް އެނގިފައިވާ ގޮތުގައި ފަލާހްގެ ވާހަކަތައް ކުށްވެރިކުރުމުން ކޭޑް އަދާކުރަމުން އައި ސިޔާސީ ވަޒީފާއިން މިއަދު ވަނީ ވަކިކޮށްފައެވެ.
ފަލާހްގެ ވާހަކަތައް ކުށްވެރިކޮށް ފޭސްބުކްގައި ކުރި ޕޯސްޓެއްގައި ކޭޑް ވަނީ ފަލާހަށް ވަރަށް ބޮޑަށް ފާޑުވިދާޅުވެފައެވެ.
"މި ކަލޭގެ ނޫސްވެރިން އުލަށް އަމުނާ މަރާލަން ގޮވާލި މައްސަލަ ވެސް ބަލަންޖެހޭނެ،" އޭނާ ޕޯސްޓުގައިވެއެވެ.
މަޖިލިސް ތަޅުމުގައި އިއްޔެ މީޑިއާތައް ކޮންޓްރޯލް ކުރާ ބިލަށް ބަހުސްކުރައްވަމުން ފަލާހު ވިދާޅުވީ، ބައެއް ނޫސްތަކުގައި އޭނާއޭ ކިޔައިގެން ލިޔުނު ނުހައްގު ޚަބަރުތަކުގެ ސަބަބުން އޭނާއަކީ ނިކަމެތި ކަމެއް ދިމާވެފައި ހުރި މީހެއް ކަމަށެވެ.
އެ ފެންވަރުގައި މީޑިއާތައް މަސައްކަތް ކުރުމުން ލާން ޖެހެނީ ޖަލަކަށް ނޫން ކަމަށާއި ނޫސްވެރިން 'އުލުބައިދަންވީ' ކަމަށް ފަލާހު ވިދާޅުވިއެވެ. ރަދީފުގައި ބުނާ ގޮތުން، އުލުބޭންދުމަކީ އިހު ޒަމާނުގައި މީހުން މެރުމަށް ހަދާ ގޮތެކެވެ. އެގޮތުން، އުލު ބައިންދާއިރު، ތޫނުކޮށްފައި ހުންނަ ދަގަނޑު އުލެއްގައި މީހާ ބައިންދާ ކަމަށް ރަދީފުގައި ބުނެފައިވެއެވެ.
ފަލާހުގެ މި ވާހަކައާ ގުޅިގެން ވަރަށް ގިނަ ބަޔަކު ސޯޝަލްމީޑިއާގައި އަންނަނީ ފާޑުކިޔަމުންނެވެ.
ފަލާހުގެ އެވާހަކަ ކުށްވެރިކޮށް އިދިކޮޅު އެމްޑީޕީން ވެސް ވަނީ ބަޔާނެއް ނެރެފައެވެ. އެމްޑީޕީން ނެރުނު ބަޔާނުގައި ވަނީ އެ ބިލަކީ އިންސާނީ އަސާސީ ހައްގުތަކާއި، ނޫސްވެރިކަމުގެ މިނިވަންކަމާއި، ޚިޔާލުފާޅުކުރުމުގެ މިނިވަންކަމަށް ވަރަށް ބޮޑަށް އަރައިގަތުމުގެ ފުރުސަތު ލިބިދޭ ބިލެއް ކަމަށް ބުނެފައެވެ.