ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް ރައްޔިތުންގެ މަޖިލީހަށް ހުށަހަޅައިފައިވާ ބިލާ ގުޅިގެން އިއްޔެއާއި މިއަދު ނޫސްވެރިން ކުރި ޕްރެޝަރާ އެކު މިއަދު މެންދުރު ފަހު ރައީސް ޑރ. މުހައްމަދު މުއިއްޒު ނޫސްވެރިންނާ ބައްދަލުކުރައްވަން ނިންމަވައިފިއެވެ.
ސަރުކާރާ ގުޅުން ބޮޑު، ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ބިލު، ވެރިކަން ކުރާ ޕީއެންސީގެ ސުޕަމެޖޯރިޓީ އޮންނަ މަޖިލީހުން ބަލައިގަނެ، މިނިވަން މުއައްސަސާތަކުގެ ކޮމިޓީއަށް ފޮނުވީ އިއްޔެއެވެ.
އެ ބިލު ބަލައިގަތީ ނޫސްވެރިކަމުގެ މިނިވަންކަމަށް ބޮޑެތި ހުރަސްތަކެއް އެޅޭކަމަށް ވަކާލާތުކޮށް އެ ބިލު ބޭރުކުރުމަށް ގޮވައިލާ ގިނަ އަދަދެއްގެ ނޫސްވެރިން މުޒާހަރާ ކުރަމުން ދަނިކޮށެވެ. އަދި، ރައީސް އޮފީސް ދޮށަށާއި މުލިއާގެ ދޮށުގައި ރައީސް މުއިއްޒާއި ބައްދަލުކުރެއްވުމަށް ޑިމާންޑުކުރެއްވިއެވެ.
އެއާއެކު މިއަދު 13:30ގައި އެމަނިކުފާނު ނޫސްވެރިންނާ ބައްދަލުކުރެއްވުމަށް ވަނީ ނިންމަވައިފައެވެ.
އެނގިފައިވާ ގޮތުގައި ނޫސްވެރިންގެ ފަރާތުން އެ ބައްދަލުކުރެއްވުމުގައި ބައިވެރިވާނީ:
- އެމްޖޭއޭގެ ފައުންޑަރު އަދި ދައުރު ނޫހުގެ މެނޭޖިން އެޑިޓަރު ހިރިގާ އަހުމަދު ޒާހިރު
- އެމްޖޭއޭގެ އެގްޒެކެޓިވް ޑިރެކްޓަރު މުހައްމަދު ޖުނައިދު
- އަދަދު ނޫހުގެ ސީއީއޯ ހުސައިން ފިޔާޒް މޫސާ
- މިހާރު ނޫހުގެ މެނޭޖިން އެޑިޓަރު މުއިއްޒު އިބްރާހިމް
- މީޑިއާ ކައުންސިލްގެ މެންބަރު ނަހުދާ ފާއިޒް
ފާހަގަކޮށްލެވޭ ގޮތުގައި އިއްޔެ ދައުރުން ބޭރުން ބޭއްވި ޖަލްސާގައި ވާހަކަދައްކަވަމުން މެޖޯރިޓީ ލީޑަރު އަދި ރައީސް ޑރ. މުހައްމަދު މުއިއްޒާ އަރިސް ފަލާހު ވިދާޅުވީ، ނޫސްވެރިން ލާންވީ ޖަލަކަށް ނޫން ކަމަށާއި 'އުލުބައިދަންވީ' ކަމަށެވެ. އެ ވާހަކައާ ގުޅިގެން ފަލާހަށް ވަނީ ގިނަ ބައެއްގެ ފާޑުކިޔުން އަމާޒުވެފައެވެ.
ރަދީފުގައި ބުނާ ގޮތުން، އުލުބޭންދުމަކީ އިހު ޒަމާނުގައި މީހުން މެރުމަށް ހަދާ ގޮތެކެވެ. އެގޮތުން، އުލު ބައިންދާއިރު، ތޫނުކޮށްފައި ހުންނަ ދަގަނޑު އުލެއްގައި މީހާ ބައިންދާ ކަމަށް ރަދީފުގައި ބުނެފައިވެއެވެ.
