ޗައިނާއިން އަނެއްކާ ވެސް ރާއްޖެއަށް ކުޅިވަރު ސާމާނުތަކެއް ހަދިޔާކޮށްފި

ޗައިނާއިން ރާއްޖެއަށް ކުޅިވަރު ސާމާނު ހަދިޔާކުރުމަށް ބޭއްވި ރަސްމިއްޔާތުގެ ތެރެއިން--

ޗައިނާގެ ފުޖިއާން ޕްރޮވިންސުން އަނެއްކާ ވެސް ރާއްޖެއަށް ގިނަ އަދަދެއްގެ ކުޅިވަރު ސާމާނު ހަދިޔާކޮށްފިއެވެ.

ހެންވޭރު ބޯޅަގޭގައި ބޭއްވި ޚާއްޞަ ރަސްމިއްޔާތެއްގައި ފުޖިއާން ޕްރޮވިންސުގެ ފަރާތުން މި ތަކެތި ރާއްޖޭގެ ސަރުކާރާ ހަވާލުކޮށްދެއްވީ ޗައިނާގެ ފަރާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ހިޒް އެކްސެލެންސީ ކޮންގ ޝިންހުއާއެވެ. އަދި، ރާއްޖޭގެ ފަރާތުން މި ތަކެއްޗާ ހަވާލުވެވަޑައިގަތީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުالله ރާފިޢުއެވެ.

ފުޖިއާން ޕްރޮވިންސުން ރާއްޖެއަށް ހަދިޔާކުރި ކުޅިވަރު ސާމާނުގެ ތެރޭގައި؛ ފުޓުބޯޅައާއި، ބެކްޕެކާއި، ތޮފީގެ އިތުރުން ޓްރެކްސޫޓާއި، ފުޓްބޯޅަ ކުޅުމަށް ބޭނުންކުރާ އިސްޓާކީނާއި، ފިރިހެނުންގެ ސޯޓާއި ޓީޝާޓް ހިމެނެއެވެ.

މީގެކުރިން ޗައިނާގެ ފުޖިއާން ޕްރޮވިންސުން ވަނީ މިދިޔަ ޖުލައި މަހުގެ ތެރޭގައި ވެސް ކުޅިވަރު ސާމާނު ހަދިޔާކޮށްފައެވެ. އެ ފަހަރު ހަދިޔާކުރި ތަކެތީގެ ތެރޭގައި، ޓޭބަލް ޓެނިސް މޭޒާއި، ޖޯޒީގެ އިތުރުން އަދިވެސް އެހެނިހެން ކުޅިވަރު ސާމާނު ހިމެނެއެވެ.

މީގެ އިތުރުން، ޗައިނާ ސަރުކާރުން މި އަހަރު ކުރީކޮޅު ވަނީ ރާއްޖެއަށް ކުޅިވަރުގެ ބައެއް ސާމާނުތައް ހަދިޔާކޮށްފައެވެ. އެ ފަހަރު ހަދިޔާކުރީ، އެތުލެޓިކްސްގެ އިތުރުން ޓޭބަލް ޓެނިސް އަދި ފުޓްބޯޅައާ ގުޅުންހުރި ސާމާނެވެ.

އޭގެ ކުރީން، މިދިޔަ ފެބުރުއަރީ މަހުގެ ތެރޭގައި ރާއްޖެއާއި ޗައިނާއާ ދެމެދުގައި ވަނީ އެމްއޯޔޫއެއްގައި ސޮއިކޮށް، ރާއްޖޭގެ ކުޅިވަރު ތަރައްޤީ ކުރުމުގެ އިތުރުން ދެ ޤައުމުގެ މެދުގައި އޮތް ޒަމާންވީ ރަހުމަތްތެރިކަމުގެ ގުޅުން ބަދަހިކުރުމާ ގުޅޭގޮތުން މުހިއްމު މަސައްކަތްތަކެއް ފަށައިފައެވެ.

ގުޅޭ ޓެގު
comment ކޮމެންޓް