ރައީސް އޮފީސް ސަރަހައްދުގައި މިނިސްޓަރު ޚަލީލާއި އަސްވާޑު ނޫސްވެރިންނާ ބައްދަލުކުރެއްވުން ---- ސަން ފޮޓޯ/ މާނިއު މުހައްމަދު
މީޑިއާ ބިލާ ދެކޮޅަށް ރައީސް އޮފީސް ސަރަހައްދުގައި މިއަދު ނޫސްވެރިން ހިމޭން އިހުޖާޖުކުރަނިކޮށް، މި ސަރުކާރުގެ ޔޫތު އެމްޕަވަމަންޓް، އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑް)އާއި ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ޚަލީލްވަނީ ނޫސްވެރިންނާ ބައްދަލުކުރައްވާފައެވެ.
ނަމަވެސް ފަލާހު ވިދާޅުވި މައްސަލައިގައި އެއްޗެއް ވިދާޅުވާން ދެބޭފުޅުން ވެސް މިއަދު ވަނީ ދެކޮޅު ހައްދަވައިފައެވެ.
ބިލާ ގުޅޭ ގޮތުން އާންމުންގެ ޚިޔާލު ހޯދާނީ 10 ދުވަހަށް ކަމަށާއި މީޑިއާތަކާ މަޝްވަރާކުރާނީ ތިން ދުވަހު ކަމަށް، ބިލު ދިރާސާކުރާ މިނިވަން މުއައްސަސާތަކުގެ ކޮމިޓީން މިއަދު ވަނީ ފާސްކޮށްފައެވެ.
ހައްނާން ހުށަހެޅުއްވި ބިލުގައި އޮތީ ކީކޭ؟
- މޯލްޑިވްސް މިޑިއާ އެންޑް ބްރޯޑްކާސްޓިން ކޮމިޝަނެއް އުފެއްދުން
- ކޮމިޝަންގައި ރައީސް އައްޔަންކުރައްވާ ތިން މެންބަރުން ތިއްބަވާނެ
- ބާކީ ހަތަރު މެންބަރުން އިންތިޚާބުކުރާނީ މީޑިއާތަކުން
- ކޮމިޝަންގެ ރައީސް އައްޔަންކުރައްވާނީ ރައީސް
- ކޮމިޝަނުން އަންގާ ކަމެއް އިސްލާހުނުކޮށްފި ނަމަ 5،000 އާއި 25،000 ރުފިޔާއާ ދެމެދުގެ ޖޫރިމަނާއެއް
- ގާނޫނާ ހިލާފު ކަމެއް ކޮށްފިނަމަ 100،000 ރުފިޔާއިން ޖޫރިމަނާކުރެވޭނެ
- މައްސަލައެއް ބަލަން ފަށައި ވަގުތީ ގޮތުން ރަޖިސްޓްރީ ބާތިލުކުރުމުގެ ބާރު ކޮމިޝަނަށް ލިބޭ
- ކޯޓު މަރުހަލާ ނުނިމެނީސް، ނޫހުގެ ރަޖިސްޓްރީ ބާތިލުކުރެވޭނެ
- ނޫސްތަކުގެ ވެބްސައިޓް ބްލޮކްކޮށް، ޓިވީ ބްރޯޑްކާސްޓް ހުއްޓުވުމުގެ ބާރު ކޮމިޝަނަށް
- ކޮމިޝަން އުފެދުމުގެ އަހަރެއް ކުރިން ހިނގި ކަންކަން ވެސް ކޮމިޝަނަށް ބެލޭނެ
ރައީސް ވަނީ މީޑިއާ ކޮންޓްރޯލް ކުރަން ޝައުގެއް ނެތް ކަމަށާއި އެ މަނިކުފާނަށް ބާރުތައް ނުލިބޭ ގޮތަށް ބިލު ފާސްކުރަން ޕީއެންސީގެ މެންބަރުންނަށް އަންގަވާފައިވާ ކަމަށް މީގެ ކުރިން ވިދާޅުވެފައެވެ